Sabiduría 13 - Biblia Guaraní con Deuterocanónicos

Yvy arigua ñemomba'e guasu

1Yvypóra ndaha'éi mba'eve

ndoikuaái ramo Tupãme,

ha'e kuéra, ohechárõ jepe

heta mba'e porã,

ndoikuaái vaekue

upe Oikovévape,

ha ohechávo hembiapokue,

ndohecha kuaái Ijapoharépe.

2Ha oguereko vaekue tupãrõ

opa mba'e oisãmbyhýva,

tata, yvytu,

y hatã osyrýva,

mba'e rendy yvágare oĩva.

3Ha upéicha, opytárõ

ijurujái

ko'ã mba'e porãitáre

ha oguereko hikuái tupãrõ,

pehechami mba'eichaitépa

tuichavéta opa mba'e Jára,

ha'e voi Ijapoharéva.

4Ha jahechárõ

mba'eichaite pevépa iporã

opa mba'e,

jahecha mba'eichaguápa

Ijapohare.

5Ha upe jahechaha guive

mba'e porãngueta,

ñaguahẽne jaikuaa

ijapoharépe,

ñambojojávo hese.

6Opaichavévo, umi yvypóra

ndaikatúi ojeja'o vaívo,

ikatúgui oime ojavy

ohekakuévo Tupãme

ojuhuségui chupe.

7Ha oikógui ojeporeka

Tupã rembiapo pa'ũme,

oñembotavypa ohechávare

Iporãitégui umi ohecháva.

8Ha upéicha ramo jepe,

ndaikatúi ojeheja rei

chupe kuéra.

9Ha'e kuéra niko

ohupyty vaekue arandu

ohesa'ỹijo haguã opa mba'e,

ha mba'éicha piko

ndojuhu pya'evéi

Tupã opa mba'e Járape?

Ta'ãnga rei ñemomba'e guasu

10Ivaíne umi ojerovia

ha omomba'e vaekuépe

ta'ãnga oikove'ỹva,

yvypóra rembiapokue

he'íva tupãha,

óro ha plátagui ijapo pyre,

tymba ra'ãnga,

térã ita rei

umi yma guare ojapóva.

11Péina pépe peteĩ

yvyráre omba'apóva:

ha'e oikytĩ pe yvyra

hasy'ỹvéva ijeity,

katupyrýpe oipiro

ha omopotĩ,

hekópe porã omba'apo

ha ojapo peteĩ mba'e porupy.

12Hembývagui ojapo jepe'a,

ombojy haguã hembi'u,

ha hyguãtã ipype.

13Ha hemby gueteri umi yvyra

umi ikarẽ karẽmbáva

iporãve'ỹva mba'everã.

Ha'e opytu'u aja hembiapógui,

katupyrýpe omba'apo hese

oguenohẽ meve chugui

peteĩ yvypóra ra'ãnga,

14térã tymba vaípe ojoguáva.

Upéi omona hese mba'e pytã,

omokañy kañy umi ivaiha,

15ojapo chupe hendaguã,

ha tápiare omoĩ hatã.

16Oñeha'ã ani haguã ho'a,

ndaikatúigui ha'eño oiko,

ta'ãngánte niko ha'e

oikotevẽva oñepytyvõ.

17Ha péicha ramo jepe,

oñembo'évo hóga guáre,

ta'ýra kuéra

ha oguerekóvare,

notĩri oñe'ẽ asy haguã

pe ta'ãnga oikove'ỹvape:

Ojerure tesãi hesãi'ỹvape,

18jeikove oikove'ỹvape,

ñepytyvõ ipituávape

ha omoirũ haguã

chupe tapére,

oguata'ỹvape,

19osẽ porã haguã

hembiapópe

ha ohupyty heta mba'e,

ojerure mbarete

ikangývape.