Eclesiástico 38 - Biblia Guaraní con Deuterocanónicos

Mba'asy ha mano

1Embyaje pohãnohárape,

reikotevẽ niko hese,

chupe avei Ñandejára ojapo.

2Tupãgui ou

pohãnohárape arandu

ha mburuvicha guasúgui

tembi'u.

3Imba'e kuaáre

pohãnohárare ojejerovia,

ha poguasu kuéra

ojapo chupe mba'érõ.

4Ñandejára omoheñói

pohã ñana yvy ári,

ha iñakã porãva

umíva nomboykéi.

5Ñandejára omohe'ẽ vaekue

yvyrápe upe y iróva,

ohechauka haguã opavavépe

ipokatu.

6Ha'e ome'ẽ mba'e kuaa

yvypórape,

oguerohory haguã chupe

imba'e rechapyrãre.

7Ko'ã pohãme

pohãnohára omombi mba'asy

ha pohã apoha

ombojehe'a ojuehe umi pohã.

8Upévare ndopa reíri

tekove ojapóva Ñandejára

ha hesãi joa yvypóra kuéra.

9Nde rasýrõ, che ra'y,

ani ne ate'ỹ,

eñembo'e Ñandejárape

ha ne mohesãita.

10Ejei ivaívagui,

epoi jepokuaa vaígui

ha emopotĩ nde py'apy

angaipágui.

11Eikuave'ẽ insiénso,

trígo iporãvéva,

ha mymbajuka*f** kyra

ndéve ikatuháicha.

12Upéi ehenoika

pohãnohárape,

aníke remboyke,

chupéko Ñandejára ojapo

ha nde reikotevẽ hese.

13Heta jevy

ipópe oĩ nde rekove.

14Ha'e kuéra avei

oñembo'éta Ñandejárape,

ikatu haguã

oikuaa ne mba'asy

ha ome'ẽ upe pohã hekopegua.

15Ojapo ivaíva Ijapoharére

upe ojapo'íva pohãnohárape.

16Che ra'y,

ne rasẽke omanóvare

reñembyasy etereírõ guáicha,

eñotỹ hetekue

ojejapoháicha

ha ejapóke hekoitépe.

17Ejahe'o hese

nde py'aite guive,

ejapo chupe ñeñotỹ

heko peguáva,

mokõi térã mbohapy ára

eñembyasy hese,

upéi katu epoi

mba'e mbyasýgui.

18Pe vy'a'ỹ niko

ñande juka avei

ha py'a rasy

ñane mokangypa.

19Ivai jave, vy'a'ỹ ipukuve

ha jeiko asy mante

ñane mbopy'a rasy,

20Anivéntema

ne mandu'a hese,

ha ema'ẽ katu nde raperãre.

21Omano vaekuéko ndouvéi,

mba'eve ndaikatu véima

rejapo hese,

ha nde jupe ikatu reñembyai.

22Ne mandu'a pe opavavépe

ojehúvare:

“Kuehe ha'e ha nde ko'ágã”.

23Omano vaekue opytu'úma,

ani remyangekói chupe

hese ne mandu'ávo.

Eñeha'ã evy'a jey,

ha'e niko ohóma.

Po rupigua tembiapo ha arandu

24Omba'e haíva arandu

okakuaáta

ndoguerekóirõ ambue mba'e

ojapo vaerã,

hembiaporã

chupe ndoiporupáirõ mante

iñarandu kuaa.

25Mba'éicha piko iñarandúta

kokuépe omba'apóva

ko'ẽ guive pytũ meve,

hymba guéi rehevénte oikóva

ha vaka ra'yrénte

oñe'ẽ kuaa?

26Arako'ẽre ha'e ombovo yvy

ha iñangekói hymba kuéra

rembi'urãre.

27Upéicha avei

opaichagua mba'apohára

omba'apo ára ha pyhare:

umi ta'ãnga apoha

ha umi óga mopu'ãha,

sapy'ánte omba'apo vaerã

pytũ meve

omoguahẽ haguã hu'ãme

peteĩ tembiapo.

28Avei fiérrore omba'apóva

oguapy fiérro mbotaha ykére,

oma'ẽ porã

pe fiérro omokarapãvare,

ha pe tata fiérro mboykuha

ohesypa chupe oipeju aja,

martíllo ryapu

ojoka ijapysa,

ndoipe'ái hesa

pe ta'ãnga ojapóvagui,

oñeha'ãmbaite

ojapopa haguã hembiapo

ha ndokevéi

ojapopa porã mboyve.

29Avei mbayru ñai'ũ apoha

oguapy hembiaporã renondépe,

ipýpe ombojere pe rruéda

ha hembiapóre

iñangekói mante,

omba'apo kyre'ỹ

ojapo heta haguã.

30Ipópe ojapo pe ta'ãnga

ha pe ñai'ũ ipýpe omohu'ũ,

oñeha'ã ombovera haguã

ha ndokevéi

omopotĩvo hatakua.

31Opa ko'ãva ipóre ojerovia

ha opavave ikatupyry

hembiapópe.

32Hese kuera'ỹ táva kuéra

ndoikói chéne, pype kuéra

ndaikatúi chéne ojeiko

térã ojeguata.

33Ñeheko mbo'erã katu

chupe kuéra ndojehekái

ha ñembyatyhápe

ndojererohory guasúi,

ndoguapýi mbojovakehára

apytépe, ha chupe kuéra

noñeporandúi hemiandúre.

34Ndohechaukái oikuaaha

poromohenda guigua,

ha ndojejuhúi

ijapytépe kuéra

kuatia arandu apoha.

Ha'e kuéra jepe

omopyenda hatã ko yvy

jaikoha ymaite guive,

hembiapo ipo rupiguápe.