Judit 8 - Biblia Guaraní con Deuterocanónicos

Judit

1Opa ko'ã mba'e oikóva Oguahẽ Judit apysápe. Judit, Merarí rajy vaekue; Merarí, Uz ra'y; Uz, José ra'y; José, Uziel ra'y; Uziel, Elcías ra'y; Elcías, Ananías ra'y; Ananías, Gedeón ra'y; Gedeón, Rafaín ra'y; Rafáin, Ahitub ra'y; Ahitub, Elías ra'y; Elías, Hilquías ra'y; Hilquías, Eliab ra'y; Eliab, Natanael ra'y; Natanael, Selumiel ra'y; Selumiel, Surisadai ra'y; Israel ñemoñaréva.

2Judit ména, hérava Manasés, ha'e avei hesegua kuéra. Ha'e omano vaekue seváda oñemono'õ jave hikóni.

3Péicha ojehu chupe, ha'e omyakã jave umi mba'apohára kuérape. Kuarahy aku ombohasy ha oity chupe tupápe, ha omano Betulíape. Upepegua voi ha'e. Oñeñotỹ ijypy kuerakue ykére, pe ñúme oĩva Dotán ha Ibleam pa'ũme.

4Ojapóma 3 áño ha 4 mes omano hague Judit ména, ha ha'e oiko hógape.

5Upe hóga ári ojapouka peteĩ oiko haguã. Ha oñemonde ao vosakuépe ombohasa haguã iñembyasay.

6Opyta guive mena'ỹre, ndo'úiva mba'eve, pytu'uha ára mboyve ha pytu'uha árape; térã jasy pyahu mboyve térã jasy pyahu árape; térã arete guasu jave Israelgua kuérape guarã.

7Kuña neporãva vaekue ha'e. Iména Manasés oheja vaekue chupe óro ha pláta, tembiguái, tymba ha yvy, ha ha'e opyta ijára ramo.

8Ha'e omomba'éva Tupãme ha avave ndoguerekói mba'eve he'i vaerã hese.

Judit ha myakãhára*f** kuéra

9Judit ohendu umi mba'e oje'e vaekue Ozíaspe, opávo chugui kuéra y. Ohendu avei Ozías he'i hague omoĩtaha upe táva Asírio kuéra pópe, ohasa rire 5 ára.

10Ohenoika hembiguái ijeroviahápe ha he'i chupe oho haguã Cabris ha Carmis rekávo, ha'e kuéra hína myakãhára upe távape,

11ha Oguahẽvo ko'ãva, he'i chupe kuéra:

—Pe che rendumi, peẽ Betulia ruvicha. Naiporãi upe mba'e peje vaekue ko árape maymáva rovake. Naiporãi avei Tupã rérape peje ramo pemoĩtaha ko táva Asírio kuéra pópe ohasávo umi ára, ha Tupã ndoúi ramo ñane renohẽ jejopy vaígui.

12Ipahápe, máva piko peẽ péicha pejerure haguã Tupãme, térã peñemoĩ haguã hendaguépe ore apytépe?Dt 6.16.

13Ko'ágã peẽ peheko ra'ãse Ñandejára ipu'akapávape, kóva he'ise ndapehecha kuaaiha mba'eve!

14Mba'éicha piko peikuaáta Tupãme, ojapo vaekue opa mba'e? Mba'éicha piko peikuaáta umi mba'e ha'e oikuaáva ha pehecha kuaáta hembipota?Sab 9.13; Ro 11.33. Peẽ niko ndapeikuaái upe oĩva yvypóra py'apýpe térã umi mba'e iñakãme oguerekóva. Anína che ryvy kuéra ñambopochy Tupã, Ñandejárape!

15Ha'e na ñane pytyvõséi ramo ko'ã árape, ipópe oĩ, ñane pytyvõ haguã ñane pytyvõse vove, térã ñane rundi haguã ñande rayhu'ỹva renondépe.

16Ani pejerure Tupã Ñandejárape oikuaauka haguã peẽme upe ha'e ojapótava. Ha'e niko ndaha'éi ñandeichagua: ndoguevíri oĩ ramo oñemoĩva hese.

