Tobit 7 - Biblia Guaraní con Deuterocanónicos

Tobías ha Rafael Oguahẽ Raguel rógape

1Oguahẽ vove Ecbatánape, Tobías he'i Tupã remimboúpe:

—Che irũ Azarías, ko'agãite voi aipota che reraha Raguel rógape, ha'e ore pehẽngue hína.

Ha Tupã remimbou ogueraha chupe Raguel rógape. Ojuhu chupe oguapy hína ikorapýpe, hokẽ ykére. Oñemboja ha omomaitei chupe hikuái, ha ha'e avei chupe kuéra he'ívo:

—Maiteípa che irũ nguéra. Peguahẽke!

Ha ombohasa chupe kuéra hóga ryepýpe.

2Upéi he'i hembireko Édnape:

—Ojoguaite piko ko karia'y che pehẽngue Tobítpe!

3Edna oporandu chupe kuéra:

—Moõgua piko peẽ?

Ha'e kuéra he'i:

—Ore Neftalí ñemoñaregua hína, rojereraha vaekue ore yvýgui roiko haguã Nínivepe.

4Ha'e oporandu chupe kuéra:

—Peikuaa piko peẽ Tobítpe?

—Hẽe, roikuaa chupe, —he'i hikuái.

5Ha oporandu ha'e:

—Oĩ porã piko ha'e?

—Oikove ha oĩ porã, —he'i hikuái.

Ha Tobías ombojoapy:

—Tobit niko che ru.

6Raguel opo opu'ã, oñañuã chupe ha hasẽ.

7Upéi he'i chupe:

—Tupã ta nde rovasa che ra'y! Nde ru niko kuimba'ete hína. Ñambyasy niko kuimba'e marangatu ha imba'e porãva ha'eichagua ndohechaveiha.

Ha tasẽme oñañuã jey-jey Tobíaspe.

8Hembireko Edna, ha imemby Sara, hasẽ avei.

9Vy'a pópe Raguel omoguahẽ chupe kuéra ha upéi ojukauka peteĩ ovecha.

Ñomongeta menda rehegua

Ojahu hikuái, upéi ojepohéi jey ha oguapy mesápe. Tobías upéma ramo he'i Rafaélpe:

—Che irũ Azarías, eréna Raguélpe ome'ẽ haguã chéve Sárape.

10Raguel ohendu upe karia'ýpe ha he'i chupe:

—Vy'ápe kena ehasa ko pyhare, ekaru ha emboy'u. Ndaipóri niko avave omenda vaerã che rajy Sara rehe, nde añoite. Ndaikatúi ame'ẽ ambuépe, ndéve mante, nde ha'égui che pehẽngue hi'aguĩvéva. Ágã katu, ha'émante vaerã ndéve añetegua.

11Nde mboyve ame'ẽma vaekue 7 kuimba'e ñande reheguávape, ha opavave omano pe pyhare, oñemoaguĩta vove hese. Ko'ágã che ra'y, ekaru ha emboy'u, Ñandejára rehe ae osẽ porãmbáta peẽme.

Tobías katu he'i:

—Che nda'u mo'ãi mba'eve reme'ẽ meve chéve Sara.

Raguel he'i chupe:

—Néi, oĩ porã. Moisés kuatia ñe'ẽme oĩháicha ha Tupã oipotágui ame'ẽ ndéve Sara,Gn 24.50-51; Nm 36.6-9. nde reheguáva. Ko'ágã guive nde ha'éta iména ha ha'e ne rembireko opa ára peve. Che ra'y, Ñandejára yvága pegua toĩ pene ndive ko pyhare, ohechaukávo peẽme imborayhu.

12Raguel ohenói itajýra Sárape. Oguahẽ vove, itúva ojapyhy ipógui ha ome'ẽ Tobíaspe, he'ívo:

—Ame'ẽ ndéve ne rembirekorã, oĩháicha Moisés kuatiápe. Eraha ne ndive nde ru ha nde sy rógape. Tupã, Ñandejára, tome'ẽ peẽme vy'a ha tory.

13Upéma ramo Raguel ohenói hembirekópe, ha ojerure chupe peteĩ kuatia, ohaihápe ome'ẽha itajýra Tobías rembirekorã, oĩháicha Moisés kuatiápe.

14Upe rire ae Tobías okaru.

15Raguel ohenói hembireko Édnape, ha he'i:

—Embosako'i ambue koty ha eraha upépe Sara.

16Ha'e oho ha ombosako'i ambue koty, he'iháicha chupe iména, ha ogueraha upépe imemby kuña. Ha hasẽ hese. Upéi omokã hesay ha he'i:

17—Ejerovia, che memby. Tupã, Ñandejára, tome'ẽ ndéve tory, vy'a, mba'e mbyasy rangue. Ejeroviákena, che memby!

He'ipávo ko'ã mba'e osẽ upe kotýgui.