Eclesiástico 22 - Biblia Guaraní con Deuterocanónicos

Iñate'ỹva

1Iñate'ỹva

ojogua ita ky'ápe,

opavave chugui ojeguaru.

2Iñate'ỹva ojogua

peteĩ oñeĩ hague,

opokóva hesénte

ojepo tyvyro.

3Mitã ojeheko mbo'e'ỹva,

túva motĩha,

kuñárõ katu,

ohundíta chupe.

4Tajýra iñakã guapýva

ojuhúta imenarã,

otĩ'ỹva katu

omoñembyasy itúvape.

5Kuña hova atãva

omotĩ itúva ha iménape,

ha mokõive ojapo'i chupe.

6Ñe'ẽ hendape'ỹ

ojogua mba'epu rory

ñeñotyhápe.

Ñenupã ha jeja'o katu

omoĩ akã guapy.

7Ta'ýra reko porã

oguerekóva ho'u vaerã

nomombe'uséi

itúva kuéra imboriahu hague.

8Ta'ýra ojejapóva

ha ojeheko mbo'e vaíva

omotĩ túva kuéra ypykue

reko porã.

9Itavýva reko mbo'e

ha'ete kambuchi jekakue

ñambojase jeýva,

térã ñamombayse

oke hatãvape.

10Reñe'ẽrõ

itavýva ndive

ha'ete reñe'ẽva okévape,

reñe'ẽmbávo he'íta:

“Mba'épako ere ra'e?”

11Ta ne rasẽ omanóvare

opytágui pytũmbýpe,

ta ne rasẽ itavývare,

ndoiporúigui iñapytu'ũ.

Iporãve jepe

ne rasẽrõ omanóvare

opytu'úguima,

itavýva rekove niko

ivaive manógui.

12Omanóva oñembyasy

7 ára pukukue,

itavýva ha iñañáva katu

oikove aja pukukue.

13Ani reñe'ẽ eterei

itavýva ndive,

ha ani reiko hendive,

ejerereko chugui

ani haguã ne monguerái

ha ne mongy'a.

Ejei chugui ha rejuhúta

pytu'u,

ha na ne mbopochy mo'ãi

heko tarova,

14Mba'épa oĩ

ipohyivéva itágui?

Ha mba'éichapa ñambohérata

upéva, ndaha'éirõ “tavy”?

15Ndahasyive

jahupi ñande apére

yvyku'i, juky ha fiérro

peteĩ itavývagui.

16Yvyra

oñemoĩ porã vaekue

peteĩ ógare

ndojehekýi mo'ãi

yvy ryrýipe,

péicha avei peteĩ py'a

oguapýva

py'a ñemongeta ári,

noñembyai mo'ãi

ho'a vai ramo opa mba'e.

17Tembiaporã

osẽva akã guapy porãgui,

ha'ete jeguaka oñemoĩva

óga tápia potĩre.

18Yvyra hakua ojekutúva

ijyvatehápe

ndogueropu'akái yvytu ratã,

péicha itavyraíva

ndoguerekóiva mba'eve iñakãme,

ndogueropu'akái

mba'eveichagua kyhyje.

Irũ tee rayhu

19Oporohesa nupãva,

oporombyesay,

ha oporombopy'a hasýva

oguenohẽ okápe

ñane remiandu.

20Oha'ãva itápe guyra

omboveve chupe,

ha pe oñe'ẽ vaíva

iñirũ teére,

ombyai imborayhu.

21Oime rire ramo rehekýi ra'e

nde kyse puku ne irũ teére

ani rejepy'apy eterei,

ikatúko ou jey.

22Rembopochýrõ ñe'ẽme

ne irũ teépe,

ani reñemyangekói,

ikatúko peiko porã jey.

Ñe'ẽ reity, poroapo'i,

ñemihamegua ñemombe'u,

guasu api,

umíva katu omomombyry

oimeraẽ irũ teépe.

23Eñeha'ã ejehayhuka

nde rapichápe

imboriahu aja,

revy'a haguã hendive

oho porãvo chupe.

Ojejopy vai ramo

emoirũ chupe,

ha remboja'óta hendive

mba'e rejakue ohupytýva.

24Tatatĩ raẽ ha upéi tata,

upéicha avei ñe'ẽ vai raẽ

ha upéi tuguy.

25Natĩ chéne amo'ã haguére

che irũ teépe,

ha nakañýi chéne chugui.

26Ha ha'e rupi ojehúrõ

chéve ivaíva,

umi oikuaáva

ojererekóne chugui.

27Oĩ nga'u ikatúva

ojoko che juru,

ha che rembe kuéra omboty

hekopegua'ỹvagui,

ani haguã

ko'ãva rupi ha'a,

ha che kũ che rundi.