Tobit 1 - Biblia Guaraní con Deuterocanónicos

Tobit, yvy ojeiko'ỹháme

1Kóicha vaekue Tobit rekovekue. Ha'e Tobiel ra'y vaekue ha itúva kuéra ypykue katu Ananiel, Aduel, Gabael, Rafael ha Raguel vaekue. Ko'ãva hína Jahseel ñemoñare, Neftalí guáva.

2Umi árape, oĩ ramo Salmanasar mburuvicha guasúrõ Asíriape, Tobit ojereraha vaekue tembiguái ramo Tisbégui. Táva Tisbé opyta hína Galiléa yvate gotyo, táva Quedes yvy gotyomi Neftalí ñemoñare kuéra yvýpe, kuarahy reike gotyo Hasor jahasa rire, Sefat yvate gotyo.

Tobit rekovekue osẽ rire Tisbégui

3Che, Tobit, araka'eve nda che japúiva ha aikóva tape potĩ rupi ha teko jojápe opa ára. Heta che mba'e porã ha heta mba'e ame'ẽ che pehẽngue kuérape ha umi che retã guápe ojegueru vaekue che ndive tembiguái ramo Nínivepe, Asírio kuéra retãme.

4Che mitãvépe ha aiko ramo gueteri che retãme, Israel yvýpe, che ypykue Neftalí ñemoñare kuéra ojei vaekue David ha Jerusalén po guýgui. Jerusalén vaekue pe táva jeporavopyre opa Israel ñemoñare kuéra apytépe, oñemoguaheháme mba'e kuave'ẽ. Upépe oñemopu'ã tupao ha oñemboyke vaekue Tupãme, opa árape guarã.

5Galiléa yvyty kuérape, che pehẽngue kuéra ha opa Neftalí ñemoñaréva omba'e kuave'ẽ vaekue pe tóro ra'y ra'ãngápe oĩva Dánpe ha ojapouka vaekue Jeroboam, Israel ruvicha guasu.

6Arete guasu jave niko mayma Israelgua oho vaerã JerusalénpeDt 12.11-14; 16.16. ogueraha haguã imba'e kuave'ẽ. Heta jey, chéntemi vaekue pe ohóva. Aháva jepi agueraha haguã umi che remitỹngue ypykue, che rymba ra'y ypykue ha 10gui peteĩ che vaka kuéragui. Agueraha avei ovecha oñeñapĩ ypy vaekue raguekue.Ex 23.16-17; 34.22-23.

7Opaite mba'e araháva ame'ẽmbaitéva pa'i kuéra, Aarón ñemoñarépe, oikuave'ẽ haguã altar*f** ári. Umi levíta, Jerusalénpe omba'apóvape, ame'ẽva 10gui peteĩ che kaguy, che trígo ha che ñandyry olívogui. Ha avei che yva kuéra ha ambue koga'águi. Ambue 10gui peteĩ ame'ẽva hepýre ha agueraha Jerusalénpe. Péicha ajapo opa áño.Nm 18.12-19; Dt 14.22-28; 18.3-4.

8Pe mbohapyha 10gui peteĩ katu ame'ẽva ityre'ỹ, imena'ỹ ha umi ojeroviápe Tupãre judío kuéraicha. Péicha ajapómiva áño mbohapyha jave. Ha upéi rokaru oñondivepa he'iháicha Moisés rembiapoukapýpe ha oheja haguéicha Débora, ore ypykue Ananiel sy, apytágui tyre'ỹ che mitã guive.

9Oguahẽ vove ára amenda haguã, amenda Ana rehe, ore rehegua kuérava voi. Ha'e imemby ha rombohérava Tobías.

10Ajereraha vaekue tembiguái ramo Nínivepe. Opa che pehẽngue ha ambue Isaraelgua kuéra ho'u tembi'u ho'úva umi Tupãre ojerovia'ỹva.

11Che katu, ajejoko ha nda'úi umi tembi'u.Dt 14.3-21.

12Ha che mandu'a mantégui Tupã Yvatete guáre, Ha'e rupi

13mburuvicha guasu Salmanasar oma'ẽ porã che rehe ha aiko chupe mba'e repy joguaha ramo.

14Aháva Media peve ha ajogua opa mba'e chupe guarã. Péicha ajapo omano meve ha'e. Táva Raguéspe oĩva Médiape, peteĩ jey aheja 330 kílo pláta oñongatu haguã chéve Gabael, Gabrí ryvy. Ha'e niko che rogagua vaekue.

15Omanóvo Salmanasar, opyta hendaguépe ita'ýra Senaquerib. Tape kuéra oñembotypa Media peve, ha ndaikatuvéi aha upépe.

Tobit mba'e porã

16Heta aipytyvõ vaekue ambue Israelgua kuérape oĩ ramo guare mburuvicha guasúrõ Salmanasar.

17Amongaru vaekue umi ndoguerekóivape ho'u vaerã, ha ndorekóivape omonde vaerã ame'ẽ chupe kuéra che aógui. Ha omano ramo peteĩ Israel guáva ha oñemombo hetekue Nínive rokápe, katuete aha añotỹ.

18Senaquerib oñe'ẽ vai ramo guare Tupã, Mburuvicha Guasu Yvatete guáre, oinupã chupe ha osẽ Judéagui. Upéva ombopochy eterei chupe ha ojuka heta Israel guápe. Che katu aha vaekue umi hetekue amonda ha añotỹmba. Senaquerib heta oheka umi ojuka vaekue retekue ha ndojuhúi.

19Peteĩ Ninivegua oho ha omombe'u chupe cheha pe oñotỹva umi ha'e ojukauka vaekuépe. Aikuaávo mburuvicha guasu oikuaaha upéva ha che jukaseha, akyhyje ha upévare akañy.

20Opa mba'e arekóva ojepe'a che hegui ha ojereraha mburuvicha guasúpe guarã. Oheja chéve hikuái Ana che rembireko ha Tobías, che ra'y.

21Ohupyty mboyve 40 ára, Senaqueríbpe ojuka mokõi ita'ýra ha oho okañy hikuái Ararat yvyty rupi. Senaquerib rendaguépe opyta ita'ýra Asarhadón, omoĩva ipytyvõhára ramo Ajicárpe, che ryke'y Anael ra'y. Ha'e oguereko ipo guýpe opa kuatia pe tetã rehegua.

22Ajicar imandu'a porã che rehe mburuvicha guasúpe ha upéicha rupi ajevy Nínivepe. Oĩ ramo Senaquerib mburuvicha guasúrõ, Ajicar ha'éma vaekue voi ipytyvõhára. Ko'ágã ita'ýra Asarhadón oheja jey chupe upéicha. Ajicar che rogagua vaekue, che ryke'y ra'y vaekue.