Judit 16 - Biblia Guaraní con Deuterocanónicos

Judit purahéi

1Pepurahéi Tupãme

mba'e pararã púpe,

pepurahéi Ñandejárape

platíllo púpe,

pemomba'e guasu chupe

ha héra perohory.

2Tupã ha'e pe ikatúva

ombopaha ñorãirõ nguéra,

ha'e che pe'a che muñávagui

ha che reru

hetãgua oñembyatyhápe

3Ou Asírio kuéra

yvyty yvatevoguágui,

ou hetaiterei

ñorãirõhára reheve,

omyenyhẽ umi ñu,

ha ikavaju kuéra reheve

ojaho'ipa umi yvyty.

4Oha'ãnga omyendypávo

ore yvy,

kyse pukúpe ojukapávo

mitã rusu kuérape,

oipetévo yvýre

mitã kambúpe,

oguerahapávo

mitã nguérape

ha ipopa'ãvo avei

mitã kuñáre.

5Ñandejára ipu'akapáva,

ndohejái ho'a ipópe mba'eve

peteĩ kuña rupi.

6Upe huvicha kuéra

ndojejukái

mitãrusu kuéra po rupi,

ha ndaha'éi hete rusúva

umi hese ipu'akáva,

ndaha'éi

kuimba'e yvate-vate

umi hi'ári ojepoíva,

Judit, Merarí rajy,

iporã rekópe omoñuhã chupe!

7Oipe'a ijao hũ,

hováre omoĩ

mba'e hyakuã asýva,

oipe'a haguã jejopyhágui

Israel guápe.

8Ombojegua iñakã

áva apytĩháme

ha omonde ao porã

ombotavy haguã chupe.

9Isapatupe ohechávo

opyta ijurujái.

Ha iporãngue

oipy'a reraha chupe

ha kyse puku katu

ijajúrare ohasa.

10Umi pérsa oñemondýi

ohechávo ipy'a guasuha,

médo kuéra oryrýi

ohechávo ndokyhyjeiha.

11Upérõ

che retãgua ojejopýva

hatã osapukái,

ha umi oñemoĩséva hese

oñemondyipa,

che retã ikangýva osapukái,

ha ha'e kuéra oryryipa,

osapukái ha isarambipa.

12Ohundipa chupe kuéra

mitã rusu kangýpeicha,

tembiguái okañývapeicha

chupe kuéra ojuka.

Che Jára

ñorãirõhára kuéra

chupe kuéra ohundipa!

13Apurahéita Tupãme

purahéi ipyahúva:

Che Jára, ne mbarete

ha nde reko mimbipa,

Araka'eve ndaikatúi vaekue

reñemboguevi!

14Toiko ne rembiguáirõ

opa oikovéva nde rejapo vaekue.

Nde reñe'ẽ ha ha'e kuéra oiko,

nde reipeju ha ha'e kuéra oikove.

Avave ndaikatúi

ombohovái ne ñe'ẽ.

15Yvyty ha yguasu osusũmba

huguaite guive

ha umi ita araitýicha

hykupa ne renondépe,

nde katu nde py'a porã

umi ne mbyajéva ndive.

16Michĩ eterei

ndéve guarã

mymbajuka hyakuã asýva,

ha michĩ eteve ikyrakue

nde rérape ojehapýva,

pe omomba'e guasúva Tupãme

tuicháta opa árape guarã.

17Tojererekóke umi tetã

oñemoĩséva che retãre!

Ñandejára ipu'akapáva

oinupãta chupe kuéra

upe ára pahápe

oitýta tatápe

ha ome'ẽta yso kuérape,

ha hasẽta ñembyasýgui

opaite ára peve.

Jerusalénpe oñeguahẽ

18Oguahẽvo Jerusalénpe, oguerohory Tupãme, tavagua kuéra oñemopotĩ,*f** oikuave'ẽ mymbahapy,*f** mba'e oikuave'ẽse guinte oikuave'ẽva, ha hetave mba'e.

19Judit oikuave'ẽ Tupãme umi Holofernes mba'ekue, tavagua kuéra ome'ẽ vaekue chupe, péicha avei pe ombojegua vaekue hupa ha Judit voi oipe'a vaekue.

20Israelgua ombyarete mbohapy mes pukukue tupao renondépe, ha Judit opyta hendive kuéra upépe.

21Upe rire, peteĩ-teĩ oho jey hógape, ha Judit oho jey Betulíape hógape. Oikove aja pukukue, opa rupi herakuã.

22Heta kuimba'e omendase hese, ha'e katu nomendavéi iména Manasés omano rire.

23Ohasavévo umi ára, herakuãve opa rupi. Ha'e oiko iména rógape omboty peve 105 áño. Opoi hembiguáigui, omano Betulíape ha oñeñotỹ iména Manasés ykére.

24Israelgua oguerojahe'o chupe 7 ára pukukue. Omano mboyve, ha'e omboja'o oguerekóva guive ipehẽngue kuéra ha iména pehẽngue kuérape.

25Judit oikove aja ha heta ára omano rire avavete noñemoĩvéi Israelgua kuérare.