Tobit 8 - Biblia Guaraní con Deuterocanónicos

Aña ñemosẽ

1Okaru rire oho hikuái oñeno. Ogueraha pe karia'y koty oketahápe.

2Upépe Tobías imandu'a upe he'i vaekuére chupe Rafael, ha oguenohẽ ivoságui pe pira py'a ha ipy'akue ha omoĩ insiénso ojehapy ári.

3Pe hyakuãngue ohetũvo aña osẽ oveve yvytúre Egipto gotyo. Upe peve Rafael oho hapykuéri ha oñapytĩ chupe ha oheja.

4Upe aja pe kuña ru ha isy osẽ Tobías kotýgui ha omboty okẽ. Tobías opu'ã tupágui ha he'i Sárape: “Epu'ã che rembiayhu ñañembo'e. Jajerure Tupãme ta ñande poriahurereko ha toñangareko ñande rehe.”

5Pe kuña opu'ã ha mokõivéva oñembo'e Tupãme kóicha:

Toñemomba'e guasu Tupã,

ore ru kuéra Jára,

ha toñemomba'e guasu

nde réra opaite ára!

Yvága ha opa yvypóra

ta nde rovasa opa ára!

6Nde rejapo Adánpe

ha eme'ẽ chupe

hembirekorã Eva,

oipytyvõ haguã chupe

ha oĩ haguã hendive.

Ha hese kuéra ae

ou opa yvypóra.

Nde ere vaekue: “Naiporãi

kuimba'e oiko ha'eño.

Ajapóta peteĩ

oipytyvõ vaerã chupe

ijoguaháva.

7Ko'ágã che ajapo

ko kuñágui che rembireko,

ndaha'éi

arekoségui chupénte,

romenda porã haguã uvei.

Ore poriahurereko kena

ha ore moingove puku.

8Mokõivéva he'i:

“Amén, amén”.

9Ha oñeno hikuái oke.

Raguel jepy'apy

10Raguel opu'ã rire, ohenói hembiguái kuérape ha oho oñondive ojo'o haguã peteĩ yvykua. He'i ipy'apýpe: “Ani ágã Tobías omano mba'e ha opavave oñembohory ore rehe.”

11Ojo'opa vove pe yvykua, Raguel ou jey hógape ha ohenoika hembirekópe

12ha he'i chupe: “Emondo peteĩ ne rembiguái pe kotýpe, oikuaa haguã oikove gueteripa Tobías. Oime ramo omano ra'e, ñañotỹta ñemiháme”.

13Omondo henonderã hembiguái, omyendy hikuái peteĩ mba'e rendy ha oipe'a upe okẽ. Oike ha'e, ha ojuhu Tobías ha Sara ojoykére oke hína.

14Upéi osẽ ha he'i chupe kuéra: “Oikove, ndojehúi chupe mba'eve”.

15Upéma ramo Raguel omomba'e guasu Tupã yvága guápe he'ívo: “Ndéve romomba'e guasu Tupã, opa ára ta ne momba'e guasu maymáva!

16Ndéve romomba'e guasu tuicha che mbovy'águi, ha ndojehúi haguére mba'eve ivaíva, aimo'ã haguéicha.

17Ndéve romomba'e guasu reporiahurereko haguére Sara ha Tobíaspe. Rehechauka reiporiahurerekoha chupe kuéra, ha reñangarekoha hese kuéra. Toikove puku hikuái, emyenyhẽ vy'águi ha eme'ẽ chupe kuéra opa mba'e.”

18Upéi Raguel he'i hembiguái kuérape ojaty jey haguã ko'ẽ mboyve pe yvykua ojo'o vaekue hikuái.

Vy'a guasu ha jopói menda rehegua

19Raguel he'i hembirekópe ojapo haguã peteĩ tatakua renyhẽ mbuja. Ha'e katu oho oguenohẽ korágui mokõi guéi ha irundy ovecha, ojukauka ha upéi ombojyka vy'a guasurã.

20Ohenoika Tobíaspe ha he'i chupe: “Repytáta reiko ko'ápe 14 ára. Rekarúta che ndive ha rembovy'áta che rajýpe. Ha'e niko heta itereíma ohasa asy vaekue.

21Upéi reho jeýta nde ru rógape ha reraháta mbytere opa mba'e che arekóvagui. Ha ágã che ha che rembireko romano vove, opytáta peẽme avei umi mba'e hembýva. Néike che ra'y. Che hína ko'ágã nde ru, ha Edna nde sy. Ko'ágã guive ha opa ára peve, ore rojoaju nde rehe ha ne rembirekóre. Néike che ra'y.”