Tobit 9 - Biblia Guaraní con Deuterocanónicos

Rafael, Tupã remimbou, oho viru rekávo

1Upéi Tobías ohenói Rafaélpe, ha he'i chupe:

2“Che irũ Azarías, tereho Raguéspe, Gabael rógape, irundy tembiguái ha mokõi kaméllo reheve.

3Eme'ẽ chupe pe kuatia jarúva ha tome'ẽ ndéve pe pira pire. Eru avei Gabaélpe vy'a guasu ñemenda reheguápe.

4Nde reikuaa porã che ru oipapaha hína umi ára ñaĩha ko'a rupi. Ha ñande areve ramo peteĩ árante jepe, ha'e ojepy'apýta.

5Ha rehecháma niko Raguel ndoipotaiha aha. Ndaikatúi ajapo mba'eve.”

Rafael oho Raguéspe, tetã Médiape, ha ogueraha umi irundy tembiguaiha mokõi kaméllo. Oguahẽ Gabael rógape ha opyta upépe. Rafael ome'ẽ chupe pe kuatia ogueraháva ha omombe'u chupe Tobías, Tobit ra'y, omenda hague ha oipotaha oho pe vy'a guasu ñemenda reheguápe. Pya'e Gabael oñepyrũ oipapa umi pláta vosa, oñeñapytĩva gueteri hína ndojepokói haguére hese. Upéi omoĩ umi kaméllo ári.

6Pe ára ambuépe, ko'ẽ mboyve oipykúi hikuái tape, ha oho pe ñemendahápe.

Oguahẽvo Raguel rógape, ojuhu Tobíaspe oguapy hína mesápe. Ha'e opu'ã ha omomaitei Gabaélpe. Ha'e hasẽ ha ohovasa chupe he'ívo: “Ndéko mitã poravo pyre, ha nde ru katu kuimba'e ijohéi pyre, imarangatu ha imba'e porãva. Ñandejára ta pende rovasa amo yvatégui ndéve ha ne rembirekópe, nde rúpe, ha ne rembireko ru ha isýpe avei. Toñemomba'e guasu Tupã oheja haguére che rohecha, ha ndéve rohechávo niko ku ahechárõ guáicha che prímo Tobítpe.”