Eclesiástico 31 - Biblia Guaraní con Deuterocanónicos

Mboriahu ha mba'e rereko

1Mba'eta rerekua

ndokevéigui nahesãivéi

angekói ja'u vaerãre

na ñane mongéi,

2ivaive mba'asýgui,

ndohejái jake.

3Mba'eta rerekua

oipota potave,

ha opytu'úrõ ikuerái

vy'águi.

4Mboriahu ojepy'apy

ndoguerekóigui ho'u vaerã,

ha opytu'úrõ opyta

mba'eve'ỹre.

5Oikóva óro rapykuéri

ndaheko joja mo'ãi,

ha viru pota ombojavýta

chupe haperã.

6Heta oñehundi vaekue

viru rapykuéri

ha ho'a ita jegua ñuhãme.

7óro niko ñuhã

hese itarovávape guarã,

ha ivýrova

ojekupy jokua pype.

8Ovy'aite vaerãpa

upe ipy'a potĩva

ha ndoikói óro rapykuéri!

9Máva piko upéva,

jarohory haguã chupe?

Ojapo niko imombe'upyrãva

hetãgua apytépe.

10Máva piko

ojepy'a ra'ã ra'e upéicha

ha ojejuhu ijoheipyre?

Upéva ipy'a guapy

ha herakuã porãta.

Ikatu ra'e oheja pe iporãva

ha ndohejaséi,

ikatu ojapo ivaíva

ha ndojaposéi.

11Upévare

oñeñongatu porãta

upe oguerekóva,

ha ñembyatyha rupi

heta ojererohorýta.

Karu guasu

12Che ra'y,

mba'eta rerekua mesápe

reguapýrõ, ani ere:

“Hetaite piko pe tembi'u!”

13Ne mandu'áke ivaiha

jahejárõ ñande resa

itaryrýi,

ñande resa hína

pe Ñandejára rembiapokue

ivaivéva,

ha upévare voi

oimeraẽ mba'érente hasẽ.

14Oma'ẽha gotyo nde rapicha

ani remondo nde po,

cháke oñembotáne ojuehe

pende po

ña'ẽmbe ryepýpe.

15Ehechakuaa nde rapichápe

nde jupéicha,

ha rejapo mboyve mba'eve,

ema'ẽ upe rejapótavare.

16Oñemoĩva ndévente he'u,

ani nde taryrýi

ha nderepyta vai mo'ãi,

ne mandu'a nde ykeregua

ndeichaguanteha avei

ha he'u pe ndéve oñemoĩva.

17Ta nde raẽ

upe he'íva iporãmaha,

ojeheko mbo'e porã

vaekuéicha,

ha ani nde karu eterei,

cháke repyta vaíne.

18Reguapýrõ mesápe

heta apytépe,

ani reipyso nde po nde raẽ.

19Sa'imínte iporãma

ojeheko mbo'e vaekuépe,

ha upéi ndojapajeréiri

hupápe.

20Okaru pokãva, oke porã,

pya'e opu'ã ha hetia'e,

Ikarúvape katu oha'arõ

kerasy, py'a jere ha py'a rasy.

21Oimérõ rekaru heta ra'e,

epu'ã, tereho mombyry eitypa

ha reñeñandu porãta.

22Che ra'y,

ehendu che ñe'ẽ,

upéinte reikuaáta

ko ha'éva ndéve;

ejejoko kuaa opa rejapóvape

ha noguahẽ mo'ãi ndéve

mba'asy.

23Oporomongaru porãvape

opavave oguerohory,

herakuã porã opa rupi.

24Oporomongaru'ivare

opa rupi oñeñe'ẽ ngururu,

ha heta ojetaky hese.

25Ani reñemongaria'yse

kaguy reheve,

cháke hetápema ohundi

pe kaguy.

26Tatápe ojekuaa

mba'eichaguápa

peteĩ tembiporu fiérro,

ha kaguy oikuaauka

poguasu kuérape

ojoja'ohápe

27kaguy oporombyetia'e

hekópe oje'úrõ.

Mba'e piko ñande rekove

ndajarekóirõ kaguy,

ojejapo vaekue vy'arã?

28Tory ha ñenandu porã,

kaguy oje'úva

hendápe ha hekópe.

29Py'aro hína pe kaguy

oje'u etereírõ

tuguy raku ha ñorãirõrã.

30Ka'u ombopochy vai

itavývape oity peve,

omokangy ha ohungapa chupe.

31Ho'u aja ani reja'o

nde rapichápe,

ani reapo'i chupe ovy'árõ,

ani reñe'ẽ reity

térã remotĩ chupe.