Jeremías 21 - Biblia Guaraní con Deuterocanónicos

Oñemomarandu ñenupã Jerusalénpe

1-2Mburuvicha guasu Sedequías omondo Pashur Malquías ra'y ha pa'i Sofonías Maaseías ra'y, Jeremías rendápe, he'i haguã chupe: “Eporandúna Ñandejárape mba'épa oikóta ñande hegui. Babilonia ruvicha guasu Nabucodonosor niko ondyry hína ñande rehe.2 R 25.1-11; 2 Cr 36.17-21. Ikatu mba'éko Ñandejára ojapo imba'e rechapyrã ha omboguevi Nabucodonosórpe.”

Upérõ Ñandejára oñe'ẽ Jeremíaspe,

3Ha ha'e he'i Sedequías remimbou kuérape: “Peje Sedequíaspe

4Tupã Israel Jára he'ikaha: ‘Pene kuimba'e kuérape oñorãirõva táva rokápe Babilonia ruvicha guasu ha caldéo kuéra ndive, ambyatýta ko táva ryepýpe.

5Che voi andyrýta pende rehe, opaite che pokatu reheve ha che pochy hendy mbarete etereíta pende rehe.Dt 29.27.

6Ajukáta opaite ko tavagua oĩ haguéicha. Yvypóra ha mymba kuéra omanóta mba'asy asãi ivai etereívagui.

7Upéi ame'ẽta Judá ruvicha guasu Ezequías Nabucodonosor ha ambueve hese ija'e'ỹ etéva pópe. Heseve ame'ẽta mburuvicha kuéra, kuimba'e oñorãirõva ha umi hembýva gueteri pe távape mba'asy asãi, ñorãirõ ha ñembyahýigui. Che amokyre'ỹta ojuka haguã oiporiahurereko ha ombyasy'ỹre avavéicha guápe.” Che, opa mba'e Jára, upéicha ha'e.

8“Emombe'u avei tetã guápe, che, opa mba'e Jára, ha'eha kóicha: ‘Aiporavouka peẽme jeikove térã ñemano rape.

9Upe opytáva ko távape, omanóta ñorãirõme térã ñembyahýigui térã mba'asy asãigui. Pe osẽva katu oñeme'ẽ haguã caldéo kuéra ko távare ondyrýva pópe, nomano mo'ãi. Ikatúta oikove.Jer 38.2.

10Che niko añembopy'a peteĩma arúvo ivaíva iporãva rangue ko táva ári. Ame'ẽta Babilonia ruvicha guasúpe ha ha'e ojatapýta hese.’”Jer 38.17-18. Che, opa mba'e Jára, upéicha ha'e.

Marandu Judá ruvicha guasúpe ho'a vaitaha

11-12Judá ruvicha guasu róga guápe, mburuvicha guasu David róga guápe ere ha'ekaha chupe kuéra kóicha:

Ehendu Ñandejára marandu:

Heko peguávake ejapo opa ára.

Umi ojereguereko vaívape enohẽ

chupe kuéra ohykue'óva pógui,

ani ágã ne rembiapo vai haguére

che pochykue tatáicha hendy nde rehe

avave ikatuve'ỹ haguã ombogue.

13‘Táva, ñu ári reiméva,

ita guasúicha yvy joja mbytépe,

che, opa mba'e Jára, péicha rombojovake:

Peẽ peje: Máva piko ikatúta ondyry ñande rehe?

Máva piko ikatúta oguahẽ ko roñemo'ãháme?

14Che amyengoviáta peẽme

ojerureháicha pene rembiapo vaikue.

Ajatapy pende ka'aguýre,

ha pe tata ombokusuguéta

opa pende jerekuévo.

Che, opa mba'e Jára,

upéicha ha'e.’”