Eclesiástico 32 - Biblia Guaraní con Deuterocanónicos

Karu guasu

1Ne moĩ ramo hikuái

remyakã haguã karu guasu

ani rejejapo,

eikokuaa opavave ndive

ha emohenda raẽ peteĩ-teĩme

reguapy mboyve.

2Rejapopa rire

ne rembiaporã

eguapy ne rendápe

revy'a haguã hendive kuéra,

ha rejererohory haguã.

3Nde, nde tujáva,

eñe'ẽ, ho'águi nde rehe,

opáichavo, hekópe porãnte,

rejoko'ỹre purahéi.

4Oñehendu aja,

ani reñe'ẽ puku,

ha ani reñemoaranduse

hendape'ỹ.

5Ita jegua hovy

jeguaka óro rehe,

péicha hína purahéi

karu guasúpe.

6Ita jegua rovyũ

kuãirũ órore oguapýva,

péicha mba'e pu porã

kaguy re'ẽ oñemboy'u jave.

7Ne mitã rusúrõ

eñe'ẽ tekotevẽ javénte,

ha mokõi jevýnte,

ndéve oñeporandúrõ.

8Embyapu'a upe erétava

ha ere heta mba'e

ñe'ẽ mboymíme,

eiko, oikuaávarõ

ha okirirĩnteva.

9Poguasu ndive

ani reñembojojase,

ha oĩrõ oñe'ẽva

ani reñe'ẽ puku.

10Osunu mboyve, overa,

ha iñe'ẽ rory rupi

ojekuaa ojejapo'ỹva.

11Oguahẽvo reho haguã,

ani rembopuku,

tereho pya'e nde rógape

ha ani rejere ápe ha pépe.

12Upépe evy'a ha ejapo

rejaposéva,

anínte nde juru guasu

nde rapicha ndive.

13Ha opa umívare

erohory nde Apoharépe

ne myenyhẽ vaekue

imba'etágui.

Ñandejára, tuicha mba'e

14Ñandejárape ombyajéva

ohayhu hembipota,

umi opu'ã voívape

ha'e ohovasa.

15Tembiapoukapy ohayhúva

pype oñemohyguãtã,

hova mokõiva katu

hese oñepysãnga.

16Ñandejárape ombyajéva

oikuaa heko peguáva,

ha hembiapo porãme

oporohesape.

17Mba'e vai apoha

jeja'o nohenduséi,

ha omohenda Tembiapoukapy

ojapo haguã ojaposéva.

18Oporoheko mbo'éva

ojepy'a mongeta mante,

ha ijuru atãva

ijuru ndojokoséi.

19Rejeheko mbo'e'ỹre

ani rejapo mba'eve,

ha nerembyasy mo'ãi.

20Itaty rupi ani reiko

ha nereñepysãnga mo'ãi.

21Tape reikuaa'ỹvape

ani reike,

22ha nde ra'y kuéragui jepe

eñeñangareko.

23Opa rejapóvape

ema'ẽ nde jehe,

upéicha aveíko rejapo hína

Ñandejára rembiapoukapy.

24Ojeroviáva

Ñandejára rembiapoukapýre

ojapo ha'e he'íva,

ha Ñandejárare ojeroviávape

ndojehúi chéne mba'eve.