1Pyhare pyte vove, umi oĩ vaekue Holofernes ndive ohopa. Oho oke hikuái, kane'õ ha tuichaite ka'u reheve. Bagoas upe rire omboty okáguio pe huvicha okeha.
2Judit opyta ha'eño upépe, ha Holofernes oĩ hupápe tuichaite ka'úreve.
3Judit he'i hembiguáipe oha'arõ haguã chupe okápe. Oha'arõ vaerã upépe osẽ meve ha'e, jepi guáicha oho haguã oñembo'e. Peichaite avei he'i Bagóaspe.
4Opavave ohopa ha avavete ndopytái upépe. Upémarõ Judit opu'ã ha oñembo'y Holofernes rupa yképe, ha he'i ipy'apýpe: “Tupã che Jára nde pu'akapáva, ema'ẽ porã kena ko ajapótavare Jerusalén rehehápe.
5Ko'ágã ne retã oikotevẽ oñepytyvõ ha che ajapóta oñekotevẽva oñehundi haguã umi opu'ã ha oñemoĩ vaekue ñande rehe.”
6Oho pe tupa akã gotyo, oĩháme Holofernes kyse puku ha oipe'a hyrúgui.
7Oñemboja pe tupáre ipojái iñakã raguére ha he'i: “ko'agãite che mombarete Tupã, Israel Jára.”
8Ha upépentema oity ha oity pe kyse puku ijajúrare, imbaretekue ome'ẽháicha ha oñakã'o.
9Ombyapajeréi pe hetekue tupágui, omondyryry ha oipe'a umi ombojeguáva pe tupa. Pya'e osẽ ha ome'ẽ hembiguáipe Holofernes akãngue,
10ha omoinge pe vosa guasúpe, hi'upyrã oguerekohápe. Upéi osẽ mokõivéva, jepiguáicha, oho haguã oñembo'e. Ohasapa pe Asírio kuéra oĩháme, ojere hikuái pe ñúre ha ojupi Betulia yvytýpe, oguahẽ meve pe táva rokẽme.
Judit ojevy Betúliape11Mombyry guive, Judit osapukái umi okẽ rerekuápe:
—Peipe'a okẽ! Tupã, Ñandejára oĩ ñane ndive ohechaukávo Israel rehehápe ipokatu umi hese oñemoĩséva renondépe! Péicha niko ojapo ko árape!
12Ohendúvo chupe umi kuimba'e táva pegua, pya'e oguejy pe táva rokẽme ha ohenói umi myakãhárape.
13Opavave ou joa, noimo'ãigui Judit ou jeyha. Oipe'a pe okẽ ha oheja chupe kuéra oike, tuicha ojatapy hikuái ohecha porã haguã ha ojerepa hese kuéra.
14Upépe, Judit he'i chupe kuéra:
—Pemomba'e guasu Tupãme! Pemomba'e guasu Tupãme, oiporiahurereko haguére Israel retãme. Che po rupi, ko pyharépe, ohundi umi opu'ãsévape ñande rehe!
15Ha oguenohẽvo pe voságui ohechauka haguã chupe kuéra Holofernes akãngue he'i:
—Kóina ápe Holofernes, Asírio ñorãirõhára kuéra ruvicha akãngue! Ha kóina ápe avei pe ombojegua vaekue hupa. Kóva guýpe oñeno vaekue tuichaite ka'u reheve! Ñandejára katu ojuka chupe kuña po rupi!
16Ñandejára rérape ha'e, ha'e oĩ hague che ndive opa mba'e ajapóvape! Che porã rupi Holofernes ho'a ha oñehundi. Ha'e ndopokói che rehe, ndojapói che rehe mba'eve ikatúva che momarã.
17Opavave ijurujái opytávo, ha oñakãitývo omomba'e guasu Tupãme ha he'i:
—Tereñemomba'e guasu Tupã, ore Jára, rehundi haguére, ko árape, umi opu'ãvape ore rehe!
18Ha Ozías he'i Judítpe:
—Tupã, Yvatetegua, ta nde rovasave opaite kuña ko yvy ape ariguágui! Toñemomba'e guasu Tupã, ñande Jára ojapo vaekue yvága ha yvy, nde reraha vaekue reikytĩ haguã Asírio kuéra ruvicha akã!Gn 14.19-20; Jue 5.24-27; Lc 1.42.
19Pe jeroviágui nde rehechauka vaekue avave ndahesarái mo'ãi, akóinte amomandu'áta chupe kuéra Tupã pokatúre.
20Tupã ta ne mbotuicha opa árape guarã ome'ẽvo ndéve opaichagua mba'e porã, nde rekove remoĩ haguére ñane retã renohẽ haguã mba'e vaietágui.
Ha opavave he'i:
—Amén! Amén!
Who We AreWhat We EelieveWhat We Do
2025 by iamachristian.org,Inc All rights reserved.
