Cantares 1 - Biblia Guaraní con Deuterocanónicos

Purahéi 1ha

1Purahéi iporãvéva Salomón rembiapokue.Kuñataĩ

2Embojamína che jurúre

nde juru.

He'ẽve niko guaviramígui

ne mborayhu.

3Che ã meve oguahẽ

ne ryakuã,

ha mba'e hyakuã porãva

ñehenguépe

nde réra che momandu'a.

Upévare, umi kuñataĩ

nde rayhu.

4Ñakañýna oñondive,

ha nde kotýpe pya'e che reraha

che ruvicha guasu.

Opurahéi joáva

Ne ndive rovy'aiténe,

rohechaga'uvéne kaguýgui

ne mborayhu re'ẽte.

Ndareíri kuñataĩ nguéra

nde rayhúva.

Kuñataĩ

5Kuña nguéra Jerusalengua,

che kamba ramo jepe,

che porã.

Che hungy niko

Cedargua rekoháicha,

ha che porã Salmagua

poyvi sãingóicha.

6Che pire hungy

ani pehecha.

Kuarahy che rapy hague

ani pema'ẽ.

Ipochýgui che ndive

che kyvy kuéra, che moĩ

parralty ñangarekóvo,

ha nañangarekói che jehe.

7Eremína chéve,

nde, che rekove mborayhu:

Mamo piko remongaru

ne rymba kuéra?

Mamo piko reraháva

opytu'úvo asajekue?

Mba'ére piko aikóta

roheka rei,

umi ne irũ nguéra

rymba kuéra apyte rupi?

Opurahéi joáva

8Reikuaa'ỹ ramo nde,

ne porãva opavave apytépe,

umi ovecha pypore

rapykuéri tereho,

ha emongaru ne rymbami,

ovecha rerekua kuéra

róga ypy rupi.

Karia'y

9Nde hína chéve guarã,

che mborayhu,

ku Faraón rendáicha

iporãvéva,

ikárro omboguatáva.

10Iporãitépa pe nde rova

umi ne namichãi pa'ũme.

Iporãitépa pe nde ajúra

mbo'y pérla ra'ỹireve

ojeguáva.

11Rojapóne katuete

ndéve guarã,

namichãi órogui

ojeguapáva.

Kuñataĩ

12Mesápe che ruvicha

oguapy aja,

che yvoty omyasãi hyakuãngue.

13Che rembiayhúko chéve guarã,

mba'e ryakuã porã

che pyti'a ohupapóva.

14Che rembiayhúko chéve guarã,

ku pacholi ryakuãicha,

En-Gadi parraltýre.

Karia'y

15Ne porãitépa, che rembiayhu.

Ne porãitépa!

Jeruti mokõi

umi nde resa.

Kuñataĩ

16Ne porã, che rembiayhu.

Ne porãitépa!

Karia'y

Kapi'ipe hovyũ asýva

ñande rupa.

17Umi kuri'y niko

ñande róga jokoha,

umi tajy katu

ñande róga ape.