Eclesiástico 26 - Biblia Guaraní con Deuterocanónicos

Ñe'ẽnga

1Ovy'aite vaerãpa omendáva

kuña imba'e porãvare!

Ha'e oikove pukúta.

2Kuña imba'e rechakuaáva

ombyetia'e iménape,

ha'e oikóta py'a guapýpe

ipaha peve.

3Ajépa ipo'aite ojuhúva

kuña imba'e porãva!

Upéva ohupyty ombyajéva

Ñandejárape.

4Taha'e mba'eta rerekua,

taha'e mboriahu,

ipy'a rorýta

ha hova retia'e mantéta.

5Oĩ mbohapy mba'e

che mongyhyjéva

ha irundyha che mondýiva:

Tavagua otakýrõ ojuehe,

opu'ãrõ oñoakãre

ha oporomombe'u japúrõ.

Manógui ivaive hína umíva.

6Iménape ambue kuñágui

oguerokyhyjéva,

ha'e teko asy ijojaha'ỹva,

iñe'ẽ, teju ruguái

maymávape ohupytýva.

7Kuña aña

guéi ojejokua kangýva,

rejokosérõ

nde pojáirõ guáicha

kavytãre.

8Kuña ka'u,

jati'i opu potáva,

ndoguerokañy mo'ãi

iñemotĩ.

9Kuña oporomyakã vaíva

omaña hatã ñande rehe,

ima'ẽme ojekuaa

mba'épa oipota.

10Emosã mbyky nde rajy

iñakã hatãsévape,

ani mo'ãnte iguymírõ chupe

ojapo ojapo'ỹ vaerã.

11Ejererekóke kuña

oñembyesa'ívagui,

cháke nde reityse hína

iñuhãme.

12Mombyrýgui ou

ha ijyuhéivaicha,

ojejuru pe'a

ha oimeraẽ ýguinte ho'u,

oñekuã oimeraẽvape

ha oimeháicha guápe

oñeme'ẽ.

13Kuña ijukýva

ombovy'a iménape,

ha iñakã porãva

omokyre'ỹ chupe.

14Ñandejára jopói hína

kuña heko kirirĩva,

ha ojeheko mbo'e porãva

ndaijojahái.

15Kuña ojejapo'ỹva

ijuky jo'a,

ndaipóri ijukyvéva

kuña reko potĩgui.

16Kuarahy omimbiháicha

yvága mbytére,

peichagua hína kuña porã

hogapy potĩme.

17Tataindy ohesapéva

tupaópe, peichagua

hete porãva rova.

18Horkõ óro

pyenda plátape opyrũva,

peichagua tetyma porã

opyrũ hatãva.

Ñeheko mbo'e

19Che ra'y, eñangareko

nde jehe

nde ára yvotýpe,

ha ani reme'ẽ

ne mbaretekue

kuña mombyry guápe.

20Eheka yvy porã

ha eñemitỹ upépe

nde rogagua ijoheipyréva

ojapo haguéicha.

21Upéicha nde ra'y kuéra

ojeroviáta ijypykue

joheipyrére.

22Kuña heko vaíva

oñendyvu haguã hese mante

iporã,

kuña omendáva katu

ojogua óga mbaretépe

ojukáva umi oikesévape.

23Kuña aña oñeme'ẽta

heko añávape,

kuña imba'e porãva katu

umi Ñandejárape

ombyajévape.

24Kuña hova atãva

oiko ijaheipýrõ,

kuña heko potĩva katu

iménagui jepe ojepoyhu.

25Kuña hova atãva

ojeguereko jaguáicha,

kuña heko potĩva

Ñandejárape ombyaje.

26Kuña iménape ombyajéva

ojeguereko iñakã guapývarõ

ha iménare ojahéiva,

kuña añárõ.

Ovy'aite vaerãpa hembireko

imba'e porãva!

Ha'e oikove pukúta.

27Kuña osapukái

ha iñe'ẽngatúva,

trompéta púicha,

ñorãirõrã.

Iména oiko ñorãirõháme

ramo guáicha.

Mba'e ñambyasýva

28Mokõi mba'e oĩ

che mbovy'a'ỹva

ha pe mbohapyha

che mbopire vai:

Ñorãirõhára iñembyahýiva,

arandu ojeapo'íva

ha teko porãgui ohasáva

teko vaípe.

Kóvape Ñandejára

omboykéma jejukarã!

Teko potĩ ha teko ky'a

29Hasyetéma ñemuhárape

noñemongy'ái haguã!

Ojehekáva rembiapo

hasýpe ipotĩne.