Eclesiástico 20 - Biblia Guaraní con Deuterocanónicos

Itavýva ha iñarandúva

1Oĩ oporoja'óva hendape'ỹ,

ha oĩ okirirĩva

oiko kuaágui.

2Iporãve reporoja'o,

repyta rangue pochýpe,

3Ohecha kuaáva

hembiapo vaikue,

oipe'a ijehegui

heta mba'e vai.

4Omoĩséva teko joja

mbaretépe,

ojogua naha'ỹiva

oipyhyséva mitã kuñáme.

5Oĩ ikirirĩgui

oñemo'ãva iñaranduha,

ha oĩ iñe'ẽngatúgui

ndojehayhúiva.

6Oĩ okirirĩva

ndoikuaáigui he'i vaerã,

ha oĩ okirirĩva oikuaágui

araka'épa oñe'ẽta.

7Iñarandúva okirirĩ,

ndo'a porã mo'ãirõ

upe he'iséva,

ha itavyraíva katu

noha'arõ kuaái.

8Oñe'ẽ etereíva

avavépe ndo'a porãi,

ha pe ha'enteséva

ndojehayhúi.

9Sapy'ánte mba'e vaígui

amo ipahápe osẽ iporãva.

Sapy'ánte katu mba'e porãgui

osẽ ivaíva.

10Sapy'ánte reme'ẽ

ha noñemyengoviái ndéve

sapy'ánte katu

oñemyengovia jo'a.

11Oĩ jererohory opa vaíva

ha oĩ ojeapo'ihágui,

oñakã rapu'ãva.

12Oĩ ojogua hetáva

hepy'ỹre,

ha upéi osẽ chupe

hepy eteve.

13Iñe'ẽre ojehayhuka

iñarandúva,

itavyraíva katu

oñe'ẽ heta rei.

14Itavyraíva ne mbojopóirõ,

ndou porã mo'ãi ndéve,

oha'arõgui hetaiteve.

15Sa'imi ome'ẽ ha

hetárõ guáicha ohekýi,

tuicha ojejuru pe'a

ha opa rupi omyerakuã.

Ko'ágã oiporukáva,

ojerure jeýma ko'ẽrõ.

Ajépa ijare ko tapicha!

16Itavyraíva he'i:

“Ndarekói che irũ tee.

Ndaipóri ohecha kuaáva chéve

che mba'e porã.

17Okaru che ndive

oñe'ẽ vai che rehe.

Heta oĩ

oñembohory py'ỹiva che rehe.”

18Iporãve nde pyho,

ne ñe'ẽ avy rangue.

Péicha, heko añáva

ho'a sapy'aitépe.

19Tekove ay niko ojogua

mba'e hendape'ỹ

oñemombe'úva,

ivýrova jurúgui

osẽ mantéva.

20Ñe'ẽnga ndo'ái

itavýva jurúpe,

araka'eve nde'íri

he'i haguãicha.

21Oĩ ndojapóiva ivaíva

imboriahúgui,

ha opytu'u jave ndojepy'apýi.

22Oĩ oñehundíva hi'otĩgui,

ha ojepy'apy itavýva he'ívare.

23Oĩ hi'otĩgui

ome'ẽva iñe'ẽ iñirũ teépe,

ha tekotevẽ'ỹre

ojapo chugui ija'e'ỹha.

24Ñemotĩ upe japu

yvypórape guarã

ha itavýva jurúpe henyhẽ.

25Pe imondáva

iporãve ijapúvagui,

mokõivéva jepe oñehundíta.

26Ojepokuaáva japúre

oiko ijaheipýrõ

ha otĩhárente voi oikóva.

27Iñe'ẽre iñarandúva

herakuã

ha iñakã guapýva ombovy'a

poguasu kuérape.

28Oñemitỹva omyenyhẽta

ikóga ñongatuha,

ha ojehayhukáva poguasúpe,

umíva oheja reíta chupe

hembiapo vaikue.

29Jopói ha mba'e me'ẽ

ohesamboty iñarandúvape,

ha ojuru mboty ani haguã

oporoja'o.

30Arandu kañy

ha pláta yvyguy

avavépe ndou porãi.

31Iporãve upe omokañýva

itavykue,

upe iñarandukue omokãnývagui.