Sabiduría 2 - Biblia Guaraní con Deuterocanónicos

Mbyky ñande rekove

1Oime ojepy'a mongetáva

ha ojavyhápe he'íva:

“Ñande rekove mbyky

ha henyhẽ vy'a'ỹgui.

Yvypóra omano mante vaerã,

ha ndojehecháiva

ojevy vaekue yvykuágui.

2Ñaimo'ã'ỹháguinte voi

jaju ko yvy ári,

ha jahasa

jaikove'ỹrõ guaréicha.

Ñane pytuhẽ niko tatatĩnte,

ha ñane remiandu tata piriri

osẽva ñande py'a ruguágui.

3Ogue, ha oiko tanimbu

ñande retégui,

ha ñane ãngue

yvytúicha isarambi.

4Ho'áne tesaráipe

ñande réra,

ha avave naimandu'ái chéne

ñande rembiapokuére.

Araícha ñande rekove ohasáne,

oheja'ỹre hendague,

ha opa reíne tatatĩnáicha

kuarahýpe,

hakukue omotĩmbopáva.

5Ñande rekove ohasa

kuarahy'ãicha

ha ñane mano ndaijokohái,

ñande hegui oikótava

oje'epyréma,

ndaikatu véima oiko'ỹvo

Javy'áke jaikove aja

6Peju, aipórõ, javy'a

opa mba'e

ko'ágã jarekóva reheve,

javy'a ñane mitã ramo guaréicha.

7Peju, ja'u heta kaguy

ha ñañemohyakuã porã,

ani jaheja ohasa rei

yvoty ára,

8ñambojegua

ñane akã yvotýpe

hope mano mboyve.

9Aníke ipore'ỹ avave

ko javy'a porãhágui,

opa rupi jaheja

ñande vy'a rapykuere.

Upéva ha'e ñane mba'e

ha upéva jahupyty vaerã.

10Jajopy mboriahu ndive

ta heko joja jepe ha'e.

Ani jaiporiahurereko

imenave'ỹvape,

ha jajapo mba'érõ

umi tuja akãtĩme.

11Jaikórõ mbaretépe

jahupytýne jaipotáva,

ikangýva mba'eve ndohupytýi.

12Ñamoñuhã heko jojávape,

oñemoĩgui ñande rapépe

ha ndohejái jajapo

jajaposéva,

ñande rova api

jajei haguére

heko peguávagui,

ha opa jajeheko mbo'e porã

haguégui.

13Heko joáva he'i

oikuaaha Tupãme,

ha Ñandejára ra'yha

he'i ijehe.

14Hatã ñande rova api

umi mba'e jaroviávare,

ha henondépente jepe

ndaikatúi ñaime,

15ha'e oikógui

ñande jaiko'ỹháicha

ha oguata tape ambuére.

16Heko ky'áva ramo

ñande recha,

ha tembe jeguarúpe

ojei ñande rapégui.

Oguereko po'a ramo

heko jojáva mano,

ha ojejapo

Tupã itúva haguére.

17Jahechami añetépa

opa he'íva,

ha Mba'éichapa opa

amo ipahápe.

18Heko jojáva

Tupã ra'ýrõ añete,

oipytyvõne,

ha oipe'áne

chupe ohayhu'ỹva pógui.

19Ñañemboharáina hese

ha jareko asy,

jahechami imbarete

ha oha'arõ kuaápa.

20Jajuka chupe jaguáicha,

he'i niko

Tupã oipytyvõtaha chupe.

21Péicha oñe'ẽ iñañáva

ha tuicha ojavy,

heko aña ombohesa ypytũ

chupe kuéra.

22Ha'e kuéra ndoikuaái

Ñandejára rembipota,

noha'arõi mba'eve

teko marangatúgui,

ha nomomba'éi

heko potĩva jehepyme'ẽ.

23Tupã ojapo yvypórape

omano'ỹ haguã,

ha ojapo chupe ijoguahárõ.

24Ha aña, ha'enteségui,

omoinge mano ko yvy ape ári,

ha umi hendive oĩva

ohasa mante vaerã upe rupi.