Números 33 - Biblia Guaraní con Deuterocanónicos

Egíptogui Moábpe

1Ko'ápe oñemoĩ mba'éichapa héra umi opyta hague rupi Israel ñemoñare osẽ rire Egíptogui, aty-atýpe umi ñemoñare ojuehegua, omyakãvo chupe kuéra Moisés ha Aarón.

2Ñandejára he'i haguéicha chupe, Moisés omoĩ vaekue ohóvo kuatiáre umi ojepyta hague réra.

3Israel ñemoñare osẽ távagui hérava Ramsés, ára 15, mes peteĩháme, hérava Nisán, pe ára Páskua riregua. Osẽ hikuái torypápe opa Egiptogua rovake,

4ha'e kuéra oñotỹ aja ita'ýra kuéra ypykue Ñandejára ojuka vaekue. Ñandejára ojapóvo upéva, ohechauka chupe kuéra ha'e imbareteveha itupã nguéragui.

5Israel ñemoñare osẽ Ramsésgui ha opyta pe távape hérava Sucot.

6Pégui osẽ ha opyta hikuái távape hérava Etam, yvy ojeiko'ỹha rembe'ýpe.

7Upéi ha'e kuéra oguevi jey Pi-Hahirot gotyo, oĩva távagui hérava Baal-Sefón kuarahy resẽ gotyo ha opyta hikuái táva Migdol rovái.

8Osẽ hikuái Pi-Hahirótgui, ohasa yguasu mboypýri ha oguahẽ yvy ojeiko'ỹháme. Mbohapy ára pukukue oguata hikuái yvy ojeiko'ỹha rupi hérava Etam, oguahẽ meve Márape.

9Pégui oguahẽ hikuái Elímpe oĩháme 12 yvu ha 70 pindo máta.

10Osẽ Elímgui ha opyta Mar Rojo ypýpe.

11Upégui osẽ rire opyta yvy ojeiko'ỹháme Sin héravape.

12Upéi opyta Dófcape.

13Pégui osẽ ha opyta Alúspe.

14Alúsgui opyta Refidímpe ha ndojuhúi upépe y hoy'u haguã.

15-37Refidímgui yvyty Hor peve, opyta hikuái ko'ã hendápe: Sinaí yvy ojeiko'ỹháme, Quibrot-Hataavá, Haserot, Ritmá, Rimón-Peres, Libná, Risá, Quehelata, yvyty Séfer, Haradá, Maquelot, Táhat, Térah, Mitcá, Hasmona, Moserot, Bené-Jaacán, Hor, Jotbata, Abroná, Esión-Guéber, yvy ojeiko'ỹha Sin, upéva hína Cadés, yvyty Hor ypýpe tetã Edom rembe'ýpe.

38Upépe Ñandejára he'i pa'i Aarónpe ojupi haguã yvyty Hor ru'ãme,Nm 20.22-28; Dt 10.6. ha upépe omano ára peteĩha mes 5hápe, 40 áño Israel ñemoñare osẽ rire Egíptogui.

39Aarón omano ramo yvyty Hórpe, oguereko 123 áño.

40Mburuvicha guasu táva Arad pegua, oikóva Néguebpe Canaán yvýpe, ohendu Israel ñemoñare ouha.Nm 20.22-28; Dt 10.6.

41-47Yvyty Hor guive Moab ñu meve, Israel ñemoñare opyta ko'ã hendápe: Salmoná, Punón, Obot, Iié-Abarim, Moab retãme; Dibón-Gad, Almón-Diblataim, yvyty Abarim yvyty Nebo ypýpe.

48Oguejy hikuái yvyty Abarímgui ha opyta Moab ñúme, Jordán ysyry rembe'ýpe, Jericó rovái.

49Moab ñu rehe oho hikuái Bet-Jesimot guive Abel-Sitim peve.

Tembiapoukapy ojehasa mboyve Jordán mboypýri

50Moab ñúme, Jordán ypýpe, Jericó rovái Ñandejára he'i Moiséspe:

51“Kóicha ere Israel guápe: Pehasávo Jordán mboypýri Canaangua yvýpe,

52pemosẽ opa upépe guápe. Pehundi ijita ñembo'y ha itupã gua'u ra'ãnga kuéra ojejapóva ita verágui ha umi ha'e kuéra mbyatyhápe omomba'e guasu haguã chupe kuéra.

53Peñemomba'e pe yvýre ha peñemohenda upépe, che niko ame'ẽ peẽme pene mba'erã.

54Pemboja'o pe yvy mayma ñemoñare apytépe peitývo hese po'a. Umi hetavévape peme'ẽ tuichave ha imbovyvévape, michĩve. Upe ho'áva peẽme, upéva pene mba'erã; ha péicha pejapo mayma Israel ñemoñare apytépe.Nm 26.54-56.

55Ha peẽ napemosẽi ramo chupe kuéra hetãgui, umi opytáva ha'éta yvyra pehẽnguéicha pende resápe ha ñuatĩ pende apére. Ha'e kuéra oñemoĩta pende rehe.

56Peẽ napemosẽi ramo chupe kuéra, che pohundíta peẽme, ahundi rangue chupe kuéra.”