Sabiduría 15 - Biblia Guaraní con Deuterocanónicos

Israel noñakãitýi ta'ãngápe

1Nde katu, ore Jára,

ne mba'e porã

ha nde reko jeroviaha.

Reporoha'arõ kuaa

ha reisãmbyhy opa mba'e

poriahurerekópe.

2Rojapo ramo jepe ivaíva,

ore ne mba'e.

Romomba'e guasu nde pokatu

ha ndorojapói chéne ivaíva,

roikuaágui nde ore rekoha

ne mba'e ramo.

3Tupã kuaa he'ise

teko joja iporãvéva,

ha nde pokatu recha kuaápe

oĩ mano'ỹ rapo.

4Umi ta'ãnga rei

yvypóra rembiapokue,

na ore mbotavy mo'ãi,

ha umi ijeguakaita

oñemoĩva hese kuéra

japu meme.

5Umi ivýrova ohechárõ,

itarovaite umi ta'ãnga rei

ipytuhẽ'ỹva.

6Umi ta'ãnga rei apoha

ha umi omomba'e guasúva,

mba'e vai rayhuha meme,

ha ivaívante ohupytýta

ojeroviárõ hese kuéra.

7Upéicha niko avei

pe ñai'ũre omba'apóva,

ñepia'ãme oguenohẽ

opa mba'e jaiporúva.

Upe ñai'ũguinte avei,

ojapo tekotevẽva

ogapýpe,

ikatuháicha ojapo ave

hetave mba'épe guarã:

ha ha'e mante he'íne

mba'épepa ojeporúta

upe ojapo vaekue.

8Upéinte oiporu vai

pe imba'e kuaa

ha ojapo avei upe ñai'ũgui

peteĩ tupã gua'u.

Ha upe ta'ãnga apoha,

ñai'ũgui kuehénte

ojapo vaekue Tupã,

ñai'ũpe jey opa vaerã.

Ome'ẽ jey vaerã hekove

ojeporuka vaekue chupe.

9Ha'e katu

ojepy'apy rangue

pe hekove mbykyha

ha vokóinte omanotaha,

oñeha'ã avei ojapo ta'ãnga,

ojapoháicha

umi óro, pláta ha vrónsere

omba'apóva, ha ojererovu

ojapo haguére ha'e avei

umichagua.

10Ipy'apy, tanimbu rei,

ha hemira'arõ yvy rei,

hekove katu tujúicha

ndaha'éi mba'evete.

11Ndoikuaaséigui

Tupã Ijapoharégui

ome'ẽ vaekue chupe

peteĩ ánga katupyry

ha oipeju itĩnguápe

pytu oporomoingovéva.

12Ha'e oimo'ã, ñande rekove

ñemboharái reinteha,

ha jaikoveha ñamono'õ haguã

heta mba'énte:

He'i: “Tekotevẽ ñanohẽ

viru oimeháicha,

ta mba'e vaígui jepe”.

13Ko kuimba'e ojapóva

ta'ãnga ha tembiporu ñai'ũ

ojeka reíva,

oikuaa porãve opavavégui

hembiapo vaiha.

Egiptogua kuéra ojavy

14Ha umi

opavavégui ivyrovéva,

mitã michĩgui jepe

itavyvéva,

umíva,

umi ne retã jopyhare.

15Ha'e kuéra oguerekógui

itupã ramo

umi ta'ãnga omomba'éva

tetã nguéra mombyrygua,

ikatu'ỹva oiporu

hesa kuéra ohecha haguã,

itĩ ipytuhẽ haguã,

ijapysa ohendu haguã,

ikuã nguéra opoko haguã,

ha ipy oguata haguã.

16Umi ta'ãnga

ojapo yvypóra, oikovéva

hekove ojeporukágui

chupe kuérante, ha ndaikatúi

ojapo peteĩ tupã ijoguaha.

17Yvypóra niko

tekove omano vaerãva,

ha ipógui osẽta mante

peteĩ oikove'ỹva

ha'e niko tuichave

umi ta'ãnga rei

ha'e omomba'e guasúvagui,

ha'e niko oikove

ha umíva katu nahániri.

18Ha omomba'e guasu avei

umi tymba ojejeguaruveha,

tavýpe ndahasaháiva,

19Naiporãiva

oñeporãngereko haguã jepe,

ambue tymbáicha.

Tupã ndoguerohorýi,

ha ndohovasái.