Tobit 14 - Biblia Guaraní con Deuterocanónicos

1Péicha Tobit omoguahẽ hu'ãme umi iñe'ẽ poravo pyre ohepyme'ẽvo ipy'aite guive Ñandejárape.

Omano mboyve, Tobit oñemoñe'ẽ Tobíaspe

2Tobit omano py'a guapýpe oguereko ramo 112 áño, ha oñeñotỹ Nínivepe. Ha'e opyta vaekue ndohechavéi oguereko ramo 62 áño. Ohecha jey rire katu oiko porã vaekue, ha ome'ẽ oguerekóvagui umi oikotevẽvape ha akóinte omomba'e guasu Tupãme ha omoherakuã ha'e tuichaha.

3Omano mbotávoma hína, ohenói ita'ýra Tobíaspe ha oñemoñe'ẽ chupe kóicha:

—Che ra'y, tereho Médiape nde ra'y kuéra ndive.Nah 1—3

4Che arovia umi mba'e Tupã oikuaauka vaekue Nahúm rupi ojehutaha Nínivepe. Opa umi mba'e Israelgua maranduhára*f** kuéra he'i vaekue oikóta. Tupã niko ombou chupe kuéra he'i haguã mba'épa ojehúta Asiria ha Nínivepe. Peteĩ iñe'ẽnte jepe ndopyta rei mo'ãi, ha umíva ojehupáne Oguahẽ vove hi'ára. Médiape reiko porãvéta Asiria térã Babilóniape peguágui. Che aikuaa porã ha arovia opa umi mba'e Tupã he'i vaekue ojehutaha ha'e he'i hagueichaite.

Ha umi ñande reheguáva oikóva Israélpe, ojereraháta iñapytĩmby hetã porãitégui tetã mombyrýpe. Tetã Israel nandi opytáta, ha Samaría ha Jerusaléngui oikóta tapere. Tupao katu ojehapy ha oñehundíta.

5Upéi, Tupã oiporiahurerekóta chupe kuéra ha ogueraha jeýta Israel yvýpe. Ha'e kuéra omopu'ã jeýta pe tupao, ndojogua mo'ãi ramo jepe upe oñehundi vaekuépe. Ha oñembotývo umi ára Tupã omoĩ vaekue, ha'e kuéra ou jeýta ojereraha haguégui, ha omopu'ã jeýta Jerusalén tuichakue yma guaréicha, he'i haguéicha maranduhára kuéra Israel pegua.

6Opa yvypóra yvy tuichakue ojevýta Tupãme.Is 2.3; 60.1-3; 66.18; Zac 8.20-23. Omomba'e guasúta chupe ha ohejáta umi tupã gua'u omombiáva chupe kuéra tape porãgui.

7Ha'e kuéra omomba'e guasúta Tupãme oikovéva opa ára, ha umi Israelgua oñerenohẽva jejopy vaígui umi árape, imandu'áta Tupãre ha ohóta oñembyaty Jerusalénpe. Oikóta py'a guapýpe yvy Abrahámpe oñeme'ẽ vaekuépe ha opytáta chupe kuéra opa árape guarã. Umi Tupãme ohayhúva ovy'áta, ha umi iñangaipa ha oporojopýva katu opáta yvy ári.

8Pemomba'éke Tupãme hekoitépe ha pejapo ha'e oipotáva. Peheko mbo'e pende ra'y kuéra heko joja haguã ha oipytyvõ haguã imboriahúvape. Taimandu'a hikuái Tupãre ha tomomba'e guasu héra opa ára ipy'aite guive.

9Nde che ra'y, tereho Nínivegui. Ani repyta ko'ápe.

10Omano vove nde sy ha reñotỹ che ykére, upe araitépe tereho. Ani repytave ko tetãme opavave hembiapo vai ha ijapuhápe. Ne mandu'ápa upe Nadab ojapo vaekuére imongakuaahare Ajicar rehe. Hekovete oñotỹ vaekue chupe. Tupã katu omyengovia Nadábpe hembiapo vaikuére ha omondo chupe upe iñypytũháme ojukase haguére Ajicárpe, Ajicárpe katu oguenohẽ okápe. Imba'e porã ha oipytyvõgui imboriahúvape, Ajicar ndo'ái upe ñuhãme Nadab omoĩ vaekue chupe. Nadab uvei ho'a ipype ha oñehundi.

11Pehechápa mba'épa ogueru ñandéve ñaipytyvõ ramo imboriahúvape, ha Mba'éichapa ñamano jajapo ramo hekopegua'ỹ. Ko'ágã katu añandu opamaha ohóvo che rekove”.

Omoñeno chupe hikuái hupápe ha upépe omano. Upéi oñotỹ chupe hikuái hekoitépe.

12Isy omano rire, Tobías oñotỹ chupe itúva ykére. Upéi hembireko ndive oho tetã Médiape ha opyta táva Ecbatánape, hembireko ru Raguel ndive.

13Tobías oñangareko porã ha omomba'e hembireko ru ha isýpe, ha omano rire oñotỹ chupe kuéra Ecbatánape. Opa mba'e Raguel oguerekóva opytapa chupe, ha upéicha avei opa mba'e itúva Tobit mba'ekue.

14Opavave oguerohory vaekue chupe, ha omano oguereko ramo 117 áño.

15Omano mboyve, ohecha Nínive oñehundi ramo ha ohecha Mba'éichapa umi upépe oikóva ojereraha iñapytĩmby Médiape, mburuvicha guasúrõ upépe Ciaxares. Ha Tobías omomba'e guasu Tupãme ohechávo umi mba'e ha'e ojapóva Nínive ha Asiria guáre. Omano mboyve ovy'a jepe Nínive oñehundi haguére ha omomba'e guasu Tupãme, oikóva opa ára.