Proverbios 10 - Biblia Guaraní con Deuterocanónicos

Salomón ñe'ẽngue

1Mitã iñarandúva

ombovy'a itúvape,

itavýva katu

omoñembyasy isýpe.

2Imonda pyre

naiporãi avavépe guarã,

teko joja katu

ñande pe'a manógui.

3Ñandejára ndohejái

heko porãvape iñembyahýi,

teko aña taryrýipe katu

ohape joko.

4Omba'apo'íva imboriahu,

ikatupyrýva katu imba'e reta.

5Ombyatýva hi'árape

iñarandu,

kóga oñemono'õ jave okéva

itavy.

6Umi imba'e porãvape

ojehovasa meme,

heko añáva katu

oñorãirõse mante.

7Umi imba'e porã vaekuére

maymáva imandu'a,

iñañáva katu tesaráipe opa.

8Ipy'a porãva iñe'ẽ rendu,

iñe'ẽ reíva katu oñehundi.

9Hekópe porã oikóva

ndokyhyjéi mba'evégui,

umi heko vaíva katu

vaípe ojecháne.

10Ijapeguy peguáva

oporomoingo asy,

továpe porã oñe'ẽva katu

ome'ẽ py'a guapy.

11Heko jojáva ñe'ẽ

oporomoingove,

heko añáva katu

oñorãirõse manté.

12Py'aro ogueru ñorãirõ,

mborayhu katu ombogue

jejavykue.

13Iñarandúva jurúpe

jajuhu mba'e kuaa,

itavýva apére katu

jaitýne teju ruguái.

14Iñarandúva

heta mba'e oikuaa,

itavýva oñe'ẽ ramo katu

ivaíva ogueroja.

15Imba'e retávape

omo'ã iviru,

imboriahúva katu

imboriahúgui oñehundi.

16Hekopegua jajapo ramo

jaikove,

ñane rembiapo vai ramo katu

ivaíva jeýnte

ñande rehe jaity.

17Oñembo'eháicha ojapóva

oikovéta,

iñe'ẽ rendu'ỹva katu

oñehundíta.

18Ohechauka'ỹva ipochyha

tekove japu hína,

oñe'ẽ reíva hapicháre

itavy.

19Oñe'ẽ heta reíva

ojavy katuete,

iñarandúva katu

okirirĩ kuaa.

20Heko jojáva ñe'ẽ

órore oñembojoja,

teko aña oñandúva katu

naiporãi mba'everã.

21Heko jojáva ñe'ẽ

hetápe ou porã,

ha tavýpe oikóva

tavýpe jey opa.

22Ñandejára rovasa

ñane myakã rapu'ã,

ha ñande jajapóva

mba'eve nombojo'ái.

23Umi itavývape

hembiapo vai ombovy'a,

iñakã porãvape mba'e kuaa.

24Heko añávape ojehúne

okyhyjeha,

heko jojávape katu

oñeme'ẽne hembipota.

25Heko añáva ndopytái

yvytu ratã rapykuerépe,

heko potĩvare katu

mba'eve ndopokói.

26Iñate'ỹva jejokuái,

tesa ko'õ ha tãi jehýi,

peteĩnte.

27Remomba'e ramo Tupãme

reikove pukúne,

nde reko aña ramo katu

reikove mbykýne.

28Heko jojáva

remira'arõ oguahẽ torýpe,

heko añáva katu oha'arõ rei.

29Ñandejára oipytyvõ

heko porãvape,

hembiapo vaívape katu ohundi.

30Heko jojáva

ndokyhyjéi mba'evégui,

iñañáva katu

ndoikove chéne yvy ári.

31Heko jojáva jurúgui

osẽ arandu,

ikũ rãimbéva katu

ojejuru mbotýne.

32Heko jojáva jurúgui

osẽ ñe'ẽ porã,

iñañáva jurúgui katu

ñe'ẽ ky'a.