Eclesiástico 6 - Biblia Guaraní con Deuterocanónicos

1Péicharõ niko

ne rerakuã vai

ha reñemotĩ etereíta.

Rejererekóta

tekove aña tova mokõirõ.

2Ani reheja ipu'aka nde rehe

tuguy raku,

cháke tóroicha

opu'ãta nde rehe,

3ne rakã nguéra ho'upáta

ha hi'a oñehundíta.

Yvyra pirukuéicha repytáta.

4Tuguy raku eterei

oporohundi,

ha ñande a'e'ỹháme

ombopuka ñande rehe.

Irũ reko añetegua

5Reñemongeta kuaa ramo

reporombyatýta nde jehe

ha reñe'ẽ porã ramo

rejererohorýta.

6Taheta ne momaiteíva,

ne reko mbo'éva katu

ta peteĩnte.

7Rejuhúrõ ne irũ teerã,

eñeha'ã eikuaa porã raẽ

ha ani pya'e eterei

rejepokuaa hese.

8Oĩ niko ne moirũva

ou porã ramo chupe,

ha hese reikotevẽ ramo

mamove nderejuhúi.

9Oĩ irũ tee nde rehe

oñemoĩva,

ha ne motĩ haguã omombe'u,

mba'érepa pejoavy.

10Oĩ ne moirũva karuhápe,

ha ho'a vaívo ndéve

nderehechavéi chupe.

11Ndéve ou porã aja

oĩta ne ndive,

ha ho'a vaívo ndéve

nde rejáta.

12Ojehu vai ramo ndéve,

mba'eve ndoikuaase mo'ãvéi

ha okañýta nde hegui.

13Ejei nde rehe ija'e'ỹvagui

ha eiko pyrũ kuaápe

nde rayhúva ndive.

14Peteĩ irũ tee jeroviaha,

upéva hína mo'ãha

jaiko haguã kyhyje'ỹre.

Ojuhúva peichagua,

ojuhu pláta yvyguy.

15Peteĩ irũ tee jeroviaha,

mba'e jajogua'ỹva hína,

ndaikatúi jaikuaa pe hepykue.

16Peteĩ irũ tee jeroviaha,

po'a reruha hína,

Ñandejárape ombyajéva

ojuhúta katuete.

17Ñandejárape ombyajéva,

oiko kuaa iñirũ tee ndive.

Hembiapokue niko iporã

iñirũ rembiapokuéicha.Arandu

18Che ra'y,

ne mitã rusu guive

eheka temimbo'e

ha nde tuja peve

rejuhúta arandu.

19Oyvymbovo ha oñemitỹva

omba'apoháicha

heta ñemono'õ ra'arõvo,

reñotỹvo arandu ne kane'õta

ha vokóinte re'úta pe hi'a.

20Ivýrova ikuerái chugui,

ha itavýva ndogueropu'akái.

21Ita pohýicha

hi'ári oguapy,

ha pya'e chugui ojetyvyro.

22Pe arandu niko,

héra he'iháicha,

ndojechaukái hetápe.

23Che ra'y,

ehendu che remiandu,

ani remboyke pe che ha'éva.

24Emoinge nde py,

arandu yvyra kuápe,

ha isãme ne akã.

25Emokarapã nde ati'y

ha ehupi,

ha ani isã nembopochy.

26Eñemboja hese

nde py'aite guive,

eiko kyre'ỹ kena hapére.

27Eguata ipy porére

ha eheka,

ha'e voi ndéve ojekuaaukáta.

Rehupytývo,

anive repoi chugui.

28Amo ipahápe nemombytu'u

ha ne mbovy'áta.

29Ijyvyrakua ha'éta

ne mo'ãha mbarete

ha iñakãsã, nde ahoja jegua.

30Imba'e pohýi ha'éta

jeguaka óro,

ha isã nguéra, sã pytãũ.

31Ao jeguápe ramo guáicha

pype reñemondéta,

ha nde syváre remoĩta

akãngora jajáicha.

32Nde reipotárõ, che ra'y,

ne arandúta,

he reñeha'ã ramo,

reikuaáta opa mba'e.

33Reporohendu kuaa ramo,

rejetavy'óta,

rejesareko ramo, ne arandúta.

34Tereho ijatyhápe

myakãhára,*f**

ha rejuhúrõ iñarandúva,

eñemoirũ hese.

35Eñeha'ã ehendu porã

umi mba'e oñemyesakãva,

ha ani haguã okañy nde hegui

umi ñe'ẽnga hypy'ũvéva.

36Rehechárõ kuimba'e

iñakã porãva,

pya'e eñemboja hendápe,

ha tereho hógape py'ỹi.

37Ejepy'a mongeta

Ñandejára rembiapoukapýre

ha eñamindu'u mante

upe he'ívare.

Ha'e voi ne myakã guapýta

ha ome'ẽta ndéve

upe arandu nde reipotáva.