Eclesiástico 5 - Biblia Guaraní con Deuterocanónicos

Jeroviase ijehe hekope'ỹ

1Ani rejerovia ne mba'e retáre

ha ere: “Areko hetáma”.

2Ani rejerovia ne mbaretére

reiko haguã nde akãre.

3Ani ere: “Ndaipóri

oñemongaria'y vaerã chéve”,

cháke Ñandejára

omyengovia peteĩ-teĩme

hembiapokuére.

4Ani ere: “Ajapo ivaíva

ha mba'eve ndojehúi chéve.”

Ñandejárako

oporoha'arõ kuaa.

5Ani ere,

ha'e oheja reíta chéve,

ha akóinte rejapo reikóvo

ivaíva.

6Ani ere:

“Ha'éko

oporoporiahurereko iterei.

Ajapo ramo jepe heta ivaíva,

ha'e oheja reíta chéve.”

Ha'e niko

oporoporiahurereko añete,

opáichavo ipochy avei

ha ipochy vai

umi iñangaipáva ndive.

7Embopuku'ỹke

rejevy haguã Ñandejárape

ha ani reheja rehóvo

ko'ẽrõ guarã,

cháke ipochýne

reimo'ã'ỹhágui

ha sarambi

ojapóne nde hegui.

8Ani rejerovia umi mba'e

rehupyty vaekuére

monda rupi,

na ne pytyvõ mo'ãi

oúvo nde ári ivaíva.Ani nde rova mokõi

9Ani reheja

nde reroveve oimeraẽ yvytu

térã reho oimehápe rei.

Upéicha niko ojapo

hova mokõiva.

10Epyta hatã pe ere vaekuépe

ha ani nde rova mokõi.

11Nde pya'e

reporohendu haguã

ha ta ne mbegue uvei

reñe'ẽ haguã

oñeporandu ramo ndéve.

12Reikuaa ramo,

ere pe oñeporandúva ndéve,

ỹrõ, ekirirĩnte.

13Pe ja'éva,

ikatu ñane mbotuicha

térã ñane motĩ,

ñande jurúgui osẽva

ikatu ñane rundi.

14Toje'e'ỹke nde rehe

ne juru my'ỹiha,

ha ani reporomoñuhãse

ne ñe'ẽme.

Ñemotĩ ho'aháicha

mondaháre,

tova api opaichagua

oĩ ijapúvape guarã.

15Ani rejapo avavére

mba'eveichagua ivaíva,

ha ani oiko nde hegui

ja'e'ỹha irũ tee rangue.