Tobit 10 - Biblia Guaraní con Deuterocanónicos

Tobit ha Ana ojepy'apy

1Upe aja katu Tobit oipapa ohóvo umi ára ohasáva, oikuaa haguã mboy árapepa Tobías ou jeýne upe oho haguégui. Ha ohasávoma umi ára ita'ýra ou jey haguã ha ndoúi,

2he'i ipy'apýpe: “Oiménepa ojejoko mba'e upe rupi? Ikatúko Gabael omano mba'e ra'e ha ndaipóri avave ome'ẽ kuaáva chupe upe pira pire.”

3Ha oñepyrũ ojepy'apy.

4Hembireko Ana he'i chupe:

—Che memby niko oiméne omano ra'e ha ñande rejáma.

Ha'e hasẽ soro imembýre, ha he'i:

5—Ái, che memby! Mba'ére piko roheja reho? Nde niko umi che resa rembovy'áva.

6Tobit katu he'i chupe:

Anive rejepy'apy che rembireko. Ani péicha ere. Oime vaerã niko oĩ porã hína. Oĩntene ojehúva chupe kuéra. Iñirũ niko kuimba'e jeroviaha hína ha ñande reheguáva voi. Ani rejepy'apy. Oime vaerã niko oguahẽmbotáma hína.

7Hembireko katu he'i chupe:

—Che reja, ani che mbotavyse. Che memby niko omanóma.

Ha ára ko'ẽre osẽ jepi ha'e omaña upe tape imemby oho hague rupi, ha avavépe ndogueroviavéi. Ka'aru vove katu oike jey hógape, upéi hasẽ pyhare pukukue ha ndaikatúi oke.

Tobías oñembosako'i ojevy haguã hógape

8Ohasa vove umi 14 ára, vy'a guasu ñemenda rehegua, Raguel he'i haguéicha ojapotaha itajýra rehehápe, Tobías oho he'i chupe:

—Ehejána taha. Aikuaa che ru ha che sy oiméne haguã oimo'ã nda che recha mo'ã véima. Reikuaa niko Mba'éichapa aheja vaekue chupe kuéra.

9Raguel he'i chupe:

—Epytána che ra'y. Epytána che ndive. Che amondóta che rembijokuái nde ru rendápe omombe'u haguã chupe nde hegui.

Tobías katu he'i chupe:

—Ndaikatu mo'ãi apyta. Ajerure ndéve che reja haguã aha jey che ru rógape.

10Upéma ramo Raguel ome'ẽ chupe hembireko Sara, ha avei mbytere opa mba'e oguerekóvagui: hembiguái kuimba'e ha kuñávagui, hymba guéi, ijovecha, ivúrro ha kaméllo kuéragui, ha avei ijao, ipláta ha hembiporu kuéragui.

11Péicha oheja chupe kuéra oho vy'a pópe. Osẽtavo Tobías oho haguã Raguel he'i chupe:

—Toho porãite ndéve, che ra'y. Ñandejára, yvága pegua, tomaña pende rehe peho porãite haguã, nde ha ne rembireko Sara. Ikatu nga'u, amano mboyve, ahecha pene mitã nguéra.

12Ha itajýra Sárape he'i:

—Ani rejepy'apy ne ména ru rógape reho haguã. Ko'ágã guive ha'e kuérata nde sy ha nde ru oréicha, roheja vaekue ndéve rehecha ára resa. Tereho porãite che rajy, ha aikove aja pukukue mba'e porã mante taikuaa nde hegui.

Ha oñañuã rire chupe kuéra, oheja oho.

13Edna katu he'i Tobíaspe:

—Che memby ahayhúva, Ñandejára ta ne pytyvõ rejerévo nde rógape ha che taikove ahecha haguã pene mitã nguéra. Ñandejára rérape amoĩ che memby kuña nde pópe. Ani kena araka'eve reheja oñembyasy mba'e nde rejapo vaekuére. Ko'ágã guive niko che hína nde sy, ha Sara katu ne reindy. Ikatu nga'u ra'e javy'a kóicha opa ára.

Upéi ohetũ chupe kuéra ha oheja oho vy'a pópe.

14Tobías oho Raguel rógagui tory ha vy'ápe. Ha omomba'e Tupã, yvága ha yvy ha opa mba'e Járape, ohejágui chupe osẽ porã opa mba'épe.Gn 24.40,42,56. Ojerure Tupãme ohovasa haguã Raguel ha Édnape, ha he'i:

—Ikatu nga'u che amomba'e chupe kuéra opa árape, oikove aja pukukue.