Eclesiástico 50 - Biblia Guaraní con Deuterocanónicos

Pa'i guasu Simón

1Pa'i guasu Simón vaekue

upe omyatyrõka

ha omombarete vaekue Tupao.

2Omopu'ãka jey táva tápia

ha óga yvate

oñemombarete haguã

mburuvicha guasu róga,

3Ojo'ouka avei y rendaguã,

tuicháva yguasúicha.

4Omo'ã hetã guápe

mondahágui,

ha omombarete upe táva

oñemongora ramo guarã.

5Mba'eichaitépa

omimbipa vaekue,

chupe ombojerérõ hetã guára

Tupã kotýgui osẽvo!

6Mbyja ko'ẽicha arai pa'ũme,

ha ñasaindýicha

jasy renyhẽ jave.

7Kuarahýicha ohesapéva

upe Yvatetegua Tupao,

ha mba'e jegua karapãicha

arai ombojeguáva oky jave.

8Ára yvoty pegua

rrósa potýicha,

asaha potýicha

ykua yvu rembe'ýpe,

Líbano rokýicha ára hakúpe.

9Tatapỹi ha insiénsoicha

imyatatĩháme,

jey'uha órogui

ijapopyréicha,

ita verápe ojeguapáva.

10Olívoicha

hi'águi henyhẽva,

ha kuri'ýicha

araíre ipojáiva.

11Oñemonde kate asy ramo

ipa'i ao jeguápe,

ha ojupi péicha

oñembo'e haguãme,

omyenyhẽva mimbipágui

pe tupao ryepy.

12Pa'i kuéra

ome'ẽrõ chupe imba'erãva

ha'e oñembo'ými

altar rata rovái,

ha ita'ýra kuéra

Líbano rokýicha

ombojerémi chupe.

13Aarón ra'y kuéra

ijeguapápe,

Ñandejárape ikuave'ẽmbyre

ipópe kuéra,

omongorámi chupe

karanda'ýicha

opa tetã guára renondépe.

14Ha hembiapo ramo altárpe,

omba'e kuave'ẽvo upe Yvatetegua

ipu'akapávape,

15ipojáimi upe ojey'uháre,

ha oñohẽvo pe parral rykuere

ohekuavómi altar pýre,

hyakuã asy haguã

upe Yvategua ipu'akapávape.

16Upérõ Aarón ñemoñaréva

osapukái joámi,

ha ombopu itrompéta kuéra

ohendukávo tyapu mbarete,

mandu'arã upe Yvatetegua

renondépe.

17Ha opa tetãgua,

oĩ haguéicha,

oñesũ ha omboja isyva yvýre,

omomba'e guasu haguã

Ijárape, upe Yvatetegua

ipu'akapáva.

18Ha umi opurahéiva

ohenduka aja jererohory,

ha pe tyapu pa'ũme oñehendu

purahéi re'ẽ asy,

19umi tetãgua ojerure asy

upe Yvatete guápe,

ha oñembo'e

ipy'a poriahurerekóvape,

opa peve upe ñemomorã

ha oguahẽ ijapýpe

tupao pegua ñembo'e.

20Upérõ ha'e oguejými

ha ohupi ipo yvate

Israelgua aty ári,

ha Ñandejára rérape

oporohovasa

héra omoñe'ẽ rorývo.

21Ha opavave oñesũ jeými

ohupyty haguã upe Yvatetegua

jehovasa.

22Ha ko'ágã jarohory

Tupã Israel Jára

ipu'akapávape,

opa rupi ojapóva

mba'e hechapyrãva,

ñane momba'e vaekue

ñande sy rye guive,

ha ñande

poriahurerekoite vaekue.

23Ha'e

ta ñane mbopy'a rory,

tombopy'a guapy Israel guápe

ñande jaikove aja,

opa árape guarã.

24Ta ñande

poriahurereko mante,

ha ta ñande pe'a ivaívagui

jaikove aja pukukue.

Tetã nguéra Israel rehe ija'e'ỹva

25Oĩ mokõi tetã

ndacha'eiha,

ha pe mbohapyha

ndaha'éi voi tetã:

26Umi yvyty Seírpe oikóva,

filistéo kuéra,

ha umi tekove tavy

Siquem pegua.Ipahávo

27Temimbo'e, arandu

ha mba'e kuaágui henyhẽva,

ko oheja vaekue kuatiáre

Jesús Sirá ra'y,

Eleazar Jerusalengua ra'y,

ha ohekuavo vaekue

amangýicha

iñe'ã megua arandu.

28Ovy'aite vaerãpa

umi oñamindu'u mantéva

ko'ã ñe'ẽre!

Upe ipy'apýpe

ko'ãva oñongatúva

iñarandúta.

29Umi ko'ã mba'e ojapóva

oĩta opaicharãicha,

Ñandejára ohesapeha rupi

oikóta.