1Mburuvicha guasu Egipto pegua ombyaty heta etei ñorãirõhára, yvyku'i ysyry rembe'ýpe guáicha, heta ygára guasu reheve ha ñembotavy tavýpe omoĩse mo'ã ipoguýpe Alejandro retã guasu, ombojoapy haguã hetãre.
2Ojeity tapére Siria gotyo, py'a guapýpe ramo guáicha, ha opa rupi ojepe'a chupe táva rokẽ ha ojererohory, Alejandro voi he'ígui ra'e: Toloméo niko hembireko ru.
3Ha'e katu, ohasahápente oheja ohóvo peteĩ ñorãirõhára aty.
4Oguahẽvo Azótope ohechauka chupe hikuái Dagón tupao ojehapypa vaekue,1 Mac 10.84. táva ñembyaikue ijerére, te'õngue atýra isarambíva pe yvýre ha umi Jonatán ohapypa vaekue ñorãirõ rire; ombohysýi ra'e hikuái pe tape pukukue Toloméo ohasataha rupi.
5Omombe'u hikuái chupe, opa umi mba'e ojapouka hague Jonatán, upe mburuvicha guasu oñe'ẽ vai haguã hese, ha'e katu okirirĩnte.
6Jonatán osẽ ohuguãitĩ Toloméope vy'a guasúpe. Oñomomaitei ha opyta oke upépe.
7Jonatán oho upe mburuvicha guasu ndive ysyry hérava Eléutero peve ha upégui ojevy Jerusalénpe.
8Toloméo katu omoĩ ipoguýpe umi táva Seleucia yguasu pegua rembe'ýpe oĩva, ha upe aja omoheñói ohóvo iñakãme opaichagua mba'e vai ojaposéva Alejandro rehe.
9Omondo hembijokuái atýra peteĩ mburuvicha guasu Demetrio rendápe, ha he'ika chupe: “Eju ha ñañemoĩ peteĩ ñe'ẽme. Ame'ẽta ndéve che rajy, Alejandro rembireko, ha ndéta mburuvicha guasu nde ru retãme.
10Ambyasy ame'ẽ hague chupe che rajy, hetave jevýma che jukase mo'ã.”
11Upéva he'i hese Toloméo hi'águi chupe omoĩ ipoguýpe Alejandro retã.
12Aipórõ Toloméo oipe'a itajýra Alejándrogui ha ome'ẽ Demétriope. Péicha oiko vai Alejandro ndive ha upéva ojekuaapa.
13Upéi Toloméo oike Ásiape ha oiko mburuvicha guasúrõ. Ha upéicha oiko mokõi tetã mburuvicha guasúrõ: Egipto ha Asia.
14Umíva umi árape, mburuvicha guasu Alejandro oĩ hína Cilíciape, upe yvy pegua opu'ã hese.
15Oikuaávo mba'épa oiko hína, oho ondyry haguã Toloméo rehe, ha ha'e osẽ chupe peteĩ ñorãirõhára aty nde tuicháva reheve ha omboguevi chupe.
16Alejandro oho oñemo'ã Arábiape ha Toloméo osẽ porã.
17Ha Zabdiel, peteĩ Arabiagua ruvicha, oikytĩ Alejandro akã ha oguerahauka Toloméope.
18Mokõi ára rire katu omano Toloméo ha umi ñorãirõhára ha'e oheja vaekue óga mbarete kuéra rupi omanomba, ojukapa chupe kuéra umi yvypóra upe rupigua.
19Demetrio opyta mburuvicha guasúrõ, áño 177 ramo hína.
Jonatán oñoñe'ẽ me'ẽ Demetrio ndive20Umíva umi árape, Jonatán ombyaty Judea guápe ondyry haguã Jerusalén pegua óga mbaretére. Upevarã ojapo heta mba'e ojeporúva ñorãirõrã.
21Ha umi Israelgua heko jeroviaha'ỹva, ndaija'éiva hetã guáre voi, oho omombe'u mburuvicha guasúpe Jonatán omongoraha hína Jerusalén óga mbarete.
22Oikuaávo ipochy eterei ha upepete voi ojeity tapére Tolemaida gotyo; oguerahauka Jonatánpe kuatia he'ihápe ani haguã ondyry ha oho haguã Tolemáidape oñomongetávo hendive, pya'e ikatu haguéicha.
23Oguahẽvo ipópe upe kuatia, Jonatán he'i oñendyrýnte haguã ojehóvo upe óga mbaretére; oiporavo peteĩ atýra myakãhára ha pa'i ha oho Tolemáidape, oikuaa ramo jepe ikatuha ojehu chupe mba'e vai.
24Ogueraha pláta, óro, ao ha heta ambue jopói ha oguahẽ mburuvicha guasu rendápe, ho'a porã Demétriope ha oguerohory chupe,
25jepénte oime ra'e umi Israelgua heko jeroviaha'ỹva ha ndaija'éiva hetã guáre, omoĩ vai chupe.
26Mburuvicha guasu omoguahẽ chupe torypaitépe, ojapo haguéicha umi ha'e mboyve guare, ha ombojerovia chupe opa ha'e kuérava renondépe.
