Baruc 4 - Biblia Guaraní con Deuterocanónicos

1Arandu oĩ

Tupã rembiapoukapýpe,

ha upéva oĩ

opa árape guarã.

Mayma hese ojekóva,

oikovéne

ha umi omboykéva,

omanóne.

2Israel, eheka arandu

ha eñemomba'e hese,

ha'e ta nde resape

reguahẽ meve hendápe.

3Ani reheja avavépe

umi mba'e ne mbotuicháva,

ha umi tetã ambuépe

upe ndénte rehupytýva.

4Javy'a, ñande Israelgua,

jaikuaágui Tupã rembipota!

Jerusalén ojahe'o imemby kuérare

5Néike, che retãgua,

Peẽ rupi oiko mandu'a

Israel rehe.

6Peñeme'ẽ vaekue hepýre

tetã ambuépe

ndaha'éi

peñehundi ete haguã.

Tupãme pembopochy haguére

ha'e pende reja

pende rayhu'ỹva pópe.

7Pembopochy

pende Apoharépe

pemoguahẽvo añáme

pende mba'e kuave'ẽ,

pemoguahẽ rangue Tupãme.

8Pende resarái Tupã,

opa ára oikovévagui,

pene mongaru vaekue.

Pemoñembyasy

pende sy Jerusalénpe.

9Ha'e ohechávo

Tupã pene nupãtaha, he'i:

Pehendu táva kuéra

che jere rupi peiméva.

Tuicha ñembyasy

Tupã oity che ári.

10Che ahecha

Mba'éichapa Tupã,

opa ára oikovéva,

che memby kuéra omondo

tetã ambuépe tembiguáirõ.

11Vy'apópe

amongakuaa vaekue,

tesay syrýpe ahecha oho.

12Ani avave ovy'a

apytágui mena'ỹre,

ha ojepe'a haguére che hegui

hetaite che memby.

13Ha'e kuéra

mba'eve ndoikuaaséi vaekue

Tupã rembiapoukapýgui,

ndojapói umíva he'iháicha,

ha ndohejái

umíva oheko mbo'e

chupe kuéra

oiko haguã teko jojápe.

14Táva kuéra

che jere rupi peiméva,

peju pehecha Mba'éichapa

Tupã, opa ára oikovéva,

omondo che memby kuéra

tembiguáirõ,

15ombou hese kuéra

tetã mombyrygua,

iñe'ẽ ambuéva,

nomomba'éiva karai kuérape,

ha ndoiporiahurerekóiva

mitã nguérape.

16Ko'ãva ogueraha

che memby kuéra,

ha vaikuépe che reja

mena'ỹre, che ñomi.

17Mba'e piko ikatu ajapo

pende rehe che memby kuéra,

18Tupã, pe oity vaekue

pende ári ko'ã mba'e vai,

Ha'e mante pene renohẽne,

pende rayhu'ỹva pógui.

19Tapeho che memby kuéra,

peiko peikoseháicha,

che tapyta cheño.

20Namoĩvéi umi che ao

arete jave amondéva.

Ao vosakuépe añemondéta

añembo'e haguã,

aikove aja

asapukáita Tupã,

opa ára oikovévape,

che pytyvõmi haguã.

21Néike che memby kuéra,

pejerure Tupãme

ta pene pytyvõ.

Ha'e pene renohẽne

jejopy vaígui,

ha pende rayhu'ỹva pógui.

22Che aikuaa Tupã,

opa ára oikovéva,

pene renohẽtaha

jejopy vaígui.

Tupã imarangatúva

che mbovy'a jey,

aikuaávo pene renohẽtaha

jejopy vaígui

pende poriahurerekógui ha'e.

23Che rasẽ soro vaekue

ahecha ramo pejereraha,

Tupã katu

pende reru jeýta

che rendápe

ha upévo tuichaite

che mbovy'áta.

24Táva kuéra

che jere rupi oĩva,

ohecha haguéicha

pejereraha tembiguáirõ,

voiete ohecháta avei

Tupã, opa ára oikovéva,

oguejy imimbipápe,

pende pe'a jejopy vaígui.

25Che memby kuéra,

peropu'aka kena kirirĩháme,

ñenupã

Tupã oitýva pende ári.

Ojopy vaírõ jepe pene ndive

umi pende rayhu'ỹva,

vokói ete

ha'e kuéra oñehundíne,

ha peẽ voi

pepyrũne ijahy'óre.

26Che memby kuéra,

hetaite amokunu'ũ vaekue,

tape pohýire ko'ágã

peipykúi.

Pende rayhu'ỹva pende reraha,

tymba ñarõ

oguerahaháicha ovecha.

27Néike. che memby kuéra,

pejerure Tupãme pytyvõ.

Ha'e, pene nupã vaekue,

imandu'a jeýne pende rehe.

28Pejetu'u haguéicha,

pejei haguã Tupãgui.

Pejere ko'ágã,

peñeha'ãmbaite peheka chupe.

29Ha'e, oity vaekue

pende ári ko'ã mba'e,

ha'e pende pe'a jeýne

jejopy vaígui,

ha pene mbovy'áne opa ára.

Jerusalén iñangapyhy

30Néike Jerusalén!

Tupã ome'ẽ vaekue ndéve

nde rerarã,

ne moangapyhýta.

31Tojerekóke

umi nde jopy vai

ha ovy'a vaekue,

ohechávo reñehundi.

32Tojererekóke umi táva,

ogueraha vaekue

ne memby kuéra tembiguáirõ,

Tojererekóke upe táva

ne memby oho haguépe opyta.

33Ha'e ovy'a haguéicha

ohechárõ re'a ha reñehundi,

peichaite avei oñembyasýta

opytávo itapere.

34Amonandíta,

ha opáta pype vy'a,

oñembotuicha rangue,

oñembyasýta.

35Tupã, opa ára oikovéva,

oitýta hi'ári tata,

heta ára ojepotátava,

ha aña mante,

are upépe oikóne.

36Ema'ẽ kuarahy resẽ gotyo,

Jerusalén,

ha ehecha pe vy'a

Tupã oguerúva ndéve.

37Péina ou ne memby kuéra

nde hegui ojereraha vaekue.

Kuarahy resẽ

ha kuarahy reike guio,

Tupã Marangatu oipotágui,

Vy'a pópe ou hikuái

Tupã mimbipa rechávo!