Sabiduría 3 - Biblia Guaraní con Deuterocanónicos

Imarangatúva rekove

1Imarangatúva rekove

oĩ Tupã pópe,

ha teko asy

ndohupyty chupe kuéra.

2Tapicha tavýpe guarã

ha'e kuéra omanóma,

oimo'ã mba'e vaiha

imarangatúva mano,

3ha ijeho ñande apytégui

ñehundiha.

Imarangatúva katu

oiko py'a guapýpe.

4Yvypórape guarã

ha'e kuéra oho oñenupãvo,

imarangatúva katu oha'arõ

nomanóivo araka'eve.

5Oñenupãmi ramo jepe

tuicha mba'e iporãva ohupyty.

Tupã oipy'a ra'ãvo chupe

ojuhu nomotĩri hague chupe.

6Óroicha omoĩ chupe tatápe,

ha ojuhu porã

mymbahapy ojuhu porãháicha.

7Upévare omimbipáne

Tupã renondépe,

ha ojehecháne

tata pirirícha kapi'itýre.

8Ombojovakéne tetã nguérape

ha heta yvypóra

oguerekóne ipo guýpe,

ha Ñandejára ha'éne

huvicha guasu opa ára.

9Hese ojeroviáva

oikuaáne añetegua,

ha oñemboyke'ỹva chugui

oĩne ijykére mborayhúpe.

Jeporiahurereko ha jopói

iporavopývape guarã.

10Umi ipy'a hatãva katu

oñenupãne mba'e vaieta

oñandu ha ojapo vaekuére,

ojahéigui heko jojávare

ha oñemboyke Ñandejáragui.

11Arandu

ha teko mbo'ére ojahéiva

ndaipo'ái.

Opa oha'arõva havẽ,

oñeha'ã rei,

ha hembiapo kuerakue

ndaha'éi mba'eve.

12Itavy tavy ikuña kuéra

ha itie'ỹ tie'ỹ ta'ýra

ha tajýra kuéra,

iñemoñare katu ojeharúta.

13Tovy'a kuña

ikatu'ỹ vaekue imemby

ha ndaiky'áiva oñenógui

kuimba'e ndive hekope'ỹ.

Ome'ẽne ijehegui iporãva

ára paha oguahẽvo.

14Tovy'a avei

umi oñeha'ỹi'o vaekue,

ndojapói vaekue ivaíva

araka'eve,

ha naimandu'a vaíriva

Ñandejárare.

Heko jerovia haguére

ojehecha kuaa porãne chupe,

ha oguerekóne hendaguã

Ñandejára tupaópe.

15Tembiapo teko porãme guare

omimbipáva,

ha arandu rapo ndaitujúi

maramove.

16Hembireko omyakã ratĩva,

ta'ýra kuéra ndokakuaái chéne,

ha iñemoñare heko'ỹmeguáva

oñehundíne.

17Oikove puku ramo jepe

ndaha'éi chéne mba'eve,

ha ipahápe

itujakue oikóne ñemotĩme.

18Omano voi ramo

mba'e nipo oha'arõne!

Omoirũmi vaerã chupe jepe

ñembojovakeha árape

ndojuhúi chéne.

19Umi iñañáva

ñembyasyhápe opa.