1Che ra'y, reikosérõ
Ñandejára rembiguáirõ,
eñembosako'i jehasa asyrã.
2Eñembopy'a hatãke
ha epyrũ hatã,
ha ani rejepy'apy
rejepy'a ra'ãvo.
3Eja Ñandejárare
ha ani rejeítei chugui;
upéicharõ, amo ipahápe,
ou porãne ndéve.
4Ejapyhy porã oúva guive
ha eha'arõ kuaa
rehasa asy heta ramo jepe.
5Tatápe ningo ojekuaa
mba'eichaguápa pe óro,
ha imarangatúva ojekuaa
jehasa asy rata kuápe.
6Ejerovia Tupãre
ha ha'e ne pytyvõta,
eiko hekópe
ha ejerovia hese.
7Peẽ pembyajéva Ñandejárape
peha'arõ iporiahurereko.
Ani pepia tape porãgui,
cháke pe'áne.
8Peẽ pembyajéva Ñandejárape
pejerovia hese,
ha ndapepyta rei mo'ãi.
9Peẽ pembyajéva Ñandejárape
pehupytýta chugui
akã rapu'ã,
vy'a opa'ỹva
ha poriahurereko.
10Pemaña umi yma guarére:
avave ojeroviáva Tupãre
nosẽ vaíri,
avave ombyajéva añetehápe
ndopyta reíri;
opavave hese imandu'ávape
ohendu katuete.
11Ñandejára oporombyasy
ha oporoporiahurereko kuaa,
oheja rei angaipa
ha oporoguenohẽ jejopýgui.
12Tojererekóke
umi ipy'aju ha iñate'ỹva!
Tojererekóke
umi mba'e vai apoha
oikóva tova mokõime!
13Tojererekóke
umi ipy'a kangýva
ha Tupãre ojerovia'ỹva!
Ha'e nomo'ã mo'ãi
chupe kuéra!
14Tojerekóke
umi ndohasa asy kuaáiva!
Mba'épa ojapóta
Ñandejára oipy'a ra'arõ
chupe kuéra!
15Umi ombyajéva
Ñandejárape,
ojapo ha'e he'íva,
ha umi chupe ohayhúva,
ojapo ha'e oipotáva.
16Umi ombyajéva
Ñandejárape,
oñeha'ã ombovy'a chupe,
ha umi chupe ohayhúva
ojapo ipy'aite guive
hembiapoukapy.
17Umi ombyajéva
Ñandejárape,
ipy'a oguereko hendaguãme,
ha oñemomichĩ henondépe.
18Ñañemoĩ
Ñandejára pópe uvei,
yvypóra pópe rangue,
Ñandejára tuichaháicha
tuicha iporiahurereko.
Who We AreWhat We EelieveWhat We Do
2025 by iamachristian.org,Inc All rights reserved.
