Eclesiástico 18 - Biblia Guaraní con Deuterocanónicos

Ñandejára ipokatu ha oporoporiahurereko

1Ñandejára

oikovéva opa ára,

ojapo vaekue opa mba'e.

2Ha'e ñoite imarangatu,

ndaipóri ha'eichagua.

3Ha'e opa mba'e oĩva

ipópe oisãmbyhy,

ha opavave

ojapo ha'e he'íva.

Ha'e mburuvicha guasu pavẽ

ipokatúva,

omoingoéva ojuehegui

upe imarangatúva

ha upe yvy ariguáva.

4Ndaipóri ikatúva

oipapa hembiapokue.

Ava piko ikatúta oipyguara

imba'e rechapyrã?

5Máva piko ikatúta

oha'ã ituichakue

térã omombe'u ipy'a porãngue?

6Ndaipóri mba'eve

ikatúva jaipe'a

umi ojapo vaekuégui

térã ñambojoapy umívape.

Ndaipóri avave ikatúva

oipyguara

imba'e rechapyrã.

7Pe yvypóra oimo'ãrõ

oguahẽmaha ijapýpe,

oñepyrũ ramónte hína

ha opytu'úrõ,

opyta ijurujái.

8Mba'e piko pe yvypóra,

mba'e apoha piko?

Mba'e piko chupe guarã

pe iporã térã ivaíva?

9Ha'e oikove pukuete ramo,

100 año pevénte ohupyty.

10Peteĩ ytyky yguasúpe

térã peteĩ yvyku'i ra'ỹime

ojogua umi áño oikovéva

ñambojojárõ

ára opa'ỹvare.

11Upévare Ñandejára

oha'arõ kuaa,

ha oiporiahurereko iterei

chupe kuéra.

12Ha'e oikuaa porã

mba'épepa opa hekove,

ha upévare naikane'õi

oheja rei haguã chupe kuéra

iñangaipa.

13Yvypóra oporiahurereko

hapichápente,

Ñandejára katu

oiporiahurereko opavavépe;

ha'e oporomomarandu,

oporohekombo'e

ha oporosãmbyhy

ovecha rerekuáicha.

14Ha'e oiporiahurereko

umi iñe'ẽ rendúvape,

ha ikyre'ỹva ojapo haguã

hembiapoukapy.

Mba'e porã

15Che ra'y reporopytyvõrõ

ani reporoja'o,

reme'ẽvo jopói

ani ne ñe'ẽ pohýi.

16Ysapy ombopiro'yháicha

ára haku,

peteĩ ñe'ẽ porã

iporãve jopóigui,

17Añetehápe

peteĩ ñe'ẽ porã

tuichave jopóigui,

ha imba'e porãva

ome'ẽ mokõive mba'e.

18Itavyraíva

ome'ẽ'ỹrõ jepe,

ojahéi ñande rehe,

hakate'ỹva remime'ẽ

ohapy ñande resa.

Jeiko kuaa

19Eikuaa porã raẽ

reñe'ẽ mboyve,

ha nde rasy mboyve,

eñepohãno.

20Reñembojovake mboyve

ema'ẽ raẽ nde jehe,

ha reñembojovakévo,

ojeheja reíne ndéve

ne rembiapo vaikue.

21Nde rasy mboyve eñemomirĩ

ha rejapórõ ivaíva

eñembyasy.

22Ani rembopuku

rejapo haguã pe ñe'ẽ

reme'ẽ vaekue Ñandejárape,

ha ani rembotapykue

remanoha árape guarã.

23Reme'ẽ mboyve ne ñe'ẽ

Ñandejárape, eñembosako'i

rejapo haguã

ha ani reipy'a ra'ã chupe.

24Ne mandu'áke

Ñandejára pochýre

umi ára pahápe,

ha'e oúrõ oporonupãvo

ha omboyke ramo hova.

25Hetárõ hi'upyrã,

ne mandu'a ñembyahýire.

Ne mba'e rereko hetárõ,

ne mandu'a mboriahu ha jereko'ỹre.

26Pyharevégui ka'arúpe

ohasa ohóvo ára,

ha Ñandejára renondépe

opa mba'e ohasa.

27Iñarandúva

imba'e recha kuaa

opa mba'épe

ha ojejuhúrõ angaipa

rapépe, ojei chugui.

28Opa iñakã porãva

oikuaa arandu,

ha oguerohory upe ojuhúvape

arandu.

29Umi oñe'ẽ kuaáva

omongakuaa pe arandu

ha he'i heta ñe'ẽnga

hypy'ũva.

30Ani reñeme'ẽ ne akã vaípe

ha ne rembipota ky'águi

ejejoko.

31Reñeme'ẽrõ

ne rembipota ky'ápe,

reikóta toryja ramo

nde rehe ija'e'ỹvape.

32Ani reiko

revy'aháre meme,

péicharõ niko,

voi ne mboriahúta.

33Nde sogue ramo,

ani reiporu viru

rejapo haguã vy'a guasu.