Isaías 45 - Biblia Guaraní con Deuterocanónicos

Ñandejára oiporavo Círope

1Péicha he'i Ñandejára

hembiporavo Círope.

Ipo akatúagui chupe ogueraha.

Omoĩta ipo guýpe

tetã nguéra,

mburuvicha guasu kuéra

ku'a jokuaha ojoráta,

táva rokẽ nguéra

oipe'áta chupe,

ikatu'ỹ haguãicha

avave omboty.

2“Che aháta ne renonderã

ha ambokarapéta yvyty,

amopẽta okẽ vrónse

ha imbotyha fiérro ajokáta.

3Ame'ẽta ndéve

mba'e repy oñeñongatúva

ha mba'eta

ojererekóva ñemiháme,

reikuaa haguã

cheha opa mba'e Jára,

Tupã Israel Jára

nde réra rupi rohenóiva.

4Che rembiguái Jacob

ha che rembiporavo Israel

rehehápe,

rohenói nde réra tee rupi

ha romoingo vaekue

mburuvicha ramo,

nde nda che kuaái ramo jepe.

5Che hína opa mba'e Jára,

ndaipóri ambue.

Che ñoite hína Tupã,

ndaipóri ambue.

Che rombo'e vaekue

reñorãirõ kuaa haguã,

nde nda che kuaái ramo jepe.

6Ojekuaa haguã opa rupi,

kuarahy resẽ guive

kuarahy reike peve,

che ñoiteha, ndaiporiha ambue.

Che opa mba'e Jára,

ndaipóri ambue.

7Che upe ajapóva

tesakã ha pytũ,

ame'ẽ jeiko porã

ha jejopy vai.

Che, opa mba'e Jára,

ajapo opa ko'ã mba'e.

8Yvágagui

ho'aháicha ysapy

ha araígui ama,

amboúta yvy ári

akã rapu'ã.

Yvýgui amoheñóita

ivaívagui ñesẽ

ha ijykére amoĩta teko joja.”

Che, opa mba'e Jára,

umíva ajapóta.

Ñandejára ipu'aka opa mba'ére

9Kambuchi ñai'ũ piko

oñoñe'ẽ joapíta

ijapohare ndive?

He'íta nga'u piko chupe:

‘Maerã piko

upéicha che apo?’

10Térã piko ta'ýra

okaguaíta itúva ha isýre,

ogueru haguére chupe

ko yvy ári?

11Péicha he'i Ñandejára

Tupã marangatúva

Israel apohare:

“Pejéta piko chéve

mba'érepa ajapo

che ra'y kuérape,

térã pemombe'úta chéve

mba'éichapa ajapo vaerã

che rembiapo?

12Che ajapo vaekue

yvy ha yvypóra,

che pópe aipyso vaekue yvága,

ha amoĩ pype mbyjaita.

13Che ahenói vaekue Círope

oñakã rapu'ã haguã,

ha ambovevýita chupe haperã.

Ha'e che táva omopu'ã jeýta

ha ohejáta oho jey hetãme

umi oñemosẽ vaekuépe,

mba'eve ojerure'ỹre

chupe kuéra,”

he'i Ñandejára ipu'akapáva.

14Péicha he'i Ñandejára:

Egipto pegua mba'e repy,

Etiopía pegua mba'e ñemu

ha umi Sabá pegua

hete rusúva,

oúta ne rendápe

ha nde pópe oñemoĩta.

Nde rapykuéri ohóta

itasãme ijokuapy,

ne renondépe ojayvýta

ha ojerure asýta ndéve:

“Ne ndive ñoite

oĩ Tupã, ndaipóri ambue.

Ndaha'éi mba'eve

umi tupã nguéra.”

15Añetehápe

nde hína Tupã

ikatu'ỹva jahecha,

Tupã Israel Jára,

ivaívagui oporope'áva.

16Tupã gua'u ra'ãnga

apoha kuéra,

otĩ ha oikóta

tĩndyhápe.

17Israélpe katu

Ñandejára oipe'a ivaívagui

opa árape guarã,

ani haguã otĩ araka'eve

térã tĩndyhápe oiko.

18Péicha he'i Ñandejára

ojapo vaekue yvága,

ha'e hína Tupã.

Ha'e ojapo yvy

ha omoĩ hatã hendaguãme,

ndojapói yvy perõ,

ojapo uvei,

pype ojeiko haguãicha:

“Che hína opa mba'e Jára,

ndaipóri ambue.

19Na ñe'ẽi vaekue ñemiháme

térã iñypytũháme.

Che nda'éi Jacob ñemoñarépe:

‘Pe che reka

ndaiporihápe mba'eve’.

Che, opa mba'e Jára,

ha'e añeteguáva

ha heko peguáva.”

Ñandejára ombohovái tupã gua'u kuérape

20Peñembyaty ha pejupa,

peñemboja oñondivepa

tetã nguéragui pene rembýva.

Ndoikuaái pe ojapóva

umi ogueroguatáva

itupã gua'u yvyra

ha oñembo'e

tupã ikatu'ỹvape oipe'a

chupe kuéra ivaívagui

21Peñe'ẽ.

Peje peñanduháicha

ha peñemongeta oñondive:

Mávapa omombe'u ra'e

ko'ã mba'e oiko mboyve,

iñepyrũha guive?

Mávapa ymaite guive

he'i ra'e oikotaha?

Ndaha'éipa ra'e?

Che hína opa mba'e Jára

Ndaipóri ambue Tupã.

Che hína Tupã heko jojáva

ha oporope'áva ivaívagui,

ndaipóri ambue.

22Peju jey che rendápe

poipe'a haguã ivaívagui,

peẽ opa rupigua.

Che hína Tupã

ha ndaipóri ambue.

23Che añe'ẽ me'ẽ

che rérape voi.

Che jurúgui osẽ

ñe'ẽ añetegua

ha ndopyta rei mo'ãi.

Che renondépe

oñesũta opavave

ha che rérape

ome'ẽta iñe'ẽ,

24he'ívo:

‘Ñandejára ndive ñoite

oĩ akã rapu'ã ha pokatu’.

Henondépe opytáta itĩndy

opa umi hese

ipochy rendy vaekue.

25Ñandejára rehe ae

oñakã rapu'ã

ha omimbipáta

Israel ñemoñare.