Números 34 - Biblia Guaraní con Deuterocanónicos

Pe yvy tuichakue

1Ñandejára he'i Moiséspe:

2Kóicha ere Israel guápe: Peike rire Canaánpe, pe yvy che ame'ẽva peẽme, pende yvy teerã, kóicha tuicháta:

3Yvy gotyo ojepysóta yvy ojeiko'ỹha Sin guive, Edom rembe'y pukukue. Kuarahy resẽ guio oñepyrũta Mar Muerto yvy gotyo.

4Upégui ohóta yvy gotyo, yvyty Acrabim gotyo, ohóvo Sin rupi Cadés-Barnea peve. Upégui ojupi jeýta yvate kuarahy reike gotyo, Hasar-Adar ha Asmón peve.

5Ha pégui oho jeýta ysyry Egipto peve opa haguã yguasu kuarahy reike gotyo oĩvape.

6Kuarahy reike gotyo katu oguahẽta yguasu rembe'y peve.

7Yvate gotyo, ohóta y guasúgui yvyty Hor peve,

8ha pégui Hamat reike peve. Pégui ohóta Sedad gotyo,

9ha Zifrón peve ha opáta Hasar-Enánpe. Upe rupi peve oguahẽta pende yvy yvate gotyo.

10Kuarahy resẽ gotyo katu ohóta Hasar-Enángui Sefam peve,

11pégui ohóta yvy gotyo Riblápe, opytáva táva Aíngui kuarahy resẽ gotyo ha pégui oguejýta yvyty kuéra gotyo oĩva yguasu Galiléa rembe'ýpe kuarahy resẽ gotyo,

12pégui oguejýta yvy gotyo ysyry guasu Jordán rembe'ýre, Mar Muerto peve.

Péichata pende yvy tuichakue opa ijerekuévo.”

Yvy ñemboja'o

13Upérõ Moisés he'i Israel guápe ojapo haguã kóicha: “Kóva hína pe yvy peẽ peñomboja'ótava peitývo hese po'a, Ñandejára ome'ẽva umi 9 ha mbytere ñemoñare guápe.Myakãhára*f** kuéra ári ho'a yvy ñemboja'o

16Ñandejára he'i Moiséspe:

17“Pa'i Eleazar ha Josué Nun ra'y tomboja'o pe yvy Israel guápe.

18Tou avei peteĩ myakãhára peteĩ-teĩ ñemoñare apytégui toipytyvõ chupe kuéra pe yvy ñemboja'ópe.”

19-29Ko'ãva hína myakãhára kuéra Ñandejára oiporavo vaekue:

Judagua, Caleb Jefuné ra'y.

Simeongua, Samuel Amihud ra'y.

Benjamingua, Elidad Quislón ra'y.

Dangua, Buquí Joglí ra'y.

José ra'y Manasesgua, Haniel Efod ra'y.

José ra'y Efraingua, Quemuel Siftán ra'y.

Zabulongua, Elisafán Parnac ra'y.

Isacargua, Paltiel Azán ra'y.

Asergua, Ahihud Selomí ra'y.

Neftaligua, Pedahel Amihud ra'y.

Ko'ãvape oiporavo Ñandejára omboja'o haguã Canaán retã Israel guápe.