Sabiduría 12 - Biblia Guaraní con Deuterocanónicos

1Pe nde espíritu omano'ỹva

oĩgui opa mba'épe,

2umi ho'a vaekuépe,

reja'o mimi ha reipytyvõ,

remomandu'a chupe kuéra

umi iñangaipáre,

osẽ haguã tape vaígui

ha ojevy pe reimeháme,

ha ojerovia nde rehe

ore Jára.

Canaangua ojeporiahurereko

3Umi nde yvy marangatúpe

ymaite oiko vaekuére,

4nde rejahéi vaekue

heko'ỹ megua ojapógui,

umi paje ha heta mba'e vai

apoháre.

5Umi tekove aña

mitã jukaháre, umi

hapicha ruguy ha ho'okuégui

karu guasu ojapóvare;

Umi tuguy oñohẽvo

oñembo'évare,

6umi túva imitã kangymi

ojukávare,

umívape rehundi vaekue

ru kuéra po rupi

7Ikatu haguã ko yvy

rehayhuvéva opa ambuégui

omoguahẽ nde ra'y kuérape.

8Ha umi Canaán guápe jepe,

ha'e rupi yvypóra,

reiporiahurereko vaekue,

ha remondo chupe kuéra káva

ne ñorãirõha renonderã

mbegue katúpe ojukapa haguã.

9Nde ikatu vaerã mo'ã

reity heko jojáva pópe,

peteĩ ñorãirõ guasúpe.

Umi nde rerovia'ỹvape

ỹrõ katu rehundipa

peteĩ tesa pirĩme,

tymba ñarõ atýra

térã ne ñe'ẽ rupi.

10Nde katu,

reinupã mbegue katúvo

chupe kuéra

reheja opoi haguã

hembiapo vaikuégui

opoisérõ,

reikuaa ramo jepe

ipype voi ogueru hague

heko aña

ha ndopoi mo'ãiha

heko tujágui araka'eve,

11ha'e kuéra niko

ñemoñare ojeharúva

iñepyrũha guive voi.

Ha ndaha'éi

avavégui rekyhyje haguére,

reheja reíva chupe kuéra

iñangaipa.

12Máva piko he'íta ndéve:

“Mba'e piko rejapo”?

Ava piko ombohováita

ne rembipota?

Ava piko ndéve osapukáita

rehundi haguére umi tetã

nde remopu'ã vaekue?

Máva piko opu'ãta nde rehe

omo'ã haguã hembiapo

vaívape.

13Nde rire ndaipóri

ambue tupã

opavavére oñangarekóva,

ha reikuaauka vaerãme

umi rejapóva.

14Ndaiporiháicha avei

mburuvicha guasu

oñemoĩva nde rehe

omo'ã haguã rehehápe

umi nde reinupã vaekue.

15Nde po joja rupi,

reisãmbyhy opa mba'e

teko jojápe,

ha reikuaa ndo'aiha

nde pokatúre

reinupã reinupã'ỹ vaerãme.

16Ne pokatúgui

nde reko joja,

ha rerekógui nde poguýpe

opa mba'e,

reporoporiahurereko.

17Nde rehechauka nde pokatu

oimérõ nde rerovia'ỹva,

ha remyakã tavy

umi, nde kuaa ramo jepe,

ojejapóva ne renondépe.

18Ha ne pokatúgui

añetehápe

reporombojovake

py'a guapýpe

ha ore sãmbyhy

po vevýi etépe,

ikatúgui reiporu nde pokatu

mamo reiporusehápe.

19Ha péicha rejapóvo

rembo'e ne retã guápe

heko jojáva ohayhu vaerãha

hapichápe,

ha reme'ẽ nde ra'y kuérape

ñeha'arõ kuaa ne porãva

rehejágui chupe kuéra

ombyasy iñangaipa.

20Nde ra'y kuérare ija'e'ỹva,

ojejuka mante vaerã vaekue.

Upéicharõ jepe

reinupã vevýinte chupe kuéra

ikatu haguã ojei

hembiapo vaikuégui,

21ne retãgua ndive katu

nde po pohyive vaekue,

jepeve ramo

reñoñe'ẽ me'ẽ vaekue

itúva kuéra ypykue ndive

heta mba'e reikuave'ẽ

chupe kuéra.

22Ha upéicha, reinupã

vevyivévo

ore rehe ija'e'ỹvape

ore mbo'e hína

roporombojovakévo

ore mandu'ami haguã

nde py'a porãre,

ha oguahẽ vove ára

roñembojovake haguã,

nde ore poriahurereko.

23Upévare, umi itarovágui

heko aña vaekuépe,

oikove aja pukukue,

hembiapo vaikuépe reinupã.

24Mombyry oho hikuái

teko jejavy rapére,

ha oguereko tupã ramo

tymba ñane mbojeguarúva,

ha mitã tavýicha

oñembotavyka.

25Upévare, mitã tavy

ojepy'a mongeta'ỹvaichape,

reinupã chupe kuéra

oñemotĩ haguãicha.

26Ha umi ojei'ỹ vaekue

hembiapo vaígui pe ñenupãme,

umíva katu ohupytýne

Tupã ñenupã añetéva.

27Ohechávo hikuái

ojeityha hese kuéra

umi tymba oguerekóva tupãrõ

ha omongyhyjepáva chupe kuéra,

upépe ohecha kuaa hikuái

Tupã añete guápe,

ymave oikuaase'ỹ vaekue.

Ha upéicha,

ho'a hi'ári kuéra

ñenupã ivai etevéva.