Eclesiástico 29 - Biblia Guaraní con Deuterocanónicos

Viru jeporuka jeiko vairã

1Oporoporiahurerekóva,

oiporuka hapichápe,

oporopytyvõva

ojapo Ñandejára

rembiapoukapy.

2Eiporuka nde rapichápe

oikotevẽ jave,

ha emyengovia pya'e

upe reiporu vaekue.

3Eñemohatã ne ñe'ẽme

ha ejerovia hese,

ha katuete rejuhúta

reikotevẽva.

4Oĩ ndojapóiva mba'evérõ

upe chupe ojeporukáva,

ha ombohasa asy

iporukaharépe.

5Ndohupytýi aja

ojapichypa hapichápe

ha oñemomirĩ,

ha omyengovia

vaerã ramo katu

ndoikuaái araka'épa,

ha he'i:

“Ko'ágã ndaikatu mo'ãi,

ho'a vaipa hína chéve.”

6Pe oiporuka vaekue

ojopýrõ, ipo'aitéta

chupe omyengoviárõ sa'imi,

ndojopýirõ katu

oñehundíma,

ha rei ete ojapo ijehe

ija'e'ỹ vaerã hese.

Omyengoviáta chupe

ñe'ẽ reity ha jeja'ópe.

7Oĩ ndoiporukaséiva,

ndaha'éi añágui,

nomombo reiséigui uvei

upe oguerekomíva.

Tupãmba'e

8Imboriahúva ndive katu

ta ne mba'e porã,

ha ani rembopuku

rejehu haguã chupe.

9Ñandejára oipotaháicha,

emoguahẽ oikotevẽvape

ha ani remondo po nandi.

10Iporãve reme'ẽ nde viru

ne pehẽngue

térã ne irũ teépe,

ha ani remohavẽmba rei

ita guýpe.

11Emohenda nde viru

upe Yvatetegua oipotaháicha

ha iporãvéta ndéve

óro ku'ígui.

12Umi mba'e reñongatúva

apytépe,

emoĩ tupãmba'e reme'ẽva,

umíva, vaígui ne mo'ãta.

13Kyse yvuku

ha tete mo'ãháicha

nde ykére oñorãirõta

umi nde rehe ondyrýva ndive.

14Imba'e porãva

oguenohẽ hova hapicháre,

tekove otĩ'ỹva katu

oheja rei chupe.

15Ani reñembyesarái

upe nde rehe

hova oguenohẽ vaekuégui,

ha'e niko omoĩ hekove

nde rehehápe.

16Upe heko añáva

ohundi reipa

upe hese

hova oguenohẽva viru.

Pe ohecha kuaa'ỹva

ndoikuaaséi mba'eve

upe oipe'a vaekuégui chupe

jejopy vaígui.

17Heta oiko porãvape

oheja vai

oguenohẽ hague hova

oimeraẽvare,

yguasu pu'ãicha

chupe kuéra oityvyro.

18Hetãgui omosẽ

ipoguasúvape,

ha ambue tetã rupi ovaháre

oguereko.

19Mba'e vai apoha

oguenohẽva hova

oñemboviru hetaségui

ho'a sarambípe.

20Ejehu nde rapichápe

ikatuháicha,

ha eñeñangareko

ani re'a ñuhãme.Imboriahu ha ovy'áva

21Jaikove haguã ñaikotevẽ

y, ao, tembi'u

ha óga ñañemo'ã haguã.

22Iporãve jaiko

óga kapi'ipe

jakaru porã rangue

ambue rógape.

23Reguerekóva reheve evy'a

ta heta térã taipokã,

ha nderejuhu mo'ãi

oñembohorýva nde rehe,

24Ñambyasy

umi ovaháre oikóvape,

reikohápe mbohupárõ

ani rejejuru pe'a.

25Reñembohupa

ha reñemongarúrõ

ñe'ẽ iróva rehendúta:

26“Nde mombyrygua,

emoĩ chéve mesa

ha reguerekóvape che mongaru.”

27“Tereho mombyrygua,

cháke ou ipoguasúva,

ou che ryke'y

ha aikotevẽta nde kotýre.”

28Ajépa hasy

peteĩ oñeñandu kuaávape,

ojehekýirõ chupe mbohupa

ha ojejapete hováre

pe ndohepyme'ẽiva.