Sabiduría 17 - Biblia Guaraní con Deuterocanónicos

Ára ypytũ Egipto guápe

1Ipypuku

ha ikatu'ỹva jaikuaa porã

ne ñe'ẽ, Tupã,

upévare umi itavýva

hape avy.

2Umi iñañáva he'i aja

ikatutaha ojopy

ne retã marangatúpe,

ijokuapy uvei

oĩ hikuái pytũmbýpe

peteĩ pyhare opave'ỹva,

ikoty ñembotypýpe,

ha'e kuéra año, mombyry

Ñandejára pytyvõgui.

3Oimo'ã vaekue hikuái,

umi hembiapo ñemingue

avave ndoikuaa mo'ãi,

ha opytapa tesaráipe;

isarambipa uvei katu

póragui okyhyje

ramo guáicha.

4Umi óga okañyha,

nomo'ãi chupe kuéra

kyhyjégui,

tyapu oporomopirĩmbáva

ijerére ohendu,

ha osẽ vaicha chupe kuéra,

umi tova ra'ãnga,

oporomondyipáva.

5Ndaipóri tata rendy

ikatúva ohesape,

mbyja omimbíva jepe,

ndaikatúi vaekue omyesakã

upe pyhare pytũ.

6Tata ijehegui hendýva

omondýi chupe kuéra,

ha ogue rire katu

tuichave okyhyje opytávo.

7Paje rehegua ojejapóva,

mba'evépe naiporãi,

ha umíva umi arandu gua'u,

ñembohoryha ramo opa.

8Ha umi ojerovia hague

oipe'ataha chupe kuéra

kyhyje ha ñemondýigui,

ha'e kuéra voi ombohasy

upe kyhyje vai.

9Ha ndaipórirõ jepe

mba'eve okyhyje haguã,

umi tymba ohasáva

ha umi mbói turu ñe'ẽme,

omanómi kyhyjégui,

ha nahi'ãi chupe kuéra

hesánte jepe ohupi,

pe ára reíre,

avave ikatu'ỹha okañy.

10Heko añáva ipy'a mirĩ,

ha'ete voi

ogueru hi'ári ivaíva,

ipy'apy omyaña chupe,

ha ivaivéva oguerovia.

11Kyhyje niko Oguahẽ

ndaipórigui pytyvõ

jepy'a mongeta oguerúva.

12Na nde py'a guapýi ramo

sa'ive reikuaa mba'érepa

nde jopy jeiko asy.

13Umi Egiptogua,

ndaikatúi mba'eve ojapo

y pe pyhare ypytũme,

osẽva yvykua hypýgui,

ha jepi guáicha

oke ramo jepe,

14omuñámi chupe kuéra

poraita vai atýra,

térã opyta ipy'a kangy,

ojapyhýgui chupe kuéra

kyhyje oha'arõ'ỹva.

15Ha upéicha, opavave

opyta ñembotypýpe

ramo guáicha,

ndaipórirõ jepe mba'eve

ojokóva chupe kuéra.

16Taha'e ñemitỹhára

térã ovecha rerekua,

térã ñúre

ha'eño omba'apóva,

ojejopývo sapy'a oimo'ã'ỹhágui,

ogueropu'aka mante vaerã pe ñenupã

ikatu'ỹre okañy,

peteĩcha opavavépe

ojopýgui upe pytũ.

Opavave niko oñeñapytĩ

peteĩ pytũ pukúre.

Opaite ko'ã mba'e

omboryrýi ha omyatãmbámi

chupe kuéra kyhyjégui:

17Yvytu oturuñe'ẽva,

guyra kuéra opurahéi asýva

umi yvyra rakãre,

y hyapu mbegue katúva

ha ndaikatúiva ojejoko,

tyapu guasu ojapóva

ita ho'ávo yvytýgui,

18mymba kuéra oñaníva,

iñakuã, ojehecha'ỹva,

tymba saite okororõva,

mba'e ryapu oñombohováiva

umi yvyty pa'ũ rupi.

19Yvy tuichakue ohesape

kuarahy omimbipáva,

ha jepi guáicha oñemba'apo.

20Egiptogua ári katu

ojepyso pyhare ijapyra'ỹva,

pe pytũ guasu chupe kuéra

oha'arõva joguaha.

Ipy'apy kuéra voi

ipohyive chupe kuéra,

upe pytũ hese kuéra

ho'ávagui.