Eclesiástico 34 - Biblia Guaraní con Deuterocanónicos

Kepegua

1Ivýrova oha'arõ rei

heta mba'e ikatu'ỹva ohupyty

ha iképe ohecháva

omboveve chupe yvate rei.

2Nde képe guare reroviárõ,

ha'ete ku reñañuãrõ kuarahy'ãme

térã remuñárõ guáicha yvytu.

3Rehecháva nde képe niko

peteĩ ta'ãnga rei,

nde rova ra'ãnga

rehecháva ysyrýpe.

4Iky'ávagui piko

mba'éicha osẽta ipotĩva,

ha japúgui añete?

5Mba'e ñemi

ojehútava kuaa

térã képe guare,

umíva výro rei,

ha'ete umi mba'e

kuña imembýta jave hína

ohecháva.

6Ndaha'éirõ oúva

pe Yvateteguágui

peteĩ jechauka rupi,

ejepy'apy'ỹ umívare.

7Hetápe omokañy

iképe guare,

ha umívare ojerovia haguére

ho'a vai chupe kuéra.

8Tova mokõi'ỹre

jajapo vaerã

Ñandejára rembiapoukapy,

juru jeroviahágui osẽva

arandu hekopegua.

9Oiko vaekue opa rupi

heta mba'e oikuaa,

hembiasakue hetáva

oñe'ẽ kuaa hekópe.

10Ndogueropu'akái vaekue

ipohýiva

sa'i oikuaa,

oiko vaekue opa rupi katu

ikatupyry.

11Heta mba'e ahecha

aiko hague rupi,

ha hetave amombe'úvagui

aikuaa.

12Heta jevy aime vaekue

amano haguãicha,

ha ko'ã mba'e rupi

asẽ porã jey.

13Ñandejárape ombyajéva

espíritu oikovéta,

ojeroviágui

upe ivaívagui oporope'ávare.

14Ñandejárape ombyajéva

ndokyhyjéi mba'evégui,

ha noñemondýiri

ojeroviágui hese.

15Ovy'aite vaerãpa

pe Ñandejárape ombyajéva!

Máva pópepa oñemoĩ,

mávarepa ojeko?

16Ñandejára ojesareko mante

umi chupe ohayhúvare,

ha'e imo'ãha mbarete,

ijekoha oĩ hatãva,

imo'ãha pytu aku

ha kuarahy akúgui asajekue,

ñepysãnga ha je'águi jokoha.

17Ha'e oporombopy'a piro'y

ha oporohesa pe'a,

oporomohesãi,

oporomoingove

ha oporohovasa.

Mymbajuka*f** hekopegua

18Mymbajuka imondapyréva

iky'a,

iñañáva kuave'ẽmby

ndojererohorýi.

19Upe Yvatetegua

ndoguerohorýi

heko añáva mymbajuka,

ha oikuave'ẽ hetavérõ jepe

ndoheja reíri chupe

iñangaipa.

20Ojuka ta'ýra

itúva renondépe

upe oikuave'ẽva mymbajuka

mboriahúgui oipe'a vaekue.

21Pe tupãmba'e hína

tapicha oikotevẽva rekove,

upe nome'ẽséiva

ojuka chupe.

22Hapichápe ojuka

pe oipe'áva chugui hembi'urã,

mba'apohára ruguy oñohẽ

pe nome'ẽiva chupe

hembiapokue repy.

23Peteĩ omopu'ãrõ

ha ambue oitýrõ,

mokõive ikane'õ rei.

24Peteĩ oñembo'érõ

ha ambue ojahéirõ,

mávapepa ohendúta Ñandejára?

25Upe oñemopotĩva*f**

opoko haguére omanóvare

ha upéi opoko jey hese,

maerã iporã ra'e chupe

upe ñemopotĩ?

26Péicha avei okaru'ỹva

ojeheja rei haguã chupe

hembiapo vaikue

ha upéi katu ojapo jeýva.

Máva piko ohendúta iñembo'e?

Maerã piko iporãta chupe

oñembyasy hague?