Judit 2 - Biblia Guaraní con Deuterocanónicos

Nabucodonosor ohenoika Holoférnespe

1Áño 18, mes peteĩ, ára 22 ramo, Asiria ruvicha guasu Nabucodonosor róga guasúpe ojekuaa mba'eichaitépa oñemyengoviáta umi tetãme noipytyvõséi vaekue chupe, ha'e ojerure haguéicha.

2Ohenoika opa mburuvicha kuérape, oñembyaty hikuái ha ha'ete voi he'i ohunditaha umi tetã.

3Opavave oñemoĩ peteĩ ñe'ẽme oñehundi vaerãha opa umi tetã naiñe'ẽ rendúi vaekue mburuvicha guasúpe.

4Opa rire ko ñembyaty, Asiria mburuvicha guasu Nabucodonosor, ohenoika Holoférnespe, hetã ñorãirõhára kuéra ruvicha, oĩva hína ha'e rire, ha he'i chupe:

5“Kóicha oñe'ẽ ndéve nde ruvicha guasu ha opa yvy jára: Resẽvo che renondégui, reiporavóta kuimba'e kuéra ipy'a guasúva, 120 mil yvy rupigua ha 12 mil kavaju arigua,

6ha rehóta umi tetã kuarahy reike gotyogua ári, ha'e kuéra na iñe'ẽ rendúi haguére.

7Ere chupe kuéra toñemoĩ nde poguýpe, ỹrõ che pochýne ajeitýne hi'ári kuéra. Che ñorãirõhára kuéra oñuãmbáta upe yvy ha omondapáta chupe kuéra.

8Umi ojekutu vaekue isarambíta opa rupi rei, umi ysyry henyhẽta te'õnguégui,

9ha umi oñemyakãsã vaekue arahaukáta yvy apýra peve.

10Tereho ha eñemomba'e umi tetãre che rérape. Oñemoĩ ramo nde poguýpe, eheja chéve ágã taikuaauka chupe kuéra.

11Umi oñemoĩsévape nde rehe katu ani reheja rei. Ejuka ha emondapa chupe kuéra opa rupi.

12Che rekove ha che retãre, ha'e ajapóta upéicha che po rupi ete.

13Ani reheja rejapo'ỹre mba'eve ndéve ha'éva. Ejapo ko'agãite voi ha'e haguéicha ndéve”.

Holofernes rembiapo

14Osẽ rire Holofernes Nabucodonosor renondégui, ohenoika opa umi mburuvicha ha ñorãirõhára Asírio kuéra ruvicha.

15Oiporavo umi ikatupyryvéva ñorãirõme, he'i haguéicha chupe huvicha guasu: 120.000 yvy rupigua ha 12.000 kavaju arigua,

16ha ombosako'i chupe kuéra ñorãirõrã.

17Upéi ombyaty heta kaméllo, vúrro ha mburika ogueraha haguã hi'ári hembiporu kuéra, ha avei heta ovecha, vaka ha kavara tembi'urã.

18Opavavépe avei oñeme'ẽ heta hi'upyrã ha hi'ári óro ha pláta mburuvicha guasu mba'évagui.

19Oho Holofernes iñorãirõhára kuéra ndive, Nabucodonosor renonderã, ha ojaho'ipa hikuái umi yvy kuarahy reike gotyogua, ikárro, ikavaju ha iñorãirõhára kuéra reheve.

20Heta iterei oĩ hese kuéra oñemoirũva, ha tuku ha yvyku'i ra'ỹicha hetágui ndaikatúi ojepapa.

Holofernes ojeity tetã nguéra ári

21Nínive guive oho hikuái mbohapy ára pukukue Bectilet ñu gotyo. Bectilétgui oho opyta hikuái pe yvyty ypýpe, oĩva hína Cilicia yvatevogua asu gotyo.

22Upégui oho yvyty kuéra gotyo, opa iñorãirõhára kuéra, yvy rupigua, kavaju arigua ha ikárro kuéra reheve.

23Ohasakuévo ohundi táva Fud ha Lud, ha omondapa opa umi oikóva Rasíspe ha avei ismaelíta kuéra oikóva yvy ojeiko'ỹha rembe'ýpe, Queleón yvy gotyo.

24Upéi ohasa ysyry Éufrates, avei Mesopotamia ha ohundipaite umi táva mbarete oĩva ysyry Abroná guive yguasu peve.

25Omoĩ ipo guýpe Cilicia, ha umi oñemoĩvape hese ohundi, ohupyty peve Jafet yvy gotyo, Arabia rovái.

26Omongora madianíta kuérape, ohapypa hekoha kuéra ha omondapa hymba kuéra.

27Oguejy Damasco gotyo, trígo ñemono'õ jave, ohapypa ko'ãva, ojukapa ijovecha ha ivaka kuéra, omondapa itáva kuéra, ohapypa umi ñu ha ojuka opa mitãme.

28Tuicha okyhyje opytávo umi oikóva yguasu rembe'ýre, Sidón, Tiro, Sur ha Ocínape, avei umi oikóva Jabnia, Asdod ha Ascalónpe.