Salmos 58 - Biblia Guaraní con Deuterocanónicos

Poguasu kuéra oñemombarete

1David rembiapokue.

2Peẽ poguasu:

Peẽ piko peimo'ã

opa mba'e pejéva oĩ porãha?

Peimo'ã piko

hekópe peporosãmbyhyha?

3Ndaupéichai hína.

Ivaíva pejapo,

ha pende rapicha ndive

pejopy vai.

4Iñañáva niko

oikove ypy guive voi heko aña,

isy ryepyguivéma voi

osẽ ipo karẽ ha ijapu.

5Mbóicha,

ñande su'u ramo ñande juka.

Mbóicha,

ijapysape ha mba'eve nohendúi,

6ani haguã avave

pajépe oipohano,

ha omokañy chupe.

7Tupã che Jára,

eitypa umi hãi nguéra,

ha ehãi'o umi jaguarete.

8Ku ysyrýicha toho topa rei,

ku ñana oñembope vaicha ta ipiru.

9Ta hyku,

jatyta hendy syrýpe hykuháicha,

ha ára resa tohecha'ỹ

ku mitã membykuáicha.

10Ku kapi'i pororo týicha tojepota

yvyra rakãicha yvytu tomopẽmba.

11Tupã rehe ojeroviáva ovy'áne

ohechávo mba'éichapa

oñemyengovia iñañávape.

Hembiapo vaíva ruguykuépe

ha'e ojepyhéine.

12Opavave upérõ he'íne:

“Hekopete omyengovia ra'e Tupã

imarangatúvape.

Tupã ra'e upe oporombojovakéva

ko yvy ape ári.”