Eclesiástico 3 - Biblia Guaraní con Deuterocanónicos

Mba'éichapa jaiko vaerã ñande ru ndive

1Che rendúta

peẽ che ra'y kuéra

che niko pende ru,

pejapo ha'éva

ha peiko porãta.

2Ñandejára oipota

mitã nguéra ohayhu itúvape

ha ojapo mba'érõ isýpe.

3Ojapóva mba'érõ itúvape

ojeheja reíta chupe

iñangaipa,

4ha isýpe ombyajéva,

ombyaty heta mba'e imba'erã.

5Ombyajéva itúvape

oguerohorýta chupe

ta'ýra kuéra,

ha oñembo'e ramo

Ñandejára ohendúta chupe.

6Ombyajéva itúvape

oikove pukúta,

ojapóva Tupã rembiapoukapy

omomba'e isýpe.

7Ombyajéva Ñandejárape

omomba'e itúvape,

ijárape ramo guáicha.

8Che ra'y embyaje nde rúpe

ne rembiapópe ha ne ñe'ẽme

ikatu haguã ha'e nde rovasa.

9Ñande ru rovasa niko

omopyenda hatã ñande rogapy,

ñande sy jejahéi katu

ohapo'o.

10Ani revy'a rehechárõ

nde ru ohasa ñemotĩ,

upéva niko na ne mbotuichái.

11Peteĩ kuimba'e

ojeapo mba'érõ

itúva herakuã porãrõ,

ha kuña ojeapo'íva

omotĩ imemby kuérape.

12Che ra'y,

eñangareko nde rúre

ha oikove aja ani reheja rei.

13Naiñakã porãvéirõ jepe,

ehechakuaa chupe,

ani reapo'i chupe

ne resãi porãgui.

14Pytyvõ ñande rúpe

ndo'a mo'ãi tesaráipe,

ha'éta mymbajuka*f** ramo

ojeheja rei haguã

angaipa.

15Ho'a vaívo ndéve

Ñandejára

imandu'áta pe pytyvõ

nde rúpe reme'ẽ vaekuére

ha hykupáta

ne angaipa,

araitýicha kuarahýpe.

16Oheja reíva itúvape,

ojogua oñe'ẽ vaívape

Ñandejárare,

ha Ñandejára

ombojeharúta

isýpe ombopochývape.

Jejapo'ỹ

17Che ra'y,

emba'apo rejechaukase'ỹre,

ha nde rayhúta

umi ombovy'áva Ñandejárape.

18Nde tuichave pa'ũme

eñemomichĩve,

ha reñemoĩ porãta

Tupã ndive.

19Ñandejára niko

ipokatu eterei,

20ha chupe omomba'e guasu

umi ojejapo'ỹva.

21Ani reñepyta'ã

rehupyty haguã ikatu'ỹva,

ha ani avei reikuaase

mba'e hasy etereíva.

22Ejepy'a mongeta

umi mba'ére oje'e vaekue ndéve

rejapo haguã,

ndéve niko ndoúi ha ndohói

umi mba'e oñemíva.

23Ani rejepy'apy

umi mba'e nde rasávare,

mba'e ojekuaauka vaekue

hetáma ndéve guarã.

24Heta oĩ okañýva

oipyguara heta reígui

iñapytu'ũme,

ha umi mba'e vai oimo'ãva

omokarẽmba hemiandu.

25Na nde resái ramo

reínte rehechaséta,

ha ndereikuaái ramo

ani ere mba'eve.

26Ipy'a hatãva opa vaíta,

ha nde reko tarova ramo

reikopáta hese.

27Ipy'a hatãva

heta ohasa asýta,

omono'õta ojo'ári

angaipa.

28Ojejapóva naipohãi voi,

ñana vai roky hína umíva.

29Iñakã porãva

oñamindu'u ñe'ẽngáre,

ha iñarandúva

ojapysaka porã opa mba'ére.

Tupãmba'e

30Y ombogue tata rendy,

ha tupãmba'e

oheja rei angaipa.

31Umi mba'e porã ojapóvare

oĩta mandu'a,

ha ipysyrỹi ramo

oĩta ojokóva chupe kuéra.