Eclesiástico 27 - Biblia Guaraní con Deuterocanónicos

1Viru ohupytységui

heta oĩ iñangaipáva,

ha oguerekoségui

ndohechái gua'u.

2Mokõi ita apytépe

oñemopa'ã yvyra hakua,

jejogua ha ñeme'ẽ pa'ũme

oñemoinge angaipa.

3Noñemohatãiva

Ñandejára ñembyajépe,

pya'e hóga jero'apáta.

4Remboguávo hu'itĩ

opyta hevorakue,

ha omombe'úva hemiandu,

ohechauka ijejavykue.

5Tatakua ohechauka

mba'eichaguápa

tembiporu ñai'ũ,

ha iñe'ẽre pe máva

ojekuaa.

6Hi'áre ojekuaa pe yvyra,

ha iñe'ẽre

pe máva remiandu.

7Avavépe ani rerohory

rehendu mboyve chupe,

upe he'ívare niko

pe mávape jaikuaa.

8Rehekárõ teko joja

rehupytýta,

ha ne mbojeguáta

ahoja porãicha.

9Guyra ojueheguáva

oñembyaty oñondive,

ha pe añetegua ojejuhu

oĩháme ijapu'ỹva.

10Jaguarete ohape ra'arõ

pe ho'usévape,

ha angaipa

umi heko joja'ỹvape.

11Ñandejárape ohayhúva

arandu meme upe iñe'ẽ,

ha itavýva

opa mba'e reíre oñe'ẽ.

12Itavýva ndive

ani nde are,

iñarandúva apytépe,

upépeke epyta are.

13Itavýva ñe'ẽ

oporombopochy,

ha ipuka, ky'águi henyhẽ.

14Ijuru guasúva ñe'ẽ

oporombohague pu'ã,

oporoja'o ramo

jajeapysa mboty vaerã.

15Ojejapóva ñoñe'ẽ api

ogueru tuguy ñeñohẽ,

ndaikatúi ñahendu

umi he'íva ojupe.

Ambue py'apy ani remosarambi

16Mba'e ñemihamegua

omombe'úvare,

avave ndojeroviavéi.

Araka'eve ndojuhu mo'ãi

iñirũ teerã.

17Ehayhu ne irũ teépe

ha ejerovia hese,

remombe'u ramo

imba'e ñemihamegua katu,

reínte reikosevéta

hendive,

18pe oporojukáva

oporohundiháicha niko,

rehundíma nde rapicha

mborayhu.

19Guyra nde pógui

ovevévaicha,

ohóma ne irũ tee

ouve'ỹ haguã.

20Ani reheka, ohóma mombyry

guasúicha ñuhãgui ojeíva.

21Jekutukue ikatu jajokua,

ñe'ẽ reitýgui

ikatu ñañembyesarái,

ijuru my'ỹiva katu,

ndaikatu véima

mba'eve oha'arõvo.

Apeguy pegua

22Oñembyesavíva,

ojapose hína ivaíva,

ndaipóri

omboguevi vaerã chupe.

23Ne renondépe ne moñe'ẽmba

ha ojepopete opa erévare,

nde kupépe katu

oñe'ẽ megua, ha oñeha'ã

nde reity nde juru rupi.

24Heta mba'ére ndacha'éi,

peichaguárema katu!

Ha Ñandejára avei

umívare ndaija'éi.

25Upe ita omombóva yvate,

ha'e voi oity iñakãre,

ha oporokutúva

guasu apípe,

ha'e avei ijupe ojekutu.

26Ojo'óva yvykua,

ho'áta pype,

ha omoĩva ñuhã

ojeráta isyváre.

27Ojapóva ivaíva

ojeréta hese,

ha ndoikuaa mo'ãi

mamóguipa ou.

28Ojejapóva, oporoja'o

ha oporoapo'i,

ha ñenupã porã

oha'arõ chupe

jaguaretéicha.

29Ho'áta ñuhãme

umi ovy'áva

ho'a haguére imarangatúva,

ohasa asýta omano mboyve.

30Py'aro ha pochy vai,

mba'e jahechase'ỹva,

hembiapo vaívare

oja hína umíva.