27Demetrio omoañete Jonatánpe pa'i ruvicha guasúrõ ha hetave mba'e tapykueve ome'ẽ vaekue chupépe, ha oguereko chupe umi hayhupára tenondevegua apytépe.
28Jonatán ojerure mburuvicha guasúpe anive haguã ojopy ohepyme'ẽ vaerãre Judéape ha umi mbohapy yvy Samaría guápe, ha oikuave'ẽ chupe 9.000 kílo pláta rupi.
29Mburuvicha guasu ojuhu porã opa ko'ã mba'e, ha ojapo Jonatánpe peteĩ kuatia he'íva kóicha:
30“Mburuvicha guasu Demetrio omomaitei ipehẽngue Jonatánpe ha Israel retãme.
31Péina ápe amoĩ opa mba'e ha'e vaekue pende rehe che rogagua Lástenespe, peikuaa haguã:
32‘Mburuvicha guasu Demetrio omomaitei karai guasu hogagua Lástenespe.
33Israel retãgua ipy'a porã haguére che ndive, ha ojapo opa mba'e ojapo vaerã chéve, oimevéta ame'ẽva chupe kuéra ojerureháicha heko porãngue.
34Amoañete Israélpe imba'eha umi mbohapy yvy Judea pegua, Efraín, Lida ha Romataim, ojei vaekue Samaríagui ha oñembojoaju Judea rehe; upéicha avei opa umi yvy oguerekóva voi. Opa Israel guápe ohóva oikuave'ẽ mymbajuka Jerusalénpe, aheja rei pe ohepyme'ẽ vaerã chéve áño ohasávo jepi opa omono'õvare hemitỹnguégui ha yvágui.
35Ko'águi rire, aheja rei chupe kuéra opa ohepyme'ẽ vaerã vaekue jukýre, ha óro mburuvicha guasúpe guarã. Opa mba'e oheja rei chupe kuéra.
36Ko'águi rire, ko'ã mba'e ame'ẽva chupe kuéragui, mba'evete ndaikatu mo'ã véima ojepe'ávo chugui kuéra araka'eve.
37Kóva ko kuatia toñeme'ẽ Jonatánpe, ha'e omoĩ haguã yvyty marangatúpe, ojekuaa haguãme.’”
Jonatán oipytyvõ Demétriope38Ohechávo Demetrio ojepysoha tetãpýre py'a guapy ha ndaipóri veimaha opu'ãva hese, opoipa iñorãirõhára kuéragui, peteĩ-teĩ tohopa jey hógape kuéra, ha umi tetã mombyryguágui ogueru vaekuénte oheja. Upévare ipochypa umi ñorãirõhára ogueru vaekue Demetrio ypy kuerakue.
39Upépe aipo Trifón, Alejandro ndive oĩ vaekue yma, ohechávo ipochypaha Demétriore umi ñorãirõhára, oho ohecha Imalcuépe, peteĩ mburuvicha Arabiagua oheko mbo'e vaekue Antíoco, Alejandro ra'ýpe,
40ha ojerure chupe hese ogueraha haguã ohupi mburuvicha guasúrõ itúva rendaguépe. Trifón omombe'upaite Imalcuépe opa mba'e ojapóva Demetrio ha mba'éichapa iñorãirõhára kuéra ndaija'evéi hese. Trifón are peve opyta upépe.
41Jonatán katu he'ika Demétriope oipe'a haguã umi ñorãirõhára oĩva Jerusalén óga mbaretépe ha umi ambue táva mbaretépe, manterei oikóva ojahéi Israel rehe.
42Demetrio he'ika chupe: “Ndaha'éi upévante ajapótava nde rehe ha ne retãre, pomyenyhẽta katu mba'e ñembojeroviahágui ikatu vove.
43Ko'ágã, mba'e porãve ikatúva rejapo che rehe, embou chéve ñorãirõhára che pytyvõ vaerã, umi che mba'éva niko che rejapa rei.”
44Jonatán omondo chupe Antióquiape 3.000 ñorãirõhára, umi imbarete ha ipy'a guasuvéva. Ohechávo oguahẽ hikuái, mburuvicha guasu ovy'a eterei.
45Tavagua kuéra, ohupytýva 120.000 rupi, oñembyaty táva guasu mbytépe oho haguã ojuka mburuvicha guasúpe.
46Ha'e katu okañy hóga guasúpe, tavagua kuéra ombotypa tape ha oñepyrũ ñorãirõ.
47Demetrio ohenói Israelgua kuérape oipytyvõ haguã chupe. Ha'e kuéra oho isarambi pe táva guasúpe ha upe árape ojuka hikuái 100.000pe.
48Ohapy ha omondapa hikuái upe táva guasu, ha upéicha oguenohẽ jejopýgui mburuvicha guasu Demétriope.
49Ohechávo umi tavagua Israelgua kuéra omoĩmbaiteha ipópe upe táva, okyhyjepa hikuái, ha sapukáipe ojerure:
50“Toĩmba py'a guapy ñande apytépe. Israelgua kuéra anivétei ondyry ko táva guasúre ha ore rehe.”
