Sabiduría 16 - Biblia Guaraní con Deuterocanónicos

Egipto ha Israel ñombojovake: Ynambu ha ju'i

1Upévare, chupe kuéra

oñenupã hekópe porã,

ha ojeity hi'ári kuéra

opaichagua tymba.

2Ha umi mba'e renondépe,

ne mba'e porã vaekue katu

ne retãgua ndive,

ha remohyguãtã haguã

reme'ẽ vaekue chupe kuéra,

ko tembi'u ndehéva: ynambu!

3Ha péicha umi Egiptogua

iñembyahýirõ jepe,

ombojeguaru chupe kuéra

umi vícho Ñandejára

hi'ári kuéra omondo vaekue.

Israelgua katu

iñembyahýi sapy'ami rire,

tembi'u héva ho'u.

4Ha ho'a vaerãgui

umi oporojopy vaekue ári

jeiko asy ikatu'ỹva ojejoko,

Israelgua kuéra ohecha haguã

Mba'éichapa oñembohasa asy

umi hese kuéra ija'e'ỹvape.

Tuku ha mbói vrónse guigua

5Ou ramo guare

umi ne retãgua ári

tymba ñarõ oporomondýiva

ha mbói juru rãimbe

oporojukapáva,

na nde pochýi vaekue

hendive kuéra omanomba peve.

6Remondýinte chupe kuéra

ojehecha kuaa haguã,

ha peteĩ mbói ra'ãngápe

rehechauka chupe kuéra

ikatuha osẽ jejopy vaígui,

imandu'ávo

opa ne rembiapoukapýre.

7Ha umi ojeréva

upe mbói ra'ãnga gotyo

osẽ jejopy vaígui,

ndaha'éi ohechágui upéva

nde rupínte, renohẽva

jejopýgui opavavépe.

8Péicha rehechauka,

ore rehe ija'e'ỹvape,

ndenteha pe oporope'áva

opaite mba'e vaígui.

9Ha'e kuéra omanomba

tuku ha mberu su'ukuégui,

ha ndaikatúi ojejuhu pohã

hekove kuérape guarã,

tekotevẽgui voínte ha'e kuéra

umi tymba jurúpe oñenupã.

10Ha ne retãguáre katu,

mbói rãimbore jepe ndaipu'akái,

nde poriahurereko osẽ hapépe,

ha oipohano chupe kuéra.

11Ha ojesu'u ramo jepe

pya'e okuera

imandu'a haguã ne ñe'ẽre,

ani oity tesaráipe

ha oñemomombyry hikuái

ne rembiapo porãitágui.

12Nomonguerái chupe kuéra

pohã ñana térã jepichýpe.

Ne ñe'ẽnte, Ñandejára,

ku opa mba'e oipohanóva.

13Rerekógui nde pópe

jeikove ha ñemano,

reporomboguejy yvykuápe

térã upégui reporohupi.

14Yvypóra heko añágui,

ikatu oporojuka,

ha ndaikatu véima

oporomoingove jey

ha oporoguenohẽ Yvykuágui.

Amandáu ha Maná

15Avave ndaikatúi osẽ

nde poguýgui.

16Umi ipy'a hatãva

ha na nde kuaaséi vaekuépe,

nde pokatúpe reinupã.

Remongy hi'ári kuéra

ama oñeha'arõ'ỹva,

yvytu ratã ha amandáu,

amarayvi opave'ỹva,

ha tatápe ikusugue.

17Ha pe mba'e tuichavéva,

oky okyvérõ jepe,

tuichaichave ojepota tata.

Opa ne rembiapokue voi niko

omo'ã heko jojávape.

18Sapy'ánte pe tata

ha'ete ku ogue nungáva,

ani haguã oñehundi

umi tymba oñemboúva,

heko porã'ỹva ári,

ha ikatu haguã, ohechávo,

oñandu hi'ári kuéra

Ñandejára pokatu.

19Ojehecha ave ku y mbytépe

pe tata hendy guasuvérõ,

ohundi haguã umi kóga

tetã aña remitỹngue.

20Ne retã guápe katu

reme'ẽ ho'a haguã

umi ne rembijokuái rembi'u,

ho'úntema haguã hikuái

omba'apo'ỹre hese,

ha héva opaichaguápe.

21Pe hi'upy ne porãva

reme'ẽva chupe kuéra

ohechauka mba'eichaitépa

rembojerovia ne retã guápe.

Ho'úvapente iporã

ha upéva upe tembi'úgui

ho'usetévante oiko.

22Y ratã

ha y rypy'áicha ramo jepe

ndahykúi upe tatápe.

Péicha ohecha kuaa hikuái

umi hese kuéra ija'e'ỹva

remitỹngue añónte ohundiha

upe tata,

amandáu apytépe

ha ama guasu guýpe

hendýva.

23Ha upéva upe tata

imbaretégui ikangy

ani haguã opyta

hembi'urã'ỹre heko jojáva.

24Ne rembiapokue niko

oĩ reiporu haguã

ijapoharégui nde.

Ipohýi oinupã haguã

umi heko joja'ỹvape,

ha ivevýi omoĩ porã haguã

umi nde reroviahápe.

25Upéicha rupi avei

upe ramo upe tata

omoirũ ne mba'e porã

opavave omongarúva,

oiko haguã umi ndéve

ojeruréva rembipota.

26Ha péicha oikuaa haguã

ne retãgua rehayhuetéva,

ndaha'eiha oimeraẽva mba'e

omohyguãtãva yvypórape,

ne ñe'ẽnteha, ore Jára,

pe omombaretéva

opa nde reroviahápe.

27Upe tata ndohapýi vaekue,

kuarahy raku vevýipe hyku,

28ojekuaa porã haguã

tekotevẽha ojepáy

kuarahy osẽ mboyve

reñemomba'e guasu haguã,

ha ojejuhu ne ndive

ko'ẽtĩ soro jave.

29Tekove rechakuaa'ỹ katu

hembipota oha'arõva

y rypy'a ro'y peguáicha,

hykúva ha upéi osyrypa

y reíva ramo guáicha.