Eclesiástico 37 - Biblia Guaraní con Deuterocanónicos

Irũ tee gua'u

1Heta oĩ he'íva:

“Che hína ne irũ tee”.

Oĩ jepe avei irũ gua'u,

héranteva upéicha.

2Ajépa ñambyasy eténe

peteĩ ñane irũ teégui

oikórõ ñande rehe ija'e'ỹva!

3Ha, pokarẽ!

Mamógui piko resẽ ra'e

remyenyhẽ haguã ko yvy

japúgui?

4Oĩ ovy'áva

iñirũ teépe ho'a porãrõ,

ha chupe ho'a vaírõ

oñemoĩ hese.

5Oĩ ombyasýva iñirũ teépe

okaru porãgui hendive,

ha ho'a vai ramo chupe

oñemomombyry.

6Ani nde resarái

ne irũ teégui,

ha ne mandu'áke

hese rereko ramo viru.

7Oñemoñe'ẽva guive

ohechauka tape porã,

oĩ jepe avei upéva ojapóva

ou porã haguã chupénte.

8Ejerereko oñemoñe'ẽvagui,

eikuaa raẽ mba'épa oikotevẽ.

Ha'e niko oheka

ou porãva chupénte

ha mba'éicha oguenohẽta

upégui imba'erãva.

9He'íne ndéve:

“Upe rupi reho porãta”,

ha mombyry guive oma'ẽ

mba'éichapa reñehundi.

10Ani rerovia

nde apo'íva ñe'ẽ,

ha oipota'ỹvape

ho'a porã ndéve

ani remombe'u rejaposéva.

11Ani rerovia he'íva kuña

oñe'ẽrõ iñemoĩháre,

térã ipy'a mirĩva

ñorãirõre,

térã oñemúva mba'e ñemúre,

térã imba'e potáva

jehepyme'ẽre,

térã ipojopýva pojeráre,

térã iñate'ỹva rembiapóre,

térã kokuépe omba'apóva

ñemono'õre,

térã tembiguái reko rei

rembiaporãre.

Ani rerovia mba'eve he'íva

ha'e kuéra.

12Erovia uvei upe he'íva

Ñandejárape ombyajéva,

reikuaáva ojapoha

hembiapoukapy,

oñandúva

nde reñanduháicha,

ha reñepysãngárõ

ha'e ne mopu'ãta.

13Ejapysaka avei

upe nde py'apy he'ívare,

jeroviahave chugui niko

ndaipóri.

14Ñande py'apýko ohecha

mombyryve

heta ma'ẽ mombyryháragui

oguapy yvatéva

omba'e recha haguã.

15Ha upéi ejerure asy

upe Yvatete guápe

ne mboguata haguã

añetegua rapére.

Arandu añetegua

16Ñamba'apo mboyve

jajepy'a mongeta vaerã.

17Py'a mongeta rapo

oĩ ñane ñe'ãme

ha chugui osẽ irundy hakã:

18ivaíva, iporãva,

jeikove ha ñemano,

upe opavavére ipu'akáva katu

ñane kũ.

19Oĩ ikatupyrýva

oporoheko mbo'e haguã

ha ipitua ijupe guarã.

20Ha oĩ oñemoaranduséva

ha noñehenduséiva oñe'ẽrõ,

umíva opyta oguereko'ỹre

ho'u vaerã.

22Oĩ iñarandúva

ijupe guarãnte,

ha imba'e kuaa

ha'e kuérante oiporu.

23Oĩ hetã guápe guarã

iñarandúva,

ha imba'e kuaa oiporu opavave.

24Ijupe guarã iñarandúva

ovy'a,

chupe oikuaáva oguerohory.

25Yvypóra rekove ojepapáma,

Israel rekove katu ndaipahái.

26Iñarandúva

hetãgua apytépe,

ojererohorýta,

ha herakuãta opa ára.

Jejoko kuaa

27Che ra'y, ne resãi aja

eñemomba'e nde juruhére,

ha upe ne mbyai vaerã

ani re'u.

28Na opa mba'éi niko

ou porã opavavépe

ha nda opavavéi ho'use

peteĩchagua tembi'u.

29Ani repo voi

pe re'usévare,

térã reñeme'ẽmbaite

upe hevévape.

30Cháke tembi'u hépe

okañy pe mba'asy,

karu heta katu

ogueru tye rasy.

31Karu vai hetápe ojuka,

ojejokóva katu oikove puku.