51Aipórõ ome'ẽmba hikuái umi mba'e oiporúva oporojuka haguã ha ojeiko py'a guapýpe. Israelgua kuéra opyta porã eterei mburuvicha guasu renondépe, herakuã guasu hikuái upe tetã guasúpe ha oho jey Jerusalénpe hetaite mba'e oipe'a vaekuégui ñorãirõháme.
52Mburuvicha guasu Demetrio katu, oĩ hatã jey vove iguapyhápe ha upe tetã oiko py'a guapýpe ipoguýpe,
53hesaraipa oikuave'ẽ vaekuégui, ojei Jonatángui, ha ohepyme'ẽ rangue chupe ojapóta vaekuére hese, heta uvei omoingo asy chupe.
Jonatán oiko porã ha ojoaju Antíoco ndive54Opa ko'ã mba'e rire, Trifón ogueru Antíocope, michĩva gueteri upérõ, ha ha'e ojupi mburuvicha guasúrõ,
55ha opa umi ñorãirõhára Demetrio opoipa vaekue oñemoĩ Antíoco ykére ha ondyry Demétriore, opytáva yvýre ha opoi pýgui.
56Upévo Trifón ogueraha elefánte kuéra ha omoĩ pópe Antioquía.
57Mitãrusu Antíoco oguerahauka peteĩ kuatia Jonatánpe, omoañetehápe chupe pa'i ruvicha guasúrõ ha irundyve yvy ruvicha ramo, ha ojapo chugui peteĩ tuicháva ijykeregua apytépe.
58Oguerahauka chupe tempiporu óro ha he'ika ikatuha oñemonde pytãvape, oiporu evílla óro ha hoy'u ojey'uha órope.
59Ipehẽngue Simónpe omoĩ mburuvicha ramo yvy ohóvape Escala de Tiro guive Egipto rembe'y peve.
60Jonatán oho oguatávo umi táva guasúre oĩva ysyry Éufrates mboypýri kuarahy reikévo, ha opa umi ñorãirõhára Siria pegua oñemoĩmba ijykére iñirũ ramo. Upéi oho Ascalónpe ha upépe maymáva osẽ ohuguãitĩ chupe tuicha vy'a ha ñembojeroviápe.
61Upégui ohasa Gázape, ha umi upepegua katu omboty hováre táva rokẽ. Upévare ha'e omongora, omondapa umi tava'i ijereregua ha omboja hese tata.
62Upépe katu, umi Gazagua oñemoĩ ipoguýpe, ha Jonatán oñoñe'ẽ me'ẽ py'a guapy rehegua hendive kuéra, ha oguerahauka Jerusalénpe, upéva repy ramo, umi mburuvicha ra'y kuérape. Upéi ohasa upe tetã rupi ha oho Damasco gotyo.
63Jonatán oikuaa, Demetrio ñorãirõhára ruvicha kuéra oguahẽ hague peteĩ ñorãirõhára aty nde tuicháva reheve Quedes Galiléa guápe ombyai haguã chugui hembipota.
64Ha'e osẽ ondyrývo hese kuéra, ha oheja ipehẽngue Simónpe Judéape.
65Simón oho opyta Bet-Sur renondépe, heta ára pukukue omongora ha ondyry hese.
66Hasýpe umi upepegua ojerure py'a guapy ha Simón ome'ẽ chupe kuéra ha ojapo hendive kuéra peteĩ kuatia upéva rehegua ha omosẽmba upe táva guasúgui. Ha'e oike ipype ha oheja upépe ñorãirõhára oñangareko vaerã hese.
67Upe aja, Jonatán ha iñorãirõhára kuéra opyta ra'e Genesaret yrenda ypýpe. Pyharevete ojeity tapére ha oho Hasor ñu gotyo.
68Upépe osẽ chupe kuéra tetã mombyrygua ñorãirõhára aty; ambue ñorãirõhára aty katu omoĩ Jonatánpe ñuhã umi yvyty rupi.
69Umíva osẽvo okañyhágui ha ondyry hese kuéra,
70Jonatán ñorãirõhára kuéra isarambipa ha opoi pýgui. Peteĩ jepe ndopytái, Matatías, Absalón ra'y, ha Judas, Calfí ra'y, mokõivéva mburuvicha, ha'e kuéra añoite mante opyta.
71Jonatán omondyryry ijao, oity iñakãre yvyku'i ha oñemoĩ oñembo'e.
72Upe rire ojere jey ondyry umi hese kuéra ija'e'ỹvare ha omosarambipaite chupe kuéra.
73Ohechávo upéva, umi Israelgua isarambipa vaekue oupa jey, ha Jonatán ndive omuña umi hese kuéra ija'e'ỹvape oñemohenda hague, Quedes peve. Upépe opyta avei ha'e kuéra.
74Upe árape omano 3.000 ñorãirõhára rupi tetã mombyryguáva. Upe rire, Jonatán oho jey Jerusalénpe.
Who We AreWhat We EelieveWhat We Do
2025 by iamachristian.org,Inc All rights reserved.
