Tobit 6 - Biblia Guaraní con Deuterocanónicos

Pira ysyry Tigris pegua

1Oho pe mitã karia'y Tupã remimbou ndive, ha hymba jagua hapykuéri kuéra. Oguata hikuái upe ára pukukue, ha pyhare vove opyta oke haguã ysyry Tigris rembe'ýpe.

2Pe mitã karia'y oho ojepyhéi haguã y rembe'ýpe. Ha upégui opo ipýre peteĩ pira, oisu'u mo'ã chupe. Tuicha ha'e oñemondýi ha osapukái.

3Tupã remimbou katu he'i chupe:

—Ndepojáike hese ha ani repoi chugui!

Ojapyhy ha'e pe pira ha oguenohẽ okápe.

4Tupã remimbou he'i chupe:

—Embovo ha ehyekue'o. Irokue, ipy'a ha ipy'akue eñongatu, pohã porã hína umíva. Hyekue katu emombo.

5Tobías ombovo upe pira, ha omboyke irokue, ipy'a ha ipy'akue. Upéi ombichy pe pira mbytere ho'u haguã, ha upe hembýva katu ombojuky ha oñongatu.

6Upéi oñepyrũ jey oguata hikuái, ha Oguahẽ Media ypy rupi.

7Upérõ Tobías oporandu Tupã remimboúpe:

—Che irũ Azarías, mba'épe guarã pohã piko irokue, ipy'a ha ipy'akue?

8Ha'e he'i chupe:

—Peteĩ kuimba'e térã peteĩ kuñáre oñemomba'ese ramo aña térã espíritu vai ha henondépe jahapy ramo pe pira py'a ha ipy'akue, opaite upépe pe mba'e vai araka'eve ojehuve'ỹ haguã.

9Ha oĩ ramo peteĩ hesatũ ha ndohechavéiva, oikyty vaerã hesáre irokue, ha upéi oipeju okuera haguã.

Rafael imandu'a Sárare Tobíaspe

10Oguahẽvo tetã Médiape, ha oñemoaguĩvo Ecbatánagui,

11Rafael, Tupã remimbou, he'i Tobíaspe:

—Che irũ Tobías!

—Mba'épa reipota? —he'i chupe Tobías.

Tupã remimbou he'i chupe:

—Ko pyhare japyta vaerã Raguel rógape, ha'e nde rehegua hína. Ha'e oguereko peteĩ tajýra hérava Sara.

12Upéva tajýra peteĩete hína. Ha nde ha'égui upe ipehẽngue hi'aguĩvéva, tenondete reime remenda haguã hese opavavégui. Upéicharõ hekoitépe opytáta ndéve opa mba'e ohejáva itúva. Sara kuñataĩ marangatu hína, iñarandu ha iporã, itúva katu karai joheipyre.

13Nde upe remenda vaerã hese, ndaipóri ambue. Ko pyhare voi che añe'ẽta itúva ndive ha ajeruréta chupe pe kuñataĩre ne mba'erã. Upéicha ágã jaju jeývo Raguésgui tuicha javy'áta, pemendáta haguére. Aikuaa porã Raguel nahakate'ỹ mo'ãiha ndéve hese. Nde'i chéne ome'ẽtaha itajýra ambuépe. Upéicha ojapo ramo, ho'a vaíta chupe, ha ojejukáne he'iháicha pe kuatia Moisés oheja vaekue. Ha'e oikuaa porã ne añonteha upe omenda vaerã itajýrare. Ehendu ko ha'éva ndéve. Ko pyhare voi ñañe'ẽta pe kuñataĩre ha jajeruréta hese. Upéicha ramo jahasakuévo jaju jeývo Raguésgui, jaraha kuaa ñane ndive nde rógape.

14Tobías he'i Rafaélpe:

—Azarías, che irũ, oje'e niko ko kuña omendáma hague 7 jevy, ha upe omendaha pyharépe, iména omanoha oñembojávo hese. Peteĩ aña ndaje pe ojukáva chugui iména,

15ha chupe ohayhúgui, hese mba'eve ndojapói. Umi hendive oikosévape katu ojuka. Upévare akyhyje chugui che juka ramo guarã. Che sy ha che ru niko chévente che rereko ha ñembyasýgui omano mba'e vaerã ojehu ramo chéve mba'e vai. hi'ári ndaipóri avave oñotỹ vaerã chupe kuéra omano vove.

16Tupã remimbou he'i chupe:

—Na ne mandu'ái piko nde ru he'i hague ndéve remenda vaerãha peteĩ kuña pene pehẽnguévare. Che irũ, ani rejepy'apy upe añáre ha ejerure katu upe kuñataĩre. Aikuaa porã ko pyharépe oñeme'ẽtaha ndéve ne rembirekorã.

17Ágã peike vove pende kotýpe emoĩ pe pira py'a ha ipy'akue michĩmi pe insiénso ojehapyhápe. Hyakuãngue otĩmbo vove, pe aña ohetũta ha ohóta upégui ouve'ỹ haguã.

18Ha peñeno mboyve oñondive peñembo'e pejerurévo Ñandejára yvága guápe ta pende poriahurereko ha toñangareko pende rehe. Ani rekyhyje, pe kuña ne mba'erãnte voi ymaite guive, ha nde renohẽta chupe pe mba'e vaígui. Ha'e ohóta ne ndive nde rehohápe, ha imembýta nde hegui mitã rehayhu etereítava. Anive rejepy'apy.

19Ohendúvo Tobías upe Rafael he'íva, ha oikuaávo Sara túva pehẽngueha, iñakã raku pe kuñáre ha opyta ohayhu chupe.