2 Macabeos 6 - Biblia Guaraní con Deuterocanónicos

Israelgua kuéra ojejopy vai ojeroviágui Tupãre

1Ndohasa pukúi mburuvicha guasu omondo haguã peteĩ myakãhára*f** Atenas guápe ojopývo umi Israel guápe oheja haguã itúva kuéra ypykue reko ha Tupã rembiapoukapy

2omomarã haguã Jerusalén pegua tupao omboykévo tupã gua'u Zeus Olímpicope guarã, ha pe tupao yvyty Guerizim pegua katu aipo Zeus Hospitaláriope guarã, ojerure haguéicha umi upépe oikóva.

3Israelgua kuérape hasy ha ipohýi ogueropu'aka haguã umi mba'e vaieta.

4Umi mombyrygua ojapo pe tupaópe heta mba'e vai, vy'a guasu-guasu ojeikohápe kuña reko vai ndive pe tupao rogaguy rupi. Hi'arietegua, ogueraha tupaópe umi mba'e ikatu'ỹva oñemoinge ipype.

5Pe altar katu omyenyhẽ tymbágui, tembiapoukapy he'íva ndaikatuiha oñekuave'ẽ.

12Ajerure umi ko kuatia ohechávape, ani haguã oñemondýi ko'ã mba'e vaietáre, tohecha kuaa uvei, umi ñenupã umíva ñane retãgua ojeheko mbo'e haguãnteha, ndaha'éi oñehundi haguã.

13Tupã ohechauka ipy'a porãha ndoheja reíri ramo mba'e vai apohápe, pya'e oinupã ramo uvei;

14oinupã haguã umi tetã mombyry guápe, Ñandejára heta oha'arõ heta eterei peve umi mba'e vai apo, ñandéve katu

15ñane nupã ñane rembiapo vai hetaite mboyve.

16Ha'e niko ndoipe'ái ñande hegui iporiahurereko, ha ñane reko mbo'e ramo jepe heta jehasa asy rupi, na ñande reja reíri.Is 54.7-8; Jdt 8.25-27; Sab 11.9-10; 12.2-22; 2 Co 4.17.

17Taiporãma ko'ágã ñane mandu'a ko'ã mba'ére, ha japytami rire, ñamombe'uve jahávo.

Eleazar ojejuka

18Eleazárpe, itenondéva tembiapoukapy mbo'épe, itujámava ha imba'e porãva, oñembojuru pe'ase mbaretépe ho'u haguã kure ro'o.Lv 11.7-8.

19Ha'e katu, omanose uvei hekópe porã oikove rangue ñemotĩme, ha ha'ete oho ojejuka haguãme

20ondyvu rire pe so'o. Ojapo ojapoháicha umi oikuaa porãva mba'épa ndojapói vaerã, omano vaerã jepe.

21Umi omyakã vaekue hína pe jekaru Tupã rembiapoukapy ndohejáiva, ha yma guivéva oikuaáva Eleazárpe, omoha'eño ha he'i chupe, ogueruka haguã so'o ikatúva ho'u ha to'u ho'u ramo guáicha pe so'o mymbajukápe*f** guare, mburuvicha guasu he'i haguéicha.

22Upéicharõ ndojejuka mo'ãi, ha ha'e kuéra, aréma ojokuaágui, ipy'a porãta hikuái hendive.

23Eleazar katu ojapo peteĩ mba'e ho'áva iñakã rague morotĩre. Imitã guive ohechauka vaekue ombyajeha Tupãme ha ojapo hague hembiapoukapy marangatu, ha he'i chupe kuéra: “Pe che juka mandi voi.

24Che tujáma ha naiporãi aporombotavy. Ndaipotái umi mitãrusu oimo'ã, che, Eleazar, 90 áñoma ambotýva, ajere hague tupã mombyry guápe,

25ha che rova mokõi rupi aikovemive haguã rehehápe, ha'e kuéra ho'a jejavýpe che rembiapo vaikuére, ha aity che ári terakuã vai ha ñemotĩ.

26Upéi ave, nañenupãukái ramo jepe ko'ágã yvypóra po rupi, aikove aja térã amano rire ndajei mo'ãi voínte pe Ipu'akapáva pógui.

27Aipórõ, ndakyhyjéi ame'ẽ haguã che rekove ha nañemotĩri che tujakue,

28ha aheja mitã rusu kuérape peteĩ mba'e hechapyrãva, ahechaukávo che py'a guasuha amano haguã Tupã rembiapoukapýre.”

He'ívo péicha, ha'e ijehegui oho ojejuka haguãme.

29Umi ogueraháva chupe, ohendúvo umi he'íva, ha'e kuéra oguerekóva itarováva ñe'ẽ ramo, ipy'a porã haguégui oñepyrũ oñemboharái hese,

30Eleazar katu, omano nguévo pe ñenupãnguére, he'i pyahẽ pa'ũme: “Ñandejára oikuaa porã opa mba'e ojavy'ỹre. Ha'e oikuaa ikatu vaerã mo'ã hague namanói, ha ndahasái ko'ã mba'e rasyeta, ha oikuaa avei che py'apýpe avy'a etereiha ahasa asy ramo jepe, ambyajégui chupe.”

31Ha péicha, Eleazar omano rire oheja mitã rusu kuérape ha tetãgua maymávape ave, py'a guasu ha teko potĩ rechaukaha.