17Ágã katu, jajerure chupe ñane pytyvõ haguã, jaikuaáguima hína ñande pe'ataha jejopy vaígui ha'e upéicha oipota ramo.

18“Ko'ã árape niko ndaipóri ñande apytépe, ñande rogagua, ñane pehẽngue kuéra térã ñande táva kuéra rupi, avave omomba'e guasúva, yma guaréicha, ta'ãnga ojejapo vaekue.

19Upévare ñande ru kuéra ypykue ojejuka vaekue kyse pukúpe, oñemonda, ha ho'a umi hese ija'e'ỹva pópe.Sal 78.56-64.

20Ñande ndajarekói ambue tupã ndaha'éiva Tupã Ñandejára, upévare jajerovia vaerã nomaña vai mo'ãiha ñande rehe térã ñande reheguáre.

21Ja'a ramo ipópe kuéra, Judea yvy ho'apáta avei, ñande tupao oñemondapáta, ha Tupã ñande jukáta upévare.

22Ñane retãgua omano hague, oñemosẽ ha ojereraha hague tembiguái ramo ho'apáta ñande ári mamo ñaimeha rupi. Umi ñande rerekóva ipo guýpe opuka ha oñembohorýta ñande rehe.

23Tembiguái ramo jaiko aja na ñande recha kuaa mo'ãi umi ñande ári oĩva, ha Tupã Ñandejára ñande rejáta ñañemotĩ.

24Upévare, jahechauka ñande rapicha kuérape mba'épa upe jajapo vaerã. Ñande pópe niko oĩ ñane retãgua rekove, ha ñande pópe avei oĩ tupao ha altar.

25Opa ko'ã mba'ére ñamomba'e guasu vaerã Tupã, Ñandejárape, ñande py'a ra'ãva hína ñande ru kuéra ypykuépeicha.

26Pene mandu'áke mba'épa ojapo vaekue Abraham rehe, mba'éichapa oipy'a ra'ã vaekue avei Isaácpe, ha upe ojehu vaekue Jacóbpe Mesopotamia, Siria peguápe, oñangareko ramo itio Labán ovecha kuérare.Gn 22.1-18.

27Ha'e na ñande py'a ra'ã pohýiri hese kuéra ojapo haguéicha ha na ñane nupãi ipochýgui ñane ndive. Ñandejára oinupã ramo umi hese ojeroviávape, ojapo oheko mbo'e haguã chupe kuéra.”

28Ozías he'i chupe:

—Añete upe eréva. Avave ndaikatúi he'i ndéve ndaupeichaiha.

29Ha ndaha'éi ko'ágã ramo rehechaukáva hína ne mba'e kuaa. Ne michĩ ete guive, opavave oikuaa ne akã guapyha, ha ndeha kuña arandu.

30Ko'ágã katu opavave omano yuhéigui ha upévare rojapo ha'e kuéra oipotaháicha. Rome'ẽma niko ore ñe'ẽ, ha ndaikatu véima roguevi.

31Nde niko kuña marangatu. Ejeruréna Ñandejárape ore rehe, tomongy ha tahenyhẽ umi ñande y ryru. Upéicha mante na ñane kangy mo'ã véima.

32Judit he'i chupe kuéra:

—Pe che rendumi. Ajapóta mba'e opyta'ỹtava tesaráipe ñane retãme.

33Ko pyharépe peñemohendáta upe táva rokẽme. Che asẽta che rembiguái ndive, Oguahẽ mboyve upe ára peẽ peñeme'ẽtaha, che rupi Ñandejára oguenohẽta jejopy vaígui Israel guápe.

34Ani peporandu mba'épa ajapóta. Nda'e mo'ãi peẽme mba'eve ajapopa peve.

35Ozías ha umi myakãhára he'i chupe:

—Tereho py'a guapýpe. Tupã Ñandejára toho ne renonderã ha toinupã umi ñande rayhu'ỹvape.

36Ha osẽ rire Judit rógagui, oho jey oñemohenda haguépe hikuái.