2 Samuel 5 - Biblia Guaraní con Deuterocanónicos

David, Israel ha Judá ruvicha guasu(1 Cr 11.1-3)

1Upe rire opa Israel ñemoñaregua oho Hebrónpe oñe'ẽ haguã David ndive ha he'i hikuái chupe: “Ore niko nde ruguy tee,

2ha Saúl ramo jepe ore ruvicha guasu, ndénte voi reisãmbyhy vaekue Israel guápe ñorãirõháme. Hi'arive, Ñandejára ome'ẽ ndéve iñe'ẽ ndetaha upe omyakãva ha oisãmbyhýva Israel.”

3Upéicha opa myakãhára*f** Israelgua oho ha oñe'ẽ David ndive Hebrónpe, ha ha'e oñoñe'ẽ me'ẽ hendive kuéra, omoĩvo Tupãme mba'e rechahárõ. Upérõ ha'e kuéra omoĩ Davídpe Israel ruvicha guasúrõ.

4David oguereko 30 áño oñepyrũrõ oisãmbyhy, ha oisãmbyhy 40 áño.

5Hebrónpe oiko Judá ruvicha guasúrõ 7 áño imédio, ha upéi Jerusalénpe Israel ha Judá ruvicha guasúrõ 33 áño.David oñemomba'e táva Sión rehe(1 Cr 11.4-9)

6Mburuvicha guasu David ha iñirũ nguéra oho Jerusalén gotyo ondyry haguã jebuséoJos 15.63; Jue 1.21. kuérare, oikóva upe tetãme. Umíva he'i Davídpe: “Nde nga'u piko reikéta ápe! Hesatũ ha ikarẽva jepe niko nde jokóta!”

7David katu oñemomba'e Sión táva oñeñangareko mbaretévare, ko'ágã “David távape” ojekuaáva.

8David he'i vaekue upérõ: “Umi ondyrýva jebuséore, toike pe y rape rupi ha tojukapa umi hesatũva ha ikarẽvape, umívare niko nda cha'éi eterei.” Upégui ou pe ñe'ẽnga: “Hesatũva ha ikarẽva ndaikatúi oike tupaópe.”

9Upéi David oñemohenda pe táva oñeñangareko mbaretévape, ha ombohéra “David táva”, ha omopu'ã korapy jere yvate ijerére, pe ojejupiha guive, óga guasu peve.

Hiram ombou hembijokuái Davídpe(1 Cr 14.1-2)

10David oñemombareteve ohóvo, ha Ñandejára ipu'akapáva oĩ hendive.

11Upévare Hiram, Tiro ruvicha guasu, ombou hembijokuái Davídpe, ha heseve kuéra yvyra kytĩha ha ita kytĩha; umíva ogueraha kuri'y ha omopu'ã David róga guasu.

12Upérõ David ohecha kuaa Ñandejára omohenda hague chupe Israel ruvicha guasúrõ, ha omyakãrapu'a hague chupe hetã Israel rehehápe.

Ambue David ra'y kuéra(1 Cr 3.5-9; 14.3-7)

13Ojererova rire Hebróngui Jerusalénpe, David omenda jey ambue kuña kuérare ha oñemokuña hetave avei ha chugui kuéra heta ita'ýra ha itajýra.

14Ita'ýra kuéra oikove ypy vaekue chupe Jerusalénpe, ko'ãva: Samúa, Sobab, Natán, Salomón,

15Ibhar, Elisúa, Néfeg, Jafía,

16Elisamá, Eliadá ha Elifélet.

David ipu'aka filistéo kuérare(1 Cr 14.8-17)

17Filistéo kuéra oikuaávo Davídpe oñemoingo hague Israel ruvicha guasúrõ, ojepoi paite ohekávo chupe; David katu oikuaávo oñemohenda itáva oñeñangareko mbaretévape.

18Filistéo kuéra ou chupe ha oñemohenda Refaim ñúme.

19Upévare David oporandu*f** Ñandejárape ha he'i:

—Ikatúpa andyry filistéo kuérare? Che pytyvõtapa che pu'aka haguã hese kuéra?

Ñandejára he'i chupe:

—Endyry katu, roipytyvõta ha nde pu'akáta hese kuéra.

20David oguahẽ Baal-perasim héravape ha upépe ipu'aka hese kuéra. Upévare he'i: “Peteĩ ysyry guasúicha Ñandejára oipe'a chéve tape che rehe ija'e'ỹva pa'ũme.” Ha ombohéra upe tenda Baal-perasim.

21Filistéo kuéra oheja upépe itupã gua'u kuéra ha David ha iñirũ nguéra ombyatypa ha ohapy.

22Filistéo kuéra katu oñemohenda jey Refaim ñúme,

23ha David oporandu jey Ñandejárape, ha Ñandejára he'i chupe:

—Ani rendyry hese kuéra henonde guio; emongora chupe kuéra ha endyry hapykue guio reguahẽvo yvyra ryakuã porã máta kuéra oĩháme.

24Rehendu vove opyrũva umi yvyra máta ru'ãre, ejeity hi'ári kuéra; upéva he'ise hína che ahaha ne renonderã ajuka haguã filistéo kuérape.

25David ojapo Ñandejára he'i haguéicha chupe ha ipu'aka filistéo kuérare Gabaón guive Guézer peve.