Eclesiástico 30 - Biblia Guaraní con Deuterocanónicos

Tekombo'e mitã nguérape guarã

1Ohayhúva ta'ýrape,

manté oinupã mimi

ikatu haguã ovy'a upe rire.

2Oheko mbo'éva ta'ýrape

ojuhúta hese

ou porãva chupe,

ha ikuaaha apytépe

ojererohorýta.

3Ombo'éva ta'ýrape

ombopochy hese ija'e'ỹvape,

ha iñirũ nguéra apytépe,

ovy'a itereíta.

4Omano itúva

ha nomanóirõ guáicha,

ohejágui hendaguépe

ijoguaha.

5Oikove aja

ovy'ami chupe ohechávo,

ha omanóvo katu noñembyasýi.

6Hese ija'e'ỹvape oheja

peteĩ ndoheja rei mo'ãiva

chupe kuéra,

ha chupe ohayhúvape,

peteĩ ohecha kuaátava

chupe kuéra.

7Omokunu'ũva ta'ýrape

ojokuáta chupe ijekutukue,

ha ha'e osapukáirõ

ipy'a ho'áta yvýre.

8Kavaju ra'y opopo,

ha mitã iñakãre oikóva

osẽ ijuru atã.

9Embojerovia vai nde ra'ýpe

ha ne mboryryipáta,

eñembojaru hendive,

ha ne myasẽta.

10Ani repuka hendive

ha na ne rasẽ mo'ãi,

ha amo ipahápe

na ne rãijehýi mo'ãi.

11Ani rembopepo chupe

imitã rusúpe,

ha reheja rei ojejavýrõ.

12Imitã rusu aja

nde poguýpe ereko,

ha imitãme embyepoti

ani haguã ojetu'u

ha nde rehe opu'ã,

cháke ne mbopochy asýne!

13Eheko mbo'e nde ra'ýpe

ha ejopy hendive,

ani haguã opu'ã nde rehe.

Tesãi ha vy'a

14Iporãve

mboriahu hesãi porãva

mba'eta rerekua

hasyháre oikóvagui.

15Tesãi ha kyre'ỹ iporãve

óro ku'ígui,

ha tete mbarete iporãve

ita jeguágui.

16Ndaipóri mba'e iporãvéva

tete resãi porãgui,

ha vy'a tuichavéva

py'a rorýgui.

17Iporãve mano jeiko asýgui

ha pytu'u pave'ỹ

mba'asy pukúgui.

18Tembi'u oñekuave'ẽva

okaru kuaa'ỹvape,

peichagua hína

tembi'u ojehejáva tyvy ári.

19Maerã piko iporã

hi'upy oñekuave'ẽva ta'ãnga

ikatu'ỹvape ohetũ ha okaru?

Péicha ojehu mba'eta rerekua

oiporu'ỹvape upe oguerekóva,

20umívare oma'ẽ ha hi'ãho,

oñeha'ỹi'o vaekuéicha

oñañuãrõ mitãkuñáme.

21Ani reñeme'ẽ vy'a'ỹme

térã rejepy'apy mba'evére.

22Py'a rory

ha'e yvypóra rekove,

Vy'a oporomoingove puku.

23Emombytu'u nde py'a,

ha emosẽ nde vy'a'ỹ,

vy'a'ỹ niko hetápe ohundi

ha naiporãi mba'everã.

24Mba'e pota ha pire vai

omombyky ñande rekove,

jepy'apy pya'e ñane mbotuja.

25Py'a rory ñane mbojuruhe

ha oguapy porã ñande rehe

pe tembi'u.