Tobit 11 - Biblia Guaraní con Deuterocanónicos

Tobías oguahẽ hógape

1Oguahẽvo táva Caserín ypy rupi, opytáva Nínive rovái,

2Rafael he'i Tobíaspe:

—Nde reikuaa Mba'éichapa jaheja vaekue nde rúpe.

3Ñañemotenondéna ñambosako'i haguã nde róga, oguahẽ mboyve ne rembireko ha umi hendive oúva.

4Ha oho hikuái oñondive. Rafael he'i avei Tobíaspe oguerekóma haguã ipópe pe irokue oguenohẽ vaekue pirágui. Tobías rymba jagua oho hapykuéri kuéra.

5Upe aja Ana oguapy hína okápe ha omaña pe tapére ou vaerãha rupi imemby.

6Peichaháguinte oñandu kuaa vaicha imemby ouha, ha he'i Tobítpe:

—Ou hína nde ra'y iñirũ ndive.

7Oguahẽ mboyve pe ógape, Rafael he'i Tobíaspe:

—Aikuaa porã nde ru ohecha jeytaha.

8Emona ágã hesáre pe irokue. Upéva ko pohã hína, ha omoñyñýi ha oitýta pe morotĩngue oĩva hesáre. Péicha nde ru ohecha jeýta ára resa.

9Ana osẽ imemby ruguãitĩvo, oñañuãvo chupe he'i:

—Ko'ágã ikatúntema amano, rohecha jeýma niko che memby.

Ha oñepyrũ hasẽ.

Tobit okuera

10Tobit opu'ã ha ñepysãnga-sãngápe osẽ pe okẽ rupi oĩva korapy gotyo. Tobías ou hendápe,

11pe irokue ipópe. Oipeju itúva resápe ha ojokóvo chupe he'i:

—Néike taita.

Upéi omona hesáre pe pohã ha oipichy,

12ha mokõivéva ipópe oipe'a heságui pe morotĩngue oguerekóva.Hch 9.18.

13Upépe itúva hasẽ, oñañuã chupe ha he'i:

—Rohecha che ra'y, ndéko hína umi che resa rembovy'áva.

14Ha upéi he'i:

Toñemomba'e guasu Tupã.

Toñemomba'e guasu

héra tuichaite.

Toñemomba'e guasu mayma

Tupã remimbou marangatu.

Tupã réra tuichaite

ta ñane mo'ã opavavépe.

Toñemomba'e guasu

Tupã remimbou kuéra opa ára.

15Tupã niko

che nupã vaekue,

ha upéi katu

che poriahurereko,

ha ko'ágã ikatu ahecha

che ra'y Tobíaspe.

Tobías oike hógape tory ha vy'a pópe, ha sapukaihápe omomba'e guasu Tupãme. Upéi omombe'u itúvape osẽ porã hague opa mba'épe ha ogueruha pe pláta. Omombe'u avei chupe omenda hague Raguel rajy, Sara rehe, oguahẽmava oúvo Nínivepe upe jave.

16Tobit vy'a pópe omomba'e guasu Tupãme ha osẽ táva rokẽme ohuguãitĩ haguã Tobías rembirekópe. Umi Ninivegua opyta ijurujái ohechávo Tobítpe oguatavaha ohóvo avave ogueraha'ỹre chupe ipógui. Ha opavavépe he'i Tupã oiporiahurereko hague chupe ha upévare ohecha jeyha.

17Upéi oñemboja Sara, ta'ýra rembireko rendápe ha he'i chupe:

—Eguahẽ porãitéke che rajy. Toñemomba'e guasu Tupã nde reru haguére ore apytépe. Tupã tohovasa nde rúpe, che ra'y Tobíaspe ha ndéve che rajy. Eguahẽ porãite nde rógape ha evy'a.

18Upe árape tuicha ovy'a Judea guáva oikóva Nínivepe,

19ha Ajicar ha Nadab, Tobit sovríno kuéra, oho oguerohory chupe.