1 Macabeos 16 - Biblia Guaraní con Deuterocanónicos

Simón ra'y kuéra ohundi Cendebéope

1Juan oho Guézergui ha omombe'u itúva Simónpe mba'épa ojapo oikóvo Cendebeo.

2Simón ohenói mokõive ta'ýra tuichavévape, Judas ha Juan, ha he'i chupe kuéra: “Che pehẽngue kuéra ha che ha opa che ru rogagua roñorãirõ vaekue umi Israel rehe ija'e'ỹvare, ore mitãrusu guive kóva ko ára peve, ha hetave jey roguenohẽ Israélpe ojejopyhágui.

3Che, ko'ágã, che tujáma, peẽ katu, Ñandejára poriahurereko rupi, pene resãi ha pene mbarete. Pepyta che ha che pehẽngue rendaguépe, ha pesẽ peñorãirõ ñane retãre. Tupã ta pene pytyvõ!”

4Simón oiporavo 20.000 ñorãirõhára yvy rupigua ha kavaju arigua, ha osẽ hikuái ondyrývo Cendebeo rehe. Pyhare ohasa rire Modínpe,

5opu'ã hikuái pyharevete ha ñu gotyo. Upépe osẽ chupe kuéra peteĩ ñorãirõhára aty, yvy rupi ha kavaju arigua, nde tuicháva. Peteĩ ysyry oĩ mokõive ñorãirõhára aty pa'ũme.

6Juan ha iñorãirõhára kuéra oñemohenda umi hese kuéra ija'e'ỹva renondépe; ha ohechávo iñorãirõhára kuéra okyhyjeha ohasa haguã upe ysyry, ha'e raẽvete ohasa. Ohechávo chupe, iñirũ nguéra ohopa hapykuéri.

7Ohechágui pe Cendebeo kavaju arigua kuéra heta eteiha, Juan ojapo mokõi pe iñorãirõhára aty yvy rupiguágui ha omoĩ mbytépe kavaju arigua.

8Ipu trompéta kuéra, oñeñorãirõ ha Cendebeo opyta yvýre, heta omano hikuái ha umi opytáva okañymba táva mbaretépe.

9Ko ñorãirõme, Judas ojekutu; Juan katu osẽ omuña umi ohopa reívape, ha oguahẽ Cedrónpe, Cendebeo omyatyrõ vaekue.

10Umi Israel guáre ija'e'ỹva okañymba avei hikuái umi óga yvate mbarete oĩvape Azoto ñu gotyo. Juan katu omboja tata upe táva guasúre. Omano hikuái 2.000 rupi, ha Juan ojevy Judéape hesãi guasu ha mba'eve ndojehúi chupe.

Simónpe ojejuka ikupe guio

11Toloméo, Abub ra'y, oñemoĩ ra'e Jericó ñu pegua ñorãirõhára kuéra ruvicha ramo. Heta oguereko óro ha pláta,

12ha'e niko pa'i ruvicha guasu rajy ména.

13Imba'epota eterei rupi oñemomba'ese tetãre. Aipórõ, omba'apo ñemi ojuka haguã Simón ha ita'ýra kuérape.

14Simón oiko oguata hikóni táva guasu kuéra tetã meguáre, ohecha mba'épa oñekotevẽ, ha oguahẽ Jericópe, ita'ýra kuéra Matatías ha Judas ndive, mes hérava Sebat ramo, 177 añohápe.

15Abub ra'y omoguahẽ chupe kuéra tova mokõime, táva mbarete Dócpe, ha'e omyatyrõ vaekue, ha upépe ojapo hérape peteĩ karu guasu. Ha oguereko ra'e upépe okañýva,

16ha Simón ha ita'ýra kuéra heta omboy'u rire, Toloméo ha iñirũ nguéra ohekýi kyse puku ha oike pe karu guasuhápe. Ojeity hikuái Simón rehe ha ojuka chupe, mokõive ita'ýrape ha oĩva hembiguáipe.

17Tuichaite mba'e vai ojapo Toloméo, ombyekovia iporãva ivaívape.

18Toloméo ojapo peteĩ kuatia ha oguerahauka mburuvicha guasúpe, ojerurévo ogueruka haguã ñorãirõhára oipytyvõ vaerã chupe ha omoĩ haguã chupe umi táva guasu ha tetã tuichakuére mburuvicha ramo.

19Omondo avei Guézerpe, Juánpe ojuka vaerã ha oguerahauka kuatia umi ñorãirõhára ruvicha kuérape, ojerurévo ojoaju haguã hese ha he'ívo ome'ẽtaha chupe kuéra heta óro, pláta ha heta jopói.

20Heta ambuépe katu omondo omoĩ haguã ipópe kuéra Jerusalén ha ijyvateha oĩhápe tupao.

21Upéicha ramo jepe, oime oñemotenonde vaekue ha Guézerpe omombe'u Juánpe itúva ha ipehẽngue kuéra ojejukapa hague, ha Toloméo omondo hague avei Juan Jukaharã.

22Ohendúvo upéva, Juan ipochy eterei. Omyesakã ñuhã oñemoĩva chupe ha ojukapa umi oho vaekue ijukávo.

23Opa oñemombe'u vaekue Juan rehegua, umi ñorãirõ ha imombe'upyrã ojapóva, mba'éichapa omopu'ã jey Jerusalén korapy yvate kuéra, ha hetave mba'e,

24oimemba tupao kuatiápe, ára opyta hague guive itúva rekovia, pa'i ruvicha guasúrõ.