Eclesiástico 43 - Biblia Guaraní con Deuterocanónicos

1Yvága jeroviaha

pe arapy potĩ ete,

ha omimbipaite asy

ikarapã pyko'ẽ!

2Kuarahy ojekuaávo

osapukái osẽvo:

Iporãite piko

upe Yvatetegua rembiapokue!

3Asajekue omyapekã yvy

ha ndaipóri ogueropu'akáva

hakukue.

4Oñehatapyña tatakua

fiérro oñemboyku haguã,

kuarahy katu ombyaku eteve

umi yvyty kuéra,

upe yvy omotĩmbopa

ha ñande resakã hata rendýpe.

5Ipokatu ete piko

Ñandejára ijapohare,

ha'e he'ívo

pya'ete oñani hape rupi!

6Avei jasy osẽ

hi'ára itépe,

ha hekoitépe ohechauka

ára ohasáva

ha umi irundyve

ára ñemoambue.

7Jasy rupi

jaikuaa arete kuéra,

ha henyhẽ rire oñemomichĩve.

8Hese oñema'ẽvo

pe mes oñembohéra,

ha iporãitéma niko

iñambuévo ohóvo!

Mba'e rechaukaha

ñorãirõháme guáicha,

omimbi reíva yvagapýre.

9Pe yvága ojeguaite

mbyjaita hendy joárõ,

jeguaka omimbipáva yvatete

oikohápe Ñandejára.

10Omoĩ haguégui

chupe kuéra Ñandejára

ha'e kuéra ndojeíri,

naikane'õi voi

hendáre oñangarekóvo.

11Ema'ẽmi

mba'e karapã jegua

araíre ojekuaáva oky jave,*f**

ha emomba'e guasu Ijapoharépe.

Iporãitéma

ko mba'e hechapyrãva!

12Omongora yvága

imimbipa jeguápe,

Ñandejára oipyso vaekue

ipokatúpe.

13Ñandejára he'ikuévo

ho'a pe amandáu,

ha opoi ára tirígui

ojapo haguã ha'e he'íva.

14Péicha avei oipe'a

imba'e ñongatuha rokẽ

yvága pegua,

ha arai kuéra

yryvúicha oveve.

15Ipópe ombohypy'a arai kuéra

amandáuicha isarambíva.

16-17Iñe'ẽ ára sunúicha

ombojepoka pe yvy

ha ipokatúpe ombokuchu

yvyty kuéra.

Ha'e he'írõ

oipeju yvytu yvyvogua,

yvytu pyryrỹi, yvytu pochy

ha yvytu ratã.

18Guyráicha

omboveve y rypy'a,

ha ho'ávo

tukúicha omyenyhẽ yvy.

Imimbikuépe

ñande resa mboty,

ha okukúirõ hína

ñane mbojurujái.

19Jukýicha omosarambi

ysapy ro'ysã,

ha umíva hypy'ávo

ñande kutu rasy ñuatĩcha.

20Oipejuka yvytu ro'ysã

yvatevogua,

ha pe y ro'ysã oñemohatã,

oguejy opaichagua y ári

ha ombyape hatã itáicha.

21Ohovere tatáicha

umi ka'aguy rovyũ

ha ñúre ohapy ñana rogue,

22pe ysapy oitývape katu

oipohãnomba jey,

ha yvytu aku rire

ome'ẽ jey piro'y asy.

23Iñarandu rupi

oguereko ipo guýpe yguasu,

ha omohenda mbytépe

tetã nguéra.

24Umi oikóva

y rupi mbayrúpe omombe'u

mba'eichaitépa ipyrusu,

ha ñahendúvo ñane pirĩmba.

25Upépe oĩ hembiapokue

hechapyrãva,

opaichagua oikovéva

ha pe tymba ipopenóva

Leviatán.*f**

26Hese ae

oho porã hembijokuáipe,

ha ha'e he'i rupi

opa mba'e oĩ hendaguãme.

27Ja'e ja'eve ramo jepe

nañaguahẽi chéne ijapýpe,

ñambopaha upéicha:

“Ha'e upe Opa mba'éva”.

28Ñamomba'e guasu manté

chupe,

ha'e niko tuichave

opa hembiapokuégui.

29Ñandejára,

kyhyjeha añetete,

ha'e tuichapa

ha ipokatu ndaijojahái.

30Perosapukái ha perohory

chupe, ikatukue jave,

ha'éko tuichave

gueteri hína,

perohorýrõ

perohoryve chupe,

ha ani pene kane'õ

ndapehupytypái ramo jepe.

31Máva piko ohecha ra'e

chupe, omombe'u haguã

mba'eichaguápa?

32Ko'ãvagui tuichavéva

hetave mba'e oĩ,

opa ojapo vaekuégui

michĩmínte jahecha.

33Ñandejára

upe ojapo vaekue opa mba'e,

ha ome'ẽ arandu

umi chupe ombyajévape.