Sabiduría 7 - Biblia Guaraní con Deuterocanónicos

Yvypórante avei Salomón

1Che avei opavave yvypóraicha,

aju vaekue ñande ru ypykuégui,

ajejapo vaekue yvýgui,

che sy ryépe okakuaa che rete,

2Huguýpe che mombarete

10 mése aja,

che ru ñehengue

ha vy'a oporomongévare ae.

3Che avei ajúvo ko yvy ári

che pytuhẽ opa yvypóraicha,

ha aju ko yvýpe opavavépe

omoguahẽva peteĩcha

ha añeñanduka ypy opavavéicha

che rasẽnguévo.

4Añemongakuaa kunu'ũ

ha mitã apytépe.

5Mburuvicha guasu

péichante oikove ñepyrũ.

6Peteĩcha

ñañepyrũ jaikove

ha peteĩcha avei

japa jey.

Arandu tuichave opa mba'égui

7Upévare añembo'e,

ha oñeme'ẽ chéve

jeiko kuaa,

ajerure asy

ha oguejy che ári,

pe arandu espíritu.

8Mburuvicha guasu

guapyhágui ahayhuve,

henondépe

ndaha'éi mba'eve mba'e reta.

9Mba'eveichagua

ita jeguáre nambojojái,

óro jepeve ijykére

yvyku'ínte

ha pláta katu

hovái tuju rei.

10Ahayhuve porã

ha tesãigui,

ha ára resakãgui

ahayhuve avei,

pe hendykue

araka'eve ndopáigui.

11Chéve hendive

ou opa mba'e porã,

ipópe oguerekóva

ndojepapa kuaái.

12Heta mba'e porã

reheve avy'a,

arandu oguerúgui chéve,

ndaikuaái jepe

chugui ouha.

13Arandu aikuaa py'a potĩme

ha na che rakate'ỹi hese,

imba'e reta

nañongatúi avavégui.

14Arandu niko

yvypórape guarã

peteĩ mba'e porã hypa'ỹva,

ohupytýva oiko porã

Tupã ndive,

Ñandejára niko ojuhu porã

pe ha'e rupi jaikuaáva.

15Tupã tome'ẽ chéve

añe'ẽ kuaa haguã,

ha che remiandu taiporã

pe mba'e kuaa

ahupyty vaekue rupi.

Ha'e voi niko

pe arandu sãmbyhyha,

ha omboguata iñarandúvape.

16Ipópe ñaime

ñande ha ñane ñe'ẽ,

ha opa arandu ha katupyry

ñamba'apo kuaa haguã.

17Ha'e oikuaauka porã

vaekue chéve opa mba'e

ko arapy pegua,

aikuaa porã haguã

heko ha ipype omýiva:

18Ára ñepyrũha,

mbyte ha ipaha,

Mba'éichapa

ára ha pyhare ojoja,

ha Mba'éichapa

ojopyru ára haku ha ro'y,

19año jere

ha mbyja kuéra renda,

20Opa mymba reko

ha tymba ñarõ pochykue,

espíritu kuéra pokatu

ha yvypóra remiandu,

ñana nguéra opaichagua

ha maerãpa iporã hapo.

21Aikuaapa opa mba'e,

ojekuaáva ha ojekuaa'ỹva,

che mbo'égui arandu,

ha'e niko opa mba'e apohare.

22Arandúpe oĩ espíritu

imba'e kuaáva,

imarangatúva,

ha'énteva, opaichaguáva,

ikatupyrýva, iñakã porãva

ipotĩva, hesakãva, ndaitujúiva,

ohayhúva iporãva,

imba'e porãva,

ohecha pukúva,

23naisãiva, ipy'a porãva

ohayhúva yvypórape,

opyrũ hatãva, ndokyhyjéiva,

ipy'a guapýva, ipu'akapáva,

ohechapáva,

oikéva opa espíritu

iñakã porãvape,

ipotĩvape, ha isatĩvape.

24Arandu oku'eve

opa omýivagui,

ipotĩ porãgui

oike ha ohasa opa mba'e.

25Ha'e hína

Tupã pokatu pytu,

mba'e potĩ osẽva

Ipu'akapáva reko mimbipágui,

upévare mba'eve iky'áva

ndojái hese.

26Ha'e mba'e rendy opa'ỹva

tesape,

mba'e potĩ ojehechaha

Tupã rembiapokue,

ha ipy'a porãngue ra'ãnga.

27Peteĩnte ramo jepe,

chupe guarã ikatupaite;

omyengovia'ỹre mba'eve,

ombopyahu opa oĩva,

opa ára oike

imarangatúva py'apýpe

ojapo haguã chugui kuéra

Tupã rayhuha

ha imaranduhára.

28Tupã ohayhu

arandu rayhuhárape.

29Ha'e iporãve kuarahýgui

ha ojajaive mbyja kuéragui,

ára sakãgui jepe ohesapeve,

30ára rire ou pyhare,

ha arandúre

ndaipu'akái mba'